Pe e Faamalosia e Molimau a Ieova Tagata e Sui a Latou Lotu?

PLAY

E leai. Na matou taʻua i la matou mekasini autū o Le Olomatamata: “E sesē le faamalosia o tagata e suia a latou lotu.” a O māfuaaga nei e matou te ʻalofia ai le faamalosia o tagata:

E leʻi faamalosia e Iesu tagata ina ia talia ana aʻoaʻoga. Na ia silafia e toʻaitiiti i latou o le a talileleia lana feʻau. (Mataio 7:13, 14) Ina ua tausuai nisi o ona soo i ana fetalaiga, na ia tuu atu i latou e ō nai lo o le faamalosia o i latou e nonofo.—Ioane 6:60-62, 66-68.
Na aʻoaʻoina e Iesu ona soo ina ia aua neʻi faamalosia isi e sui o latou talitonuga. Nai lo o le taumafai e faamalosia tagata ina ia talia le tala lelei o le Malo, sa tatau i ona soo ona saʻili i latou e talilelei mai i le feʻau.—Mataio 10:7, 11-14.
E leai se aogā o le faamalosia o se tasi e sui lana lotu, talu ai e na o le tapuaʻiga e sau mai i le loto e talia e le Atua.—Teuteronome 6:4, 5; Mataio 22:37, 38.

Pe e faia le matou galuega talaʻi ina ia suia ai lotu a tagata?

E moni e matou te faailoa atu le feʻau o loo i le Tusi Paia i “tuluʻiga uma o le lalolagi,” e ala i le faia i le “lautele, ma mai i lea fale i lea fale” e pei ona faatonuina i le Tusi Paia. (Galuega 1:8; 10:42; 20:20) I le pei foʻi o uluaʻi Kerisiano, e iai taimi e tuuaʻia ai i matou ona o le sui o lotu a tagata e ala i faiga faasolitulafono. (Galuega 18:12, 13) Peitaʻi e sesē na tuuaʻiga. E matou te lē taumafai e faamalosia isi ina ia talia o matou talitonuga. Nai lo o lea, e matou te talitonu e iai i tagata le aiā e aʻoaʻoina ai le poto saʻo, ina ia mafai ona fai a latou lava filifiliga.

E matou te lē faamalosia tagata e sui a latou lotu, pe e faaaogā foʻi le lotu e faaauala mai ai gaoioiga faapolotiki, pe avatu meafaitino po o tulaga maualuluga ina ia maua ai ni sui fou. E tuufaafeagai lea ma gaoioiga a nisi o ē faapea mai o i latou o ni Kerisiano, ae e latou te lē o faamamaluina Keriso e ala i le faia o na mea. b

Pe e iai i le tagata le aiā e sui ai lana lotu?

Na tuua e le perofeta o Aperaamo le tapuaʻiga a ona tauaiga

Ioe, ua faaalia mai i le Tusi Paia e iai i tagata le aiā e sui ai a latou lotu. O loo faamatalaina ai le toʻatele o ē na filifili e lē mulimuli i le ituaiga o tapuaʻiga sa faia e o latou tauaiga, ma na latou lotomalilie e tapuaʻi i le Atua moni. O Aperaamo, Ruta, nisi o tagata o Atenai, ma le aposetolo o Paulo, ua na o nisi nei o faataʻitaʻiga. (Iosua 24:2; Ruta 1:14-16; Galuega 17:22, 30-34; Kalatia 1:14, 23) Ua faailoa manino mai foʻi i le Tusi Paia, o le aiā a le tagata le faia o se filifiliga lē atamai ina ia tuua le tapuaʻiga e finagalo malie i ai le Atua.—1 Ioane 2:19.

O le aiā e sui ai le lotu a se tasi, o loo lagolagoina e le Faasilasilaga Aoao mo Tagata Uma i Aiā Tatau a Tagata Soifua (Universal Declaration of Human Rights), lea ua taʻua e Malo Aufaatasi “o le faavae o le tulafono o aiā tatau a tagata uma.” O loo faamatalaina i lenā faasilasilaga e iai i tagata uma “le saʻolotoga e suia ai lana lotu po o talitonuga” ma “saʻili, maua mai ma faailoa atu faamatalaga ma manatu,” e aofia ai manatu faalelotu. c Ae i le taimi e tasi, o loo aofia ai i nei aiā le tiute tauave ina ia faaaloalo i aiā tatau a isi, e tumau i o latou talitonuga ma tetee atu i manatu e latou te lē ioe i ai.

Pe e taʻuvalea tū po o aganuu a le aiga i le suia o le lotu a se tasi?

E lē o le tulaga lea e tatau ona iai. O loo uunaʻia e le Tusi Paia ina ia āva i ituaiga uma o tagata, e tusa lava po o le ā la latou tapuaʻiga. (1 Peteru 2:17) E lē gata i lea, e usitaʻia foʻi e Molimau a Ieova le poloaʻiga a le Tusi Paia ina ia āva i o latou mātua, e tusa pe ese o latou talitonuga.—Efeso 6:2, 3.

Peitaʻi e lē o tagata uma e ioe i le manatu o le Tusi Paia. Ua faapea mai se fafine na ola aʻe i Zambia: “I le vaipanoa na ou ola aʻe ai, o le suia o le tapuaʻiga a se tasi . . . e manatu i ai o se gaoioiga o le lē faamaoni, o le faalataina e se tasi o lona aiga ma lona vaipanoa.” Na feagai lenei fafine ma lea faafitauli i le taimi a o talavou, ina ua faatoʻā amata ona ia suʻesuʻeina le Tusi Paia ma Molimau a Ieova, ma e leʻi umi ae filifili o ia e sui lana lotu. Ua ia faapea mai: “Na faaauau pea ona fai mai oʻu mātua, ua la matuā lē fiafia iā te aʻu ma ua ou faalumaina i laʻua. Na ou iloa le faigatā o lenei mea, ona sa matuā tāua iā te aʻu le maliega mai oʻu mātua. . . . O le filifili ina ia faamaoni iā Ieova nai lo o tū faalotu, e lē uiga ai ua ou lē faamaoni i loʻu aiga.” d

a Tagaʻi i le lomiga o Le Olomatamata o Ianuari 1, 2002, i le itulau e 12, palakalafa e 15.

b O se faataʻitaʻiga, pe tusa o le tausaga e 785 T.A., na faatonuina ai e Charlemagne le faasalaina i le oti o tagata i Saxony o ē e lē mananaʻo e papatisoina o ni Kerisiano. Na sainia foʻi i le 1555 T.A. le feagaiga e taʻua o le Peace of Augsburg, i le va o ni vaega faalelotu se lua i le Emepaea Paia o Roma na fetauaʻi. Na faailoa mai i lenei feagaiga, o so o se tasi e pule i se vaipanoa e tatau ona lotu Katoliko Roma po o le lotu Luteru, ma e tatau i tagata uma i lenā vaipanoa ona suia lana lotu i le lotu a le taʻitaʻi. O i latou na lē mananaʻo e suia a latou lotu, sa tatau ona faateʻa ese mai i lenā vaipanoa.

c E taitutusa nei aiā tatau ma aiā tatau o loo aumaia i le African Charter on Human and Peoples’ Rights, le American Declaration of the Rights and Duties of Man, le Arab Charter on Human Rights o le 2004, le ASEAN (Association of Southeast Asian Nations) Human Rights Declaration, le European Convention on Human Rights, ma le International Covenant on Civil and Political Rights. Peitaʻi e oo lava i atunuu o loo faapea mai e latou te tausia nei aiā tatau, e fesuisuiaʻi auala o loo latou faatatauina ai nei aiā tatau.

d I le Tusi Paia, o Ieova o le suafa lea o le Atua moni.