O le Tusi i le Faapotopotoga i Roma 7:1-25
7 Pe e tou te lē iloa ea le ʻauuso e, (auā o loo oʻu talanoa atu i ē e iloa tulafono) e pule le Tulafono i le tagata a o ola o ia?
2 O se faataʻitaʻiga, e noatia le fafine ua faaipoipo i le tulafono a lana tane a o ola le tane; ae afai e oti le tane, ona saʻoloto lea o ia mai i le tulafono a lana tane.+
3 O lea la, e taʻua o ia o sē e mulilua, pe afai e nonofo ma se isi tamāloa a o ola pea lana tane.+ Ae afai e oti lana tane, ona saʻoloto lea o ia mai i lana tulafono, ma e lē mulilua o ia pe a faaipoipo i se isi tamāloa.+
4 O lenei oʻu uso e, ua faapena foʻi ona outou oti e tusa ma le Tulafono i le tino o Keriso, ina ia fai outou mo se isi,+ o lē na faatūina mai i le oti,+ ina ia tatou fua mai ai ni fua i le Atua.+
5 Auā ina ua tatou ola e tusa ma le tino, na galulue i o tatou tino tuʻinanauga agasala ua faaalia ona o le Tulafono, ina ia fua mai ai ni fua e oti ai.+
6 A o lenei, ua tuusaʻoloto i tatou mai i le Tulafono,+ ona ua tatou oti i le mea na taofia ai i tatou, ina ia avea i tatou ma pologa ona o le agaga+ i se auala fou, ae e lē o le auala tuai i le tulafono na tusia.+
7 O le ā la sa tatou upu? Po o le agasala ea le Tulafono? Ia aua lava neʻi manatu faapena! O le mea moni, ana leai le Tulafono, semanū ou te lē iloa le agasala.+ O se faaaʻoaʻoga, pe ana lē fai mai le Tulafono “Aua e te manaʻo tele,”+ semanū ou te lē iloa le sesē o le manaʻo tele.
8 Ae ua maua e le agasala se togafiti i le poloaʻiga, ona faatupu ai lea i totonu iā te aʻu o le manaʻo tele i mea uma lava. Auā ua oti le agasala a o leai se tulafono.+
9 Sa ou ola foʻi e aunoa ma le tulafono. Ae ina ua oo mai le poloaʻiga, na toe ola ai le agasala, ae ua ou oti.+
10 Ua ou iloa o le poloaʻiga na saunia e ola ai,+ ua oo mai ai le oti.
11 Auā ua maua e le agasala se togafiti i le poloaʻiga, ua maileia ai aʻu ma fasiotia ai aʻu.
12 O lenei, e paia lava le Tulafono, ma e paia, e tonu, ma lelei le poloaʻiga.+
13 O lea la, po ua avea ea le mea lelei ma mea ou te oti ai? E mautinoa e leai! O le mea lenā na faia e le agasala, ina ia iloa ai o le agasala lea e faatupuina ai le oti iā te aʻu i le mea lelei,+ o lea na iloa e ala i le poloaʻiga, o le agasala e matuā leaga lava.+
14 Auā ua tatou iloa e faaleagaga le Tulafono, ae o aʻu o le tagata faaletino, ua faatauina atu i le agasala.+
15 Auā ou te lē malamalama i le mea o loo oʻu faia. Auā ou te lē faia le mea ou te loto i ai, ae ou te faia le mea ou te ʻinoʻino i ai.
16 Peitaʻi, afai ou te faia mea ou te lē loto i ai, ou te ioe e lelei le Tulafono.
17 O lenei, e lē o aʻu e faia lea mea, a o le agasala o loo nofo i totonu iā te aʻu.+
18 Auā ua ou iloa e leai se mea lelei ua nofo i totonu iā te aʻu, i loʻu tino lea; auā ou te faanaunau e fai le mea lelei, ae e lē mafai ona ou faia le mea lelei.+
19 Ou te lē faia le mea lelei ou te loto i ai, ae ou te faia le mea leaga ou te lē loto i ai.
20 O lenei, afai ou te faia le mea ou te lē loto i ai, e lē o aʻu e faia, a o le agasala o loo nofo i totonu iā te aʻu.
21 O lenei, o le tulafono lenei ua iā te aʻu: Pe a ou loto atu e fai le mea lelei, ae ua iā te aʻu le leaga.+
22 Ou te matuā naunau i le tulafono a le Atua e tusa ma le tagata i totonu,+
23 ae ua ou iloa i loʻu tino se isi tulafono, o loo tau ma le tulafono a loʻu mafaufau,+ ma ua faapologaina ai aʻu i le tulafono a le agasala+ o loo i loʻu tino.
24 Auē o aʻu le tagata malaia! O ai e na te laveaʻiina aʻu mai i le tino e iʻu ai i loʻu oti?
25 Ia faafetaia le Atua ona o lo tatou Alii o Iesu Keriso! O lea, ua avea ai aʻu ma pologa i le tulafono a le Atua i loʻu mafaufau, ae i le tulafono a le agasala i loʻu tino.+
