Ua molia Iesu e nisi tagata Iutaia i le solia o le Sapati, ona ua ia faamālōlōina ai se tamāloa. O lea ua ia fetalai atu ai: “O loo galue loʻu Tamā e oo mai i le aso nei, ma o loo oʻu galue foʻi.”—Ioane 5:17.

O le gaoioiga o loo faia e Iesu, e lē o faasāina i le tulafono a le Atua e faatatau i le Sapati. O lana galuega o le talaʻi atu ma le faia o faamālōlōga, o se faaataga lenā o galuega lelei a le Atua. O lea, ua faaauau ai ona faia e Iesu galuega lelei i aso taʻitasi. Ae ua atili ai ona feita i latou na molia Iesu i lana tali sa avatu, ma ua latou taumafai ai e fasioti o ia. Aiseā ua feita ai nei tagata?

Ua iā i latou le manatu sesē e faapea ua solia e Iesu le Sapati e ala i le faamālōlōina o tagata. Ua latou feita foʻi i le faapea mai o Iesu o ia o le Alo o le Atua, ona i o latou manatu e tusa o lea ua upuleaga Iesu i le Atua, ma e peiseaʻī ua faapea atu Iesu e tutusa o ia ma le Atua. Ae e lē o fefe ai Iesu, ma ua ia fetalai atu e faatatau i lana faiā faapitoa ma le Atua e faapea: “E alofa faapelepele le Tamā i le Atalii ma faailoa mai iā te ia mea uma ua ia faia.”—Ioane 5:20.

O le Tamā o le Foaʻi Ola lea, ma na ia faamaonia lenā tulaga i le taimi ua teʻa, e ala i le foaʻi atu i ni tane o le mana e toe faatutūina ai ē ua feoti. Ua fetalai atili Iesu: “E pei ona toe faatūina e le Tamā o ē ua oti i le ola, e faapena foʻi ona toe faaolaina e le Atalii o ē ua ia loto i ai.” (Ioane 5:21) Maʻeu le tāua o lenei fetalaiga, ona ua maua ai se faamoemoe mo le lumanaʻi! E oo lava i le taimi lea, o loo faatutūina e le Atalii ē ua feoti faaleagaga. O lea ua fetalai atu ai Iesu: “O lē e faalogo i aʻu upu ma talitonu i lē na auina mai aʻu, e ola o ia e faavavau. E lē faamasinoina foʻi o ia, a ua oo ina maua le ola, e ui sa oti.”—Ioane 5:24.

E lē o iai se faamaumauga e iloa ai ua toe faatūina e Iesu se tagata mai i le oti i le taimi lea. Peitaʻi, ua ia fetalai atu iā i latou ua molia o ia e faapea, o le a iai moni lava le toetū: “E oo mai le itula e faalogo ai i latou uma o loo i tuugamau i lona leo, ma latou ō mai ai.”—Ioane 5:28, 29.

E ui lava i le tāua o le matafaioi a Iesu, ae ua ia faailoa mai ma le manino e sili atu le Atua nai lo o ia e faapea: ʻOu te lē faia se mea i loʻu lava loto; auā ou te lē faia le mea ou te loto i ai, a o le finagalo o lē na auina mai aʻu.’ (Ioane 5:30) Ua faamatala foʻi e Iesu le tāua o lana matafaioi i le faataunuuina o le finagalo o le Atua, o se mea e na te leʻi faamatalaina muamua atu i luma o le lautele. Peitaʻi, e lē na o faamatalaga ua ia faia e faatatau iā te ia ua faamaonia ai po o ai moni o ia, ma po o ā foʻi ana galuega o le a fai. Ua ia faamanatu atu i ē o loo molia o ia: “Ua outou aauina atu tagata iā Ioane [le Papatiso], ma ua molimau o ia i le upu moni.”—Ioane 5:33.

Pe ā ma le lua tausaga ua mavae, atonu na faalogo ai i latou o loo molia Iesu, e faatatau i le faamatalaga a Ioane le Papatiso i taʻitaʻi lotu Iutaia e uiga i Lē e mulimuli atu iā te ia, o lē na taʻua o “Le Perofeta” ma “le Keriso.” (Ioane 1:20-25) Ua faamanatu atu e Iesu i ē ua molia o ia, le auala na latou faatāua ai Ioane lea ua faafalepuipuiina nei e faapea: “Ua outou loto e matuā olioli i lona malamalama mo sina taimi.” (Ioane 5:35) Peitaʻi, e iai se isi molimau e sili atu e faatatau iā Iesu, nai lo o le molimau a Ioane le Papatiso.

Ua fetalai Iesu: “O galuega ia o loo oʻu faia [e aofia ai le faamālōlōga lea faatoʻā uma ona ia faia], . . . ua fai ma molimau iā te aʻu e faapea, na auina mai aʻu e loʻu Tamā.” Ua ia fetalai atili atu: “Ua molimau foʻi le Tamā o lē na auina mai aʻu e faatatau iā te aʻu.” (Ioane 5:36, 37) O se faataʻitaʻiga, na molimau le Atua e faatatau iā Iesu i le taimi o lona papatisoga.—Mataio 3:17.

O le mea moni, e leai se māfuaaga mo ē ua molia Iesu e latou te teena ai o ia, auā e anoanoaʻi faamaoniga e faatatau iā Iesu o loo i Tusitusiga Paia o loo latou suʻesuʻeina. Ua fetalai atu Iesu iā i latou: “Afai ua outou talitonu iā Mose, tou te talitonu foʻi la iā te aʻu, auā na ia tusi e faatatau iā te aʻu. Ae afai tou te lē talitonu i ana tusitusiga, e faapefea la ona outou talitonu i aʻu upu?”—Ioane 5:46, 47.