Ruta 2:1-23
2 Sa iai se tamāloa e aiga i le tane a Naomi o Elimeleka. O lona igoa o Poasa,+ ma sa matuā mau‘oa o ia.
2 Ua fai atu Ruta le fafine Moapi iā Naomi: “Faamolemole, seʻi tuu mai aʻu ou te alu i le fanua e ao+ mai ni fua o karite o loo totoe, ma mulimuli i sē e alofa mai iā te aʻu.” Ona fai mai lea o Naomi iā te ia: “Inā alu ia si aʻu tama e.”
3 Ua alu o ia ma ua ia mulimuli atu i ē e selesele, ma ao mai karite i le fanua. Peitaʻi, ua alu atu o ia ma lona lē iloa i le fasi fanua o Poasa,+ o lē e aiga iā Elimeleka.+
4 Ona taunuu ai lea o Poasa mai i Peteleema ma fai mai i ē ua selesele: “Ia faatasi Ieova iā te outou.” Ua latou tali atu: “Ia faamanuia Ieova iā te oe.”
5 Ona fesili lea o Poasa i le tauleʻaleʻa na vaaia ē e selesele: “O le aiga o ai e sau ai lenei fafine talavou?”
6 Ua tali atu le tauleʻaleʻa na vaaia ē e selesele: “O le fafine talavou e mai i Moapi,+ o lē na toe foʻi mai ma Naomi mai i fanua o Moapi.+
7 Na talosaga mai o ia, ‘Faamolemole, pe e mafai ona ou alu e ao+ ma faaputu fua o karite* o loo totoe mai i ē e selesele?’ Ona alu lea o ia ma galue pea mai i le taeao seʻia oo mai i le taimi lenei, ina ua mālōlō teisi o ia i le fale.”
8 Ona fai atu lea o Poasa iā Ruta: “Faalogo mai ia loʻu afafine e. Aua neʻi e alu atu e ao i se isi fanua, aua foʻi neʻi e alu ese mai i lenei nofoaga, ae ia e faalatalata i aʻu auauna fafine.+
9 Ia e vaai i le fanua latou te selesele ai, ma ia tou ō faatasi ma i latou. Ua ou faatonuina oʻu taulele‘a e aua le paʻi* atu iā te oe. A e fia inu, ia e alu atu i fagu ma inu mai i vai ua utu e tauleleʻa.”
10 Ona ia faapaʻū faō lea ma ifo i le eleele, ma fai atu iā te ia: “Aiseā ua e manatu mai ai iā te aʻu, ma e silasila mai ai a o aʻu o le tagata ese?”+
11 Ae ua tali mai Poasa iā te ia: “Ua uma ona faamatala mai iā te aʻu o mea uma na e faia i le tinā o lau tane ina ua oti lau tane; ua e tuua lou tamā, o lou tinā, ma le nuu o lou aiga, ae ua e sau i le nuu e te leʻi iloa muamua.+
12 Tau ina ia tauia e Ieova au gaoioiga,+ ma ia iai se taui sili ona lelei* mo oe mai iā Ieova le Atua o Isaraelu, o lē ua e sulufaʻi ai i lalo o ona apaʻau.”+
13 Ona ia faapea atu lea: “Loʻu alii e, ia e alofa mai iā te aʻu, auā ua e faamāfanafana iā te aʻu ma ua e tautala mai ma le mautinoa i* lau auauna, e ui lava e lē o a‘u o se tasi o au auauna.”
14 Ina ua fai le meaʻai, ona fai mai lea o Poasa iā te ia: “Inā sau ia i inei, ma ʻai sau fasi falaoa ma loiloi i le vineta.” Ona nofo lea o ia i tafatafa o ē e selesele, ua tuu atu e Poasa iā te ia o karite tunu ma ʻai ai, ua maʻona o ia, ua totoe lana meaʻai.
15 Ina ua tula‘i o ia e ao,+ ona faatonu lea e Poasa o ona taulele‘a e faapea: “Ia tuu atu o ia e ao mai fua o karite* o loo totoe, aua foʻi neʻi outou agaleaga iā te ia.+
16 Ia outou aveese ni karite mo ia mai i faaputuga, ma tuu na karite e ao e ia, aua foʻi neʻi faia se tala e taofia ai o ia.”
17 Ua faaauau ona ia ao i le fanua seʻia oo i le afiafipō,+ ona ia sasa lea o mea na ia aoina, ua tusa ma le efa* o karite.
18 Ona ia sii aʻe lea ma alu i le aai, ua iloa foʻi e le tinā o lana tane mea na ia aoina. Ua ave aʻe foʻi e Ruta meaʻai na totoe+ ina ua maʻona, ma avatu iā te ia.
19 Ua fai mai le tinā o lana tane iā te ia: “O fea na e ao ai i le asō, ma o fea foʻi na e galue ai? Ia manuia lē na alofa mai iā te oe.”+ Ua ia taʻu atu i le tinā o lana tane le tagata na ia galue ai; ua ia faapea atu: “O le igoa o le tagata na ou galue ai i le asō, o Poasa.”
20 Ona fai mai lea o Naomi i le avā a lana tama: “Ia faamanuia o ia e Ieova, o lē e alofa faamaoni pea i ē o ola ma ē ua oti.”+ Ua fai mai foʻi Naomi iā te ia: “E tatou te aiga ma le tamāloa.+ O ia o se tasi e toe faatauina* i tatou.”+
21 Ua faapea atu foʻi Ruta le fafine Moapi: “Na fai mai foʻi o ia iā te aʻu, ‘Ia e faalatalata atu pea i a‘u auauna talavou, seʻia o latou faauma laʻu seleselega atoa.’”+
22 Ona fai mai lea o Naomi iā Ruta le avā a lana tama: “Laʻu tama e, e sili atu ona tou ō faatasi ma ana auauna fafine, ina neʻi faileagaina oe i se isi fanua.”
23 Ua faalatalata atu pea o ia i auauna fafine a Poasa e ao mai mea, seʻia uma le seleselega o karite+ ma le seleselega o saito. Ua faaauau foʻi ona nofo o ia ma le tinā o lana tane.+
Faamatalaga Pito i Lalo
^ Pe atonu “fusi karite.”
^ Po o le “faalavelave.”
^ Po o “se taui atoatoa.”
^ Epe., “tautala mai i le loto o.”
^ Pe atonu “fusi karite.”
^ Po o “o se tasi o tatou tauaiga e iai le aiā e toe faatauina (laveaʻi) i tatou.”
