I le avea ma Molimau a Ieova, e matou te galulue e atiaʻe e lē gata o o matou lava aiga, ae faapea foʻi isi aiga. E matou te faaaloalo i le Atua, o Lē na foafoaina aiga. (Kenese 2:​21-​24; Efeso 3:​14, 15) I le Tusi Paia, o loo aumaia ai e le Atua ni mataupu silisili e fesoasoani i tagata uma ina ia maua ni faaipoipoga fiafia ma tumau.

 E matou te faia le mea sili e usitaʻia ai fautuaga mai i le Tusi Paia, auā e fesoasoani iā i matou i le avea ai o ni tane, avā, ma mātua e taulau. (Faataoto 31:10-​31; Efeso 5:22–6:4; 1 Timoteo 5:8) E mafai foʻi e le atamai mai i le Tusi Paia ona fesoasoani i se aiga e eseese tapuaʻiga a ona sui, ina ia taulau manuia. (1 Peteru 3:​1, 2) Seʻi mātau faamatalaga nei a ni tagata e lē o ni Molimau a Ieova, ae ua avea a latou paaga ma Molimau a Ieova:

•   “Na tele ina ma tauupu ma femisaaʻi i uluaʻi tausaga e ono o la maʻua faaipoipoga. Peitaʻi, ina ua avea Ivete ma Molimau a Ieova, sa atili ai loa ona ia faaalia uiga alofa ma le onosaʻi. O suiga na ia faia na tumau ai la maʻua faaipoipoga.”​—Clauir, mai Pasili.

•   “Na ou tetee ina ua suʻesuʻe e laʻu tane o Chansa le Tusi Paia ma Molimau a Ieova, ona sa ou manatu e lepetia e Molimau a Ieova le filemu o aiga. Ae talu mai lenā taimi, na ou vaaia ai na fesoasoani moni lava le Tusi Paia i la maʻua faaipoipoga.”​—Agness, mai Zambia.

 I le talaʻiga, e matou te faailoa atu i isi le auala e mafai ai i le faatatauina o le atamai mai i le Tusi Paia, ona fesoasoani iā i latou ina ia

•   Filifili ai ma le atamai se paaga faaipoipo

•   Taulau manuia ai i le uluaʻi tausaga o le faaipoipoga

•   Feagai ai ma mātua o taʻitoʻalua

•   Fuafua tatau tupe

•   ʻAlofia ai le tauupu

•   Iloa ai faamagalo atu

•   Tausia aʻe se fanau

 O le mea moni, e iai taimi e tulaʻi mai ai feeseeseaʻiga. O se faataʻitaʻiga, i le 1998, na faia ai e le kamupani o le Sofres se suʻesuʻega i faaipoipoga a i latou e Molimau a Ieova se tasi o a latou paaga. Na iloa mai i le suʻesuʻega e 1 mai i le 20 o na faaipoipoga na iai ni faafitauli matuiā, ina ua liulotu le isi paaga e avea ma Molimau.

 Na valoia e Iesu o i latou e mulimuli i ana aʻoaʻoga o le a iai taimi e feagai ai ma teteega mai i o latou aiga. (Mataio 10:32-​36) Na mātauina e le tusitala o talafaasolopito o Will Durant, i le pulega a le Emepaea o Roma, “na tuuaʻia ai le faa-Kerisiano i le feeseeseaʻi ai o aiga,” a ma o loo feagai foʻi nisi o Molimau i aso nei ma lenā lava tuuaʻiga. Po o lona uiga la, o Molimau a Ieova lea e māfua ai feeseeseaʻiga i aiga?

 I se faaiʻuga na faia i se mataupu na tuuaʻia ai Molimau a Ieova i le faamalepe aiga, na taʻua ai e le Faamasinoga o Aiā Tatau i Europa e faapea, e masani lava o tauaiga e lē o ni Molimau e māfua ai feeseeseaʻiga. E latou te lē “talia pe amanaʻia le saʻolotoga a lo latou tauaiga, e filifili ai lana lava tapuaʻiga.” Na taʻua atili e le faamasinoga: “O se tulaga masani lenei e tupu i aiga e eseese tapuaʻiga a le ulugalii, ma e aofia ai foʻi ma Molimau a Ieova.” b Peitaʻi, e tusa pe e feagai Molimau a Ieova ma teteega mai i lotu, ae e latou te taumafai malosi e mulimuli i le fautuaga mai i le Tusi Paia: “Aua le taui atu le leaga i le leaga i se tasi. . . . Afai e mafai iā te outou, ia nonofo filemu ma tagata uma.”​—Roma 12:17, 18.

 E usitaʻi Molimau i le faatonuga a le Tusi Paia ina ia faaipoipo e “tau lava o lē ua i le Alii,” po o ē e tutusa o latou talitonuga. (1 Korinito 7:​39) O lenei faatonuga e faale-Tusi Paia ma e aogā foʻi. O se faataʻitaʻiga, i le 2010, na taʻua ai i se mataupu i le Journal of Marriage and Family, ‘⁠o se ulugalii e tutusa la laʻua tapuaʻiga ma talitonuga,’ e foliga mai e sili atu ona lelei ma māfana la laʻua faiā faaleulugalii. c

 Peitaʻi, e lē faalaeiauina e Molimau a Ieova o latou tagata tapuaʻi e tuua a latou paaga faaipoipo e lē o ni Molimau. Ua faapea mai le Tusi Paia: “Afai e iai se uso e iai sana avā e lē talitonu, ma ua lotomalie lana avā e nonofo pea ma ia, aua neʻi tuua e ia lana avā; afai foʻi e iai se fafine e iai sana tane e lē talitonu, ma ua lotomalie lana tane e nonofo pea ma ia, aua neʻi tuua e ia lana tane.” (1 Korinito 7:​12, 13) E usiusitaʻi Molimau a Ieova i lenei faatonuga.