Mira: Sot po u ofroj të gjithëve këtë fletushkë. Titullohet A do të dish të vërtetën? Kjo është për ju.

Silvana: Flet për fenë?

Mira: Po. Në faqen e parë bëhen gjashtë pyetje. Cila prej tyre—

Silvana: E lëmë më mirë me kaq. Mos harxho kot kohën me mua.

Mira: Pse e thoni këtë?

Silvana: Të them të drejtën, nuk jam e sigurt as nëse besoj te Perëndia.

Mira: Të falënderoj për sinqeritetin. A mund të të pyes, gjithmonë kështu ke menduar?

Silvana: Në fakt, kur isha e vogël shkoja në kishë. Por kam shumë kohë që nuk shkoj më.

Mira: E kuptoj. Të prezantohemi, unë jam Mira.

Silvana: Silvana.

Mira: Gëzohem, Silvana.

Silvana: Gjithashtu.

Mira: Nuk kam ardhur për të të imponuar bindjet e mia. Por doja të dija: a ka ndodhur diçka që tani dyshon në ekzistencën e Perëndisë?

Silvana: Po. Para 17 vjetësh mamaja bëri aksident me makinë.

Mira: Sa keq! Pësoi gjë?

Silvana: Po, dhe që atëherë ka mbetur e paralizuar.

Mira: Më vjen keq! Duhet të jetë shumë e dhembshme për ty.

Silvana: Ashtu është. Prandaj nuk arrij ta kuptoj, nëse Perëndia ekziston, pse e lejoi një gjë të tillë? Pse lejon që të vuajmë?

Mira: Është më se normale të ndihesh kështu. Kur vuajmë, të gjithë pyesim pse ndodhi. Në fakt, edhe disa burra e gra besnike në kohët biblike bënë pyetje të tilla.

Silvana: Vërtet?

Mira: Po. A mund të të tregoj një shembull nga Bibla?

Silvana: Pse jo?!

Mira: Shih çfarë pyetjesh i bëri Perëndisë profeti besnik Habakuk. Te libri i Habakukut, kapitulli 1, vargjet 2 dhe 3 thuhet: «Deri kur, o Jehova, do të thërras për ndihmë dhe ti nuk do të më dëgjosh? Deri kur do të thërras për ndihmën tënde kundër dhunës e ti nuk do të më shpëtosh? Përse më bën të shoh të keqen?» A nuk të duken njësoj si pyetjet që bëre edhe ti?

Silvana: Po.

Mira: Perëndia nuk e qortoi kurrë Habakukun për këto pyetje, as nuk i tha që s’kishte besim sa duhej.

Silvana: Interesante.

Mira: Bibla na mëson se Perëndia i sheh vuajtjet tona dhe nuk është indiferent ndaj tyre.

Silvana: Çfarë do të thuash?

Mira: Ja të të tregoj një shembull te Dalja 3:7. A mund ta lexosh ti?

Silvana: Po. «Jehovai shtoi: ‘Pa dyshim e kam parë mundimin e popullit tim në Egjipt, dhe  kam dëgjuar si klithin për shkak të atyre që i shtrëngojnë të punojnë, sepse i di dhembjet që heqin.’»

Mira: Faleminderit! Sipas këtij shkrimi, a i sheh Perëndia vuajtjet e njerëzve?

Silvana: Me sa duket, po.

Mira: Dhe nuk është se thjesht ka një ide të përgjithshme të asaj që ndodh. Shihe edhe një herë pjesën e fundit të vargut. Perëndia tha: «I di dhembjet që heqin.» A të duken këto fjalët e një Perëndie të ftohtë ose indiferent?

Silvana: Jo, aspak.

Mira: Sigurisht, një gjë është të vëresh një situatë, por të prekesh prej saj, të përfshish ndjenjat në të, është një gjë krejt tjetër.

Silvana: E vërtetë.

Mira: Duke pasur parasysh këtë, të lexojmë për një rast tjetër kur populli i Perëndisë vuante. Gjendet tek Isaia 63:9. Pjesa e parë e këtij vargu thotë: «Ai vuajti për të gjitha vuajtjet e tyre.» Atëherë si thua, a nuk prekej Perëndia kur populli i tij vuante?

Silvana: Kështu duket.

Mira: E vërteta është, Silvana, se Perëndia interesohet jashtë mase për ne dhe nuk duron dot që ne vuajmë. Kur ne vuajmë, ai vuan me ne.

Mira: Para se të largohem, ka edhe diçka tjetër që dua të të tregoj.

Silvana: Çfarë?

Mira: Shiko çfarë thotë Bibla për fuqinë e Perëndisë. Më vjen ndër mend Jeremia 10:12. A mund ta lexosh të lutem?

Silvana: Patjetër. «Pra, Ai është Bërësi i tokës me fuqinë e tij, Ai që e ka bërë të patundshme me mençurinë e vet dhe Ai që shpalosi qiejt me kuptueshmërinë e tij.»

Mira: Faleminderit! Le të ndalemi për një moment te ky varg. A nuk i është dashur Perëndisë një fuqi e madhe për të krijuar universin e paanë dhe çdo gjë në të?

Silvana: Sigurisht.

Mira: Tani, nëse Perëndia ka fuqinë të krijojë çdo gjë që na rrethon, a nuk duhet të presim që të ketë fuqi edhe për ta mbajtur nën kontroll atë?

Silvana: Po.

Mira: Mendo pak për mamanë tënde. Pse të dhemb në shpirt kur e sheh që vuan?

Silvana: Sepse e dua. Është mamaja ime.

Mira: Po të kishe fuqinë e duhur, a nuk do ta shëroje?

Silvana: Sigurisht.

Mira: Mendo pak. Bibla na mëson se Perëndia e sheh që vuajmë, i vjen keq për ne dhe ka fuqi tejet të madhe. A e imagjinon dot sa shumë duhet të përmbahet Perëndia që të mos ndërhyjë për t’u dhënë fund menjëherë vuajtjeve tona?

Silvana: S’e kisha menduar ndonjëherë këtë.

Mira: Mos vallë ka arsye të forta pse nuk ka ndërhyrë akoma për t’u dhënë fund problemeve tona? *

Silvana: Hmm, ndoshta.

Mira: Dëgjoj që po të bie telefoni, prandaj po kthehem një ditë tjetër që të flasim më tepër për këtë.

Silvana: Faleminderit! Me gjithë qejf. *