E talitonu Molimau a Ieova, e fesoasoani mataupu silisili ma faatonuga o loo i le Tusi Paia, e faia ai filifiliga e lē gata e faafiafia ai le Atua, ae e aogā foʻi mo i tatou. (Isaia 48:17, 18) E matou te leʻi faia nei mataupu silisili ma faatonuga, ae e matou te ola ai. Iloilo pe faapefea ona fesootaʻi atu nisi o na mataupu silisili ma faatonuga, i tuugātala. a

•   O le faaipoipoga o se faatasiga tumau. (Mataio 19:6) Talu ai e vaai Molimau a Ieova i tuugātala o se laasaga e oo atu ai i le faaipoipoga, e matou te manatu mamafa ai la i tuugātala.

•   O tuugātala e mo na o i latou ua talafeagai le matutua e faaipoipo ai. O i latou ia ua ʻteʻa le malaulau o le talavou,’ pe ua lē toe malolosi faanaunauga taufeusuaʻiga.​—1 Korinito 7:​36.

•   O i latou e tuutala, e tatau ona saʻoloto e faaipoipo. E iai nisi ua tatala faaletulafono a latou faaipoipoga, ae e lē o saʻoloto e toe faaipoipo i le silafaga a le Atua, ona e na o le pau le māfuaaga e mafai ai ona tatala se faaipoipoga, o le faia o amioga lē mama taufeusuaʻiga.​—Mataio 19:9.

•   Ua faatonuina Kerisiano e mananaʻo e faaipoipo, ina ia filifili tau lava o ē latou te tapuaʻi faatasi. (1 Korinito 7:​39) E manatu Molimau a Ieova, o lenei faatonuga e lē o faasino atu i so o se tasi e faaaloalo i o matou talitonuga, ae o se tasi e talitonu ma faatatauina na talitonuga, ua uma ona papatiso o se Molimau a Ieova. (2 Korinito 6:​14) Na faatonuina e le Atua mai i le amataga ona tagata tapuaʻi ina ia faaipoipo tau o lē e tutusa o la talitonuga. (Kenese 24:3; Malaki 2:​11) Ua faamaonia e tagata suʻesuʻe i aso nei, o loo aogā pea lenā faatonuga. b

•   E tatau ona usiusitaʻi fanau i mātua. (Faataoto 1:8; Kolose 3:​20) Mo le fanau o loo nonofo faatasi ma mātua, e aofia ai foʻi i lenei faatonuga le usiusitaʻi i mātua i filifiliga e faatatau i tuugātala. E ono aofia ai le matua e tatau ona faia ai se tuugātala, ma po o ā gaoioiga e faataga i latou e faia.

•   E filifili Molimau pe e faia se tuugātala, ma po o ai e tatau ona faauō i ai, ae ia ōgatusa ma taʻiala faale-Tusi Paia. Ua fetaui lelei ma le mataupu silisili: “E tauave e le tagata lava ia lana avega.” (Kalatia 6:5) Peitaʻi, pe a oo i le mataupu o tuugātala, e saʻili atu le toʻatele i fautuaga a Molimau taʻumatuaina, o ē e naunau i le mea e sili ona lelei mo i latou.​—Faataoto 1:5.

•   O le tele o gaoioiga e masani ona faia i taimi o tuugātala, o ni agasala matuiā. Mo se faataʻitaʻiga, ua faatonuina i tatou e le Tusi Paia ina ia ʻalofia amioga lē mama taufeusuaʻiga. E aofia ai feusuaʻiga ma isi amioga lē mamā i le vā o ni tagata e leʻi faaipoipo, e pei o le lotelote o totoga sā o le isi tagata, po o feusuaʻiga e faaaogā ai le gutu ma le alāfeʻau. (1 Korinito 6:​9-​11) E oo lava i amioga e faagaee ai faalogona taufeusuaʻiga, o ni ʻamioga lē mamā’ e lē faafiafiaina ai le Atua, e tusa lava pe e lē o faia feusuaʻiga. (Kalatia 5:​19-​21) O talanoaga lē mamā foʻi e aofia ai “upu masoā” e taʻusalaina e le Tusi Paia.​—Kolose 3:8.

•   O le loto po o le tagata lilo i totonu, e faaʻoleʻole. (Ieremia 17:9) E mafai ona taʻitaʻia ai se tasi e faia mea e na te iloa e sesē. Ina ia puipuia nisi o loo tuutala mai i le taʻitaʻisesēina e o la loto, e tatau ona ʻalofia le iai na o i laʻua i nofoaga e ono faaosoosoina ai. E la te ono filifili e puipuia la laʻua faigāuō e ala i le tafafao faatasi ma aumea lelei, po o se tagata talafeagai e latou te toʻatolu. (Faataoto 28:26) E amanaʻia e Kerisiano nofofua o loo saʻili ni paaga faaipoipo le lamatiaga o le faaaogāina o tuatusi i le initaneti mo tuugātala, aemaise lava le atiaʻe o se faiā ma se tagata e na te lē iloa lelei.​—Salamo 26:4.