CHIDZIDZO 35
Zvatingaite Kana Tichifanira Kusarudza Zvekuita
Tese tine zvatinofanira kusarudza muupenyu. Zvakawanda zvacho zvinogona kutibatsira kana kutikanganisa uye zvinogona kubatabata ushamwari hwedu naJehovha. Zvimwe zvezvinhu zvatinosarudza zvingasanganisira nyaya dzakadai sekwekugara, basa ratingaita, uye kuroora kana kuroorwa. Tikasarudza zvakanaka, tinogona kuva neupenyu hunofadza uye tinofadzawo Jehovha.
1. Bhaibheri ringakubatsira sei kuti usarudze zvakanaka?
Usati wasarudza zvekuita, nyengetera kuna Jehovha uchikumbira kuti akubatsire, woongorora Bhaibheri kuti uone kuti anoona sei nyaya yacho. (Verengai Zvirevo 2:3-6.) Pamwe pacho Jehovha anenge akapa mutemo wakajeka. Pakadaro kungotevedzera mutemo iwoyo ndiko kuchenjera.
Ko kana pasina mutemo wakajeka wemuBhaibheri unokuudza zvekuita? Kunyange ipapo Jehovha “anokutungamirira munzira yaunofanira kufamba nayo.” (Isaya 48:17) Anozviita sei? Panogona kunge paine dzimwe pfungwa dziri muBhaibheri dzinogona kukutungamirira kunyange pasina mutemo chaiwo. Dzinogona kutibatsira kuona mafungiro aJehovha uye kuti anonzwa sei nezveimwe nyaya. Kazhinji tinodzidza kuti Mwari anonzwa sei nezveimwe nyaya patinoverenga zvakamboitika zvakanyorwa muBhaibheri. Kana tava kunzwisisa kuti Jehovha anoona sei nyaya yacho tinogona kubva tasarudza zvinomufadza.
2. Tinofanira kufunga nezvei tisati tasarudza zvekuita?
Bhaibheri rinoti: “Munhu ane njere anofungisisa nhanho imwe neimwe.” (Zvirevo 14:15) Izvi zvinoreva kuti tisati tasarudza, tinofanira kuzvipa nguva yekunyatsofunga kuti toita zvipi. Paunenge uchiongorora chimwe nechimwe chezvaunogona kuita, zvibvunze kuti: ‘Bhaibheri rinotii nezvazvo? Ndezvipi zvandingasarudza zvandisingazodembi? Zvandichasarudza zvichabatsira sei vamwe kana kuvakanganisa?’ Uye mubvunzo unokosha pane mimwe yese ndewekuti, ‘Zvichaita kuti Jehovha afare here?’—Dheuteronomi 32:29.
Jehovha ane kodzero yekutiudza kuti ichi chakanaka, ichi chakaipa. Kana tikajairana nemafungiro aJehovha, tiine shungu dzekuatevedzera, tinenge tichidzidzisa hana yedu. Hana zvinoreva pfungwa iri matiri yekusiyanisa zvakanaka nezvakaipa. (VaRoma 2:14, 15) Hana yakadzidziswa inotibatsira kusarudza zvakanaka.
WEDZERA KUONGORORA
Wedzera kuongorora kukosha kwazvinoita kuti tizive mafungiro aJehovha tichishandisa Bhaibheri uye kuti tive nehana yakadzidziswa patinenge tichida kuona kuti tosarudza zvipi.
3. Tungamirirwa neBhaibheri
Bhaibheri ringatitungamirira sei pakusarudza zvekuita? Ngationei VHIDHIYO, tobva takurukura mibvunzo inotevera.
-
Chii chinonzi rusununguko rwekusarudza?
-
Nei Jehovha akatipa rusununguko rwekusarudza?
-
Akatipa chii kuti atibatsire kushandisa rusununguko rwedu rwekusarudza zvakanakisisa?
Kuti tione muenzaniso wekushanda kunoita Bhaibheri kana pasina mutemo wakanyatsonyorwa ngativerengei VaEfeso 5:15, 16 tobva takurukura kuti ‘tingashandisa sei nguva yedu nekuchenjera’ . . .
-
pakugara tichiverenga Bhaibheri.
-
pakuva murume kana kuti mudzimai akanaka, mubereki akanaka, kana kuti mwana akanaka.
-
pakupinda misangano.
4. Dzidzisa hana yako kuti ikubatsire pakusarudza
Kana paine mutemo wakajeka unobva muMagwaro, zviri nyore kusarudza zvekuita. Asi ko kana pasina mutemo wakadaro? Ngationei VHIDHIYO, tobva takurukura mubvunzo unotevera.
-
Muvhidhiyo iyi, matanho api akatorwa nehanzvadzi iyi kuti idzidzise hana yayo uye kuti isarudze zvinofadza Jehovha?
Nei tisingafanire kubvunza vamwe kuti toita sei panyaya dzatinenge tichifanira kusarudza tega? Verengai VaHebheru 5:14, mobva makurukura muchishandisa mibvunzo iyi:
-
Kunyange zvazvo zvichiita sezviri nyore kubvunza vamwe kuti vatisarudzire zvekuita, iwe pachako unofanira kukwanisa kusiyanisa chii?
-
Chii chatiinacho chaunokwanisa kushandisa pakudzidzisa hana yako kuti ukwanise kusarudza?
Hana yedu yakafanana nemepu; inotibatsira kusarudza kuti toenda kupi muupenyu
5. Fungawo nezvehana dzevamwe
Vanhu havasarudze zvakafanana. Tingaratidze sei kuti tinoremekedza hana dzevamwe? Ona mienzaniso miviri:
Muenzaniso wekutanga: Imwe hanzvadzi inofarira zvekupoda-poda inotamira kuungano ine hanzvadzi dzakawanda dzinoshora nyaya yacho.
Verengai VaRoma 15:1 uye 1 VaKorinde 10:23, 24, mobva makurukura muchishandisa mibvunzo iyi:
-
Tichishandisa mavhesi aya, hanzvadzi iyi inogona kuita sei? Ungaita sei paunenge uine munhu ane hana inomurambidza kuita chimwe chinhu chaunoona hana yako ichikubvumira kuita?
Muenzaniso wechipiri: Imwe hama inoziva kuti Bhaibheri harirambidze kunwa doro zvine mwero, asi inosarudza kusanwa. Anokokwa kumabiko oona hama dzichinwa.
Verengai Muparidzi 7:16 uye VaRoma 14:1, 10, mobva makurukura muchishandisa mibvunzo iyi:
-
Tichishandisa mavhesi aya, hama iyi inogona kuita sei? Ungaita sei kana ukaona mumwe munhu achiita chimwe chinhu chaunoona hana yako isingakubvumire kuita?
Matanho api atinofanira kutora kuti tizosarudza zvakanaka?
1. Kumbira Jehovha kuti akubatsire kusarudza zvekuita.—Jakobho 1:5.
2. Tsvakurudza muBhaibheri nemumabhuku anotsanangura Bhaibheri kuti unzwe mafungiro aMwari. Unogona kunzwawo pfungwa dzemumwe muKristu ava nenguva achinamata dzinogona kukubatsira pakusarudza.
3. Funga kuti kana wasarudza uchasara uchinzwa sei uye hana dzevamwe dzichanzwawo sei.
VAMWE VANOTI: “Ikodzero yako kuita zvaunoda. Zvekuti vamwe vanotii hazvina basa izvo.”
-
Nei tichifanira kufunga kuti Mwari uye vamwe vanhuwo vanonzwa sei nezvatinoita?
PFUPISO
Tichasarudza zvakanaka kana tikatanga taziva kuti Jehovha anonzwa sei nezveimwe nyaya, tozofunga kuti zvatichaita zvichabatsira vamwe here kana kuti zvichavakanganisa.
Kudzokorora
-
Ungasarudze sei zvinofadza Jehovha?
-
Ungadzidzisa sei hana yako?
-
Ungaratidze sei kuti unoremekedza hana dzevamwe?
WEDZERA PANE ZVAWADZIDZA
Ungasarudze sei zvinoita kuti ushamwari hwako naMwari husimbe?
“Ita Zvisarudzo Zvinokudza Mwari” (Nharireyomurindi, April 15, 2011)
Wedzera kunzwisisa kuti Jehovha anotipa sei mazano.
Ona zvakabatsira mumwe murume kusarudza pazvakanga zvakamuomera kuti oita zvipi.
Jehovha Anovimbisa Kuti Zvinhu Zvichatifambira Zvakanaka (5:46)
Wedzera kudzidza zvatingaita kuti tifadze Jehovha kunyange kana pasina mutemo wakanyatsojeka nezvenyaya inenge iripo.
“Unoda Murayiro weBhaibheri Nguva Dzose Here?” (Nharireyomurindi, December 1, 2003)
Zvimwe Zvaunogona Kufarira
MIBVUNZO INONYANYA KUBVUNZWA
Kosi yeBhaibheri Inoitiswa neZvapupu zvaJehovha Yakaita Sei?
Paunoita kosi yeBhaibheri inoitiswa neZvapupu zvaJehovha, unogona kushandisa chero Bhaibheri raunaro. Mhuri yako neshamwari vanogona kuvapowo paunenge uchidzidza.
