Esoto 23:1-33
23 “Aua e te faasalalauina* ni faamatalaga e lē moni.+ Aua e te ‘au faatasi ma sē e amioleaga e ala i le avea ma se molimau e fafauina mea leaga.+
2 Aua e te mulimuli i le toʻatele ina ia faia mea leaga, ma aua e te liliuina le faamasinogatonu e ala i le faia o se molimau ina ia ʻau ma le toʻatele.
3 Aua e te faaʻauʻau i le tagata mativa+ i lana finauga.
4 “Pe a e tau atu i le povi poʻa po o le asini a lou fili ua sē, ia e toe faafoʻi atu lava iā te ia.+
5 Pe a e vaai i le asini a sē e ita iā te oe o loo taoto ona o le mamafa o lana avega, ia aua neʻi e tuua ai pea faapena. Ia e fesoasoani iā te ia e aveese le avega a le manu.+
6 “Aua e te liliuina le iʻuga o le faamasinoga o le tagata mativa ua iā te oe e tusa ma lana finauga.+
7 “Ia e taumamao mai i tuua‘iga* pepelo, aua foʻi e te fasiotia tagata e lē sala ma ē e amiotonu, auā ou te lē taʻuamiotonuina o lē e amioleaga.+
8 “Aua e te talia se foaʻi e faia i faiga faaalatua, auā o foaʻi faapena e faatauasoina ai tane atamamai ma suia ai faaiʻuga a tane amiotonu.+
9 “Aua e te faasauā i se tagata ese e aumau. Ua outou iloa lagona o le tagata ese, auā na avea foʻi outou ma tagata ese na aumau i le atunuu o Aikupito.+
10 “E ono tausaga e te lūlū ai fatu i lou fanua ma aoina ai ona fua.+
11 A o le tausaga lona fitu e te lē galueaʻiina ai lou fanua ae e tuu ai pea, ma e aai mai ai tagata matitiva ua iā te oe; a o mea ua totoe ai e tuu ma manu o le vao. O le mea lea e te faia i lou togāvine ma lou togāolive.
12 “E ono aso e fai ai au galuega; ae o le aso lona fitu e te lē galue ai, ina ia mālōlō ai lau povi poʻa ma lau asini, ma mālōlō ai le tama tama a lau teine pologa ma le tagata ese e aumau ai.+
13 “Ia outou utagia nei mea uma ua ou fai atu ai iā te outou;+ ia aua neʻi outou taʻutaʻua igoa o isi atua; aua lava neʻi faalogo i ai mai i lou gutu.+
14 “Ia e faamanatu tausamiga e tolu iā te aʻu i tausaga taʻitasi.+
15 Ia e tausia le Tausamiga o Falaoa e Lē Faafefeteina.+ E fitu aso e te ʻai ai i falaoa e lē faafefeteina e pei ona ou poloaʻi atu ai iā te oe, i le taimi faatulagaina i le masina o Apipa,*+ auā o le taimi lea na outou ō ese mai ai i Aikupito. E leai se isi e sau i oʻu luma e aunoa ma se mea.+
16 Ia e tausia fo‘i le Tausamiga o le Seleselega* o uluaʻi fua ua matutua o au galuega, ia na e lūlūina i le fanua;+ ia e tausia foʻi le Tausamiga o le Aoaoina o Fua* i le faaiʻuga o le tausaga, pe a e aoaoina mai i le fanua fua o au galuega.+
17 I tausaga taʻitasi, ia faatolu ona tutū tane uma ua iā te oe i luma o le Alii moni o Ieova.+
18 “Aua e te osi faatasi le toto o laʻu taulaga ma so o se mea ua faafefeteina. E lē tatau ona tuua seʻia oo i le taeao le gaʻo o taulaga na faia i tausamiga iā te a‘u.
19 “Ia e avatu i le fale o Ieova lou Atua o uluaʻi fua ua matutua e aupito lelei o lou eleele.+
“Aua e te sakaina le tamaʻi ʻoti i le suāsusu o lona tinā.+
20 “Ou te auina atu se agelu e muamua atu iā te oe,+ ina ia leoleoina oe i le ala ma taʻitaʻiina oe i le mea ua ou saunia.+
21 Ia e ua‘i atu iā te ia ma usiusitaʻi i lona leo. Aua e te fouvale iā te ia, auā na te lē faamagaloina au solitulafono,+ ona o loo iā te ia loʻu igoa.
22 Peitaʻi, pe a e matuā usiusitaʻi i lona leo ma faia mea uma ou te fai atu ai, ona ou ita lea i ou fili ma tetee i ē e tetee iā te oe.
23 Auā e muamua atu laʻu agelu iā te oe ma taʻitaʻi atu oe i tagata Amorī, i tagata Hetī, i tagata Perisē, i tagata Kanana, i tagata Hivī, ma tagata Iepusē, ma ou te faaumatia i latou.+
24 Aua e te ifo atu i o latou atua pe lolo atu e auauna iā i latou, ma aua e te faaa‘oa‘o i a latou mea e fai.+ Nai lo o lea, e tatau ona e lepetia ia mea ma ia e nutililiia o latou poutū paia.+
25 Ia outou auauna iā Ieova lo outou Atua,+ ona ia faamanuia lea i lau meaʻai ma lau vai.+ Ou te aveesea foʻi faamaʻi mai iā te outou.+
26 E leai se fafine i lou atunuu e mafatia i le fafano o lana tama, po o se fafine e pā,+ ma ou te faafualoaina lou ola.*
27 “Ou te auina atu le mataʻu iā te aʻu e muamua atu iā te oe,+ ma ou te faavevesi foʻi i nuu uma e tou te fetaia‘i, ma ou te faapogaia ou fili uma ina ia sosola ese mai iā te oe ona ua to‘ilalo.*+
28 A o e le‘i taunuu, ou te faapogaia le atuatuvale o ou fili,+ ma ou tuliesea ai tagata Hivī, o tagata Kanana, ma tagata Hetī mai i ou luma.+
29 Ou te lē tuliesea i latou mai i ou luma i le tausaga e tasi, ina neʻi gaogao le laueleele ma faatuputeleina ai manufeʻai o le fanua ma e tigā ai.+
30 E auauaʻi ona ou tuliesea i latou mai i ou luma, seʻia matuā toʻatele outou ma ʻaināina ai le laueleele.+
31 “Ou te faatulagaina ou tuaoi mai i le Sami Ulaula e oo atu i le sami o tagata Filisitia, ma e mai i le toafa e oo atu i le Vaitafe;*+ auā ou te tuuina atu i o outou lima tagata o le atunuu, ma e te tuliesea i latou uma mai i ou luma.+
32 Aua tou te faia se feagaiga ma i latou po o latou atua.+
33 Aua neʻi latou nonofo i o outou laueleele, ina neʻi o latou faapogaia oe e agasala mai iā te aʻu. Afai e te auauna i o latou atua, e fai lava lea ma mailei iā te oe.”+
Faamatalaga Pito i Lalo
^ Epe., “siiina.”
^ Epe., “upu.”
^ E taʻua foʻi o le Tausamiga o Vaiaso, po o le Penetekoso.
^ E taʻua foʻi o le Tausamiga o Fale Lauvao (Faleapitaga).
^ Po o le “ou te faaatoaina ou aso.”
^ Po o le “ou te faapogaia ou fili uma ina ia ū mai o latou tua iā te oe.”
^ E faasino atu i le vaitafe o Eufirate.
