Sa nonofo Madián ma Marcela Medellín i Kolomepia, ma na sologa lelei o la olaga. O le lelei o le totogi o le galuega a Madián, na mafai ai ona la nonofo i se fale mautotogi matagofie. Ae na iai se mea na uunaʻia ai i laʻua e toe iloilo mea e tatau ona faamuamua i o la olaga, o ni auauna a Ieova le Atua. Ua la faapea mai: “I le 2006, na ma auai ai i le aso faapitoa o fonotaga na faamatuaina, ʻIa Lelei Ou Mata.’ Na faamatilatila i le tele o lauga le tāua o le faafaigofie o o tatou olaga, ina ia auauna atoatoa ai i le Atua. Ina ua uma le fonotaga, na ma iloa ai e ma te lē o faia lenā mea. E tele naʻuā mea na ma faatauina, ma tau totogi le tele o aitalafu.”

 O lauga na faia i lenā fonotaga, na iloa ai e Madián ma Marcela e manaʻomia ona faafaigofie o la olaga. Ua la faapea mai: “Na amata ona faaitiitia ma tupe faaalu. Na ma siitia i se tamaʻi fale mautotogi, faatau ese le ma taavale, ae faatau mai se pasika.” E la te leʻi toe ō foʻi i ni faleoloa tetele, ina ia lē faaosoosoina ai i laʻua e faatau le tele o mea. Na la faaalu le tele o le taimi e faasoa atu ai i o la tuaoi e faatatau i le Tusi Paia. Sa la faatasitasi foʻi ma a la uō, o ni paeonia faapito a o loo auauna maelega iā Ieova le Atua.

 E leʻi umi ae filifili loa Madián ma Marcela e faalautele atu le la auaunaga, e ala i le siitia i se tamaʻi faapotopotoga i se nuu maotua o loo tele ai le manaʻoga. O lea, na faamavae ai Madián mai i lana galuega. Na manatu lona pule e lē atamai lenā faaiʻuga. Ae na faapea atu Madián i lona pule, “E tele tupe e te maua, ae po o e fiafia?” Na ia taʻutino mai e leai, auā e tele faafitauli o loo ia fesagaʻia. O lea na faapea atu ai Madián iā te ia: “E lē tāua le tele o tupe, ae o le auala e te maua ai le fiafia moni. Ua ma maua ma laʻu avā le fiafia i le aʻoaʻoina o tagata e faatatau i le Atua, ma e ma te mananaʻo ina ia faateleina lo ma fiafia, e ala i le faaalu o le tele o le taimi i lenā galuega.”

 Ua maua e Madián ma Marcela se olaga e fiafia ma faamalieina moni, ona o le saʻilia o sini faaleagaga. Ua silia ma le 13 tausaga o la auauna i le mea o loo tele ai le manaʻoga, i faapotopotoga i le itu i mātū i sisifo o Kolomepia. O loo la olioli nei i le faaeaga o le auauna o ni paeonia faapito.