E leai. E matou te talaʻi mai i lea fale i lea fale e lē aunoa, ae e matou te lē talitonu e matou te maua le faaolataga pe afai e matou te talaʻi. (Efeso 2:8) Aiseā?

 Seʻi mafaufau i le faatusatusaga lenei: Seʻi faapea na folafola atu e se tamāloa agaalofa se meaalofa taugatā i tagata uma, e ō atu i se nofoaga patino i se taimi patino. Pe afai e te talitonu moni i lenā folafolaga, po o le a e usitaʻia ana faatonuga? E mautinoa o le tulaga lenā. O le a e taʻuina atu foʻi i au uō ma aiga e faatatau i lenā mea, ina ia latou maua ai foʻi faamanuiaga. Po o le ā lava le tulaga, e te lē maua le meaalofa e ala i le usitaʻia o faatonuga a lenā tamāloa. Na e maua lenā meaalofa, ona sa manaʻo le tamāloa e avatu iā te oe.

 I se tulaga talitutusa, e talitonu Molimau a Ieova i le folafolaga a le Atua o le ola e faavavau mo i latou uma e usiusitaʻi iā te ia. (Roma 6:23) E matou te taumafai malosi e faailoa atu o matou talitonuga i isi, ma faamoemoe o le a latou maua aogā mai i folafolaga a le Atua. Ae e matou te lē talitonu e maua lo matou faaolataga i le faia o le galuega talaʻi. (Roma 1:17; 3:28) O le mea moni, e leai se gaoioiga e mafai ona fai e se tasi ina ia maua ai lenā faamanuiaga matagofie mai i le Atua. “Ua ia faasaoina i tatou ona o lona alofa mutimutivale, ae e lē ona o mea lelei na tatou faia.”—Tito 3:5, Contemporary English Version.