Esekielu 18:1-32
18 Ua toe oo mai le afioga a Ieova iā te aʻu e faapea:
2 “O le ā le uiga o lenei faaupuga masani e tou te faia i le nuu o Isaraelu e faapea, ‘Ua ʻaina e tamā vine moto, ae magiagia ai nifo o fanau’?+
3 “‘Ou te tautō iā te aʻu lava,’ ua fetalai mai ai le Alii Pule Silisili Ese o Ieova le Atua soifua, ‘o le a outou lē toe faia lava lenei faaupuga masani i Isaraelu.
4 Faauta! O ola uma, o aʻu lava e ona i latou. E pei o le ola o le tamā e faapea foʻi le ola o le atalii, o aʻu e ana ia ola. O le tagata ola e agasala, e oti lava o ia.
5 “‘Seʻi faapea e amiotonu se tagata ma ua ia faia le mea e tonu ma saʻo.
6 E lē ʻai o ia i taulaga mo tupua i luga o mauga;+ e lē tepa aʻe ona mata i tupua inosia* a le aiga o Isaraelu; e na te lē faaleagaina le avā a lona tuaoi+ pe faia feusuaʻiga ma se fafine a o fai lona maʻi masina;+
7 e na te lē agaleaga i se isi,+ ae ua ia toe faafoʻi atu i lē na aitalafu le mea na ia aumaia e faamau ai le aitalafu;+ e na te lē gaoia se mea mai i se isi,+ ae e na te avatu lana lava meaʻai i lē ua fia ʻai,+ ma ufiufi i lē ua lē lavalavā i se ofu;+
8 e na te lē nonō atu ina ia maua ai se pasene,+ pe e nonō atu foʻi ina ia maua ai se polofiti, ae e na te teena le faia o faiga lē tonu;+ e na te faia le faamasinogatonu i le vā o le tasi tagata ma le isi;+
9 ma e savali pea o ia i aʻu tulafono ma tausia iʻuga o aʻu faamasinoga ina ia faia le mea moni. E amiotonu lenā tagata ma o le a ola pea lava o ia,’+ ua fetalai mai ai le Alii Pule Silisili Ese o Ieova.
10 “‘Ae seʻi faapea ua avea o ia ma tamā i se atalii e faomea+ po o sē e fasioti tagata,*+ po o sē ua faia se tasi o mea nei
11 (e ui e leʻi faia e le tamā se mea o nei mea), e ʻai o ia i taulaga mo tupua i luga o mauga, faaleagaina le avā a lona tuaoi,
12 e agaleaga i lē ua puapuagatia ma lē ua mativa,+ gaoi mea mai i isi, e na te lē toe faafoʻi atu le mea na faamau ai le aitalafu, e tepa aʻe ona mata i tupua inosia,+ faia amioga inosia,+
13 ma e nonō atu ina ia maua ai polofiti ma talia foʻi pasene.+ E lē ola pea le atalii, ae o le a fasiotia lava o ia, ona ua ia faia nei mea inosia uma. E paʻū i ona luga lona lava toto.
14 “‘Ae seʻi faapea e iai se tamā e iai sona atalii, o lē ua vaai i agasala uma ua faia e lona tamā, ma e ui ua ia vaai i ai, ae e na te lē faia na mea.
15 E lē ʻai o ia i taulaga mo tupua i luga o mauga; e lē tepa aʻe ona mata i tupua inosia a le aiga o Isaraelu; e na te lē faaleagaina le avā a lona tuaoi;
16 e na te lē agaleaga i se isi; e na te lē avea se mea na faamau ai se aitalafu; e na te lē gaoia se mea; e na te avatu lana lava meaʻai i lē ua fia ʻai, ma ufiufi i lē ua lē lavalavā i se ofu;
17 e na te teena le faileagaina o lē ua mativa; e na te lē nonō atu ina ia maua ai se polofiti, pe e nonō atu foʻi ina ia maua ai se pasene; e na te tausia iʻuga o aʻu faamasinoga ma savali i aʻu tulafono. E lē oti lenā tagata ona o mea sesē a lona tamā. O le a ola pea lava o ia.
18 Ae ona na faia e lona tamā faiga taufaasesē, gaoi mai i lona uso, ma faia i lona nuu se mea sesē, o le a oti o ia ona o lana mea sesē.
19 “‘Ae o le a outou faapea ane: “Aiseā ua lē nofosala ai le atalii ona o mea sesē a lona tamā?” Talu ai ua faia e le atalii le mea tonu ma le amiotonu, ua ia tausia foʻi ma faia aʻu tulafono uma, o le a ola pea la o ia.+
20 O le tagata ola e agasala, e oti lava o ia.+ E lē nofosala le atalii ona o mea sesē a lona tamā, e lē nofosala foʻi le tamā ona o mea sesē a lona atalii. O le amiotonu a lē ua amiotonu e i ona lava luga, o le amioleaga foʻi a lē ua amioleaga e i ona lava luga.+
21 “‘Ae afai e liliuese se tagata amioleaga mai i ana agasala uma na faia, ma ia tausia aʻu tulafono ma faia le mea tonu ma le amiotonu, o le a ola pea lava o ia. E lē oti lava o ia.+
22 O solitulafono uma na ia faia, e lē toe lāgā mai* e faasaga iā te ia.+ O le a ola pea o ia ona o le faia o le amiotonu.’+
23 “‘Po ou te fiafia ea i le oti o le tagata amioleaga?’+ ua fetalai mai ai le Alii Pule Silisili Ese o Ieova. ‘Po ou te lē fiafia ea pe a liliuese o ia mai i ona ala ma ola ai pea o ia?’+
24 “‘Ae pe a lafoaʻia e le tagata amiotonu lana amiotonu ae fai le mea sesē,* o le faia lea o mea inosia uma e faia e le tagata amioleaga, po o le a ola ea o ia? O le a lē manatuaina ana galuega amiotonu uma na faia.+ O le a oti o ia, ona o lona lē faamaoni ma le agasala na ia faia.+
25 “‘Ae o le a outou faapea ane: “E lē tonu ala o Ieova.”+ Faamolemole, le aiga o Isaraelu e, inā faalogo mai ia! Pe e lē tonu ea oʻu ala?+ Pe e lē o outou ea ua lē tonu o outou ala?+
26 “‘Pe a lafoaʻia e le tagata amiotonu lana amiotonu ae fai le mea sesē ma oti ai ona o ia mea, o le a oti o ia ona o ana lava mea sesē.
27 “‘Pe a liliuese foʻi le tagata amioleaga mai i lana amioleaga na fai ae fai le mea tonu ma le amiotonu, o le a faasaoina e ia lona lava ola.+
28 Pe a iloa e ia ana solitulafono uma na faia ma liliuese mai ai, o le a ola pea lava o ia. E lē oti lava o ia.
29 “‘Ae o le a faapea ane le aiga o Isaraelu: “E lē tonu ala o Ieova.” Le aiga o Isaraelu e, pe e lē tonu ea oʻu ala?+ Pe e lē o outou ea ua lē tonu o outou ala?’
30 “‘O le mea lea, le aiga o Isaraelu e, o le a ou faamasino iā te outou e taʻitoʻatasi e tusa ma lona ala,’+ ua fetalai mai ai le Alii Pule Silisili Ese o Ieova. ‘Inā liliuese ia, inā matuā liliuese ia mai i a outou solitulafono uma, ina ia lē avea na mea ma mea e tautevateva ai ma outou nofosala ai.
31 Ia lafoaʻi ese mai iā te outou solitulafono uma na outou faia,+ ma ia maua* se lotofou ma se agaga fou,+ auā aiseā tou te feoti ai,+ le aiga o Isaraelu e?’
32 “‘Ou te lē fiafia i le oti o so o se tasi,’+ ua fetalai mai ai le Alii Pule Silisili Ese o Ieova. ‘O lea, ia outou liliu mai ma outou ola ai pea.’”+
Faamatalaga Pito i Lalo
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ Epe., “sē e faamasaatoto.”
^ Epe., “manatua.”
^ Po o le “ae fai le mea lē tonu.”
^ Epe., “faia mo outou.”
