Bibla nuk flet fare për Hallouinin, një festë e përvitshme që mjaft veta e festojnë më 31 tetor. Megjithatë, origjina e tij e lashtë dhe traditat për të bien në kundërshtim me mësimet e Biblës.

Në këtë artikull

•  Historia dhe traditat e Hallouinit

•  A duhet të na interesojë origjina pagane e Hallouinit?

•  Pse quhet Hallouin?

•   Samaini: Sipas një enciklopedie, Hallouini mund ta ketë zanafillën nga «festa e lashtë pagane që festonin keltët mbi 2.000 vjet më parë». Ajo vazhdon: «Keltët besonin se të vdekurit endeshin në mes të të gjallëve të asaj kohe. Gjatë festës së Samainit, të gjallët mund të takonin të vdekurit.» (The World Book Encyclopedia.)—Shih « Pse quhet Hallouin?»

•   Veshjet e Hallouinit, karamelet dhe «ëmbëlsira apo prapësira»: Sipas një burimi, disa keltë visheshin si fantazma ose lugatë në mënyrë që frymërat endacake «të mendonin se ishin si ata» dhe të mos u bënin keq. Disa të tjerë u ofronin ëmbëlsira frymërave për t’i qetësuar. a

   Në Evropën e mesjetës, kleri katolik përvetësoi zakonet pagane vendëse dhe u thoshte anëtarëve të kishës të shkonin nga shtëpia në shtëpi me veshje karakteristike dhe të kërkonin dhurata të vogla.

•   Fantazmat, vampirët, njerëzit-ujqër, shtrigat dhe kufomat e ngritura nga varri (zombi): Prej kohësh, njerëzit i kanë lidhur këto personazhe me botën e frymërave të liga. Libri Halloween Trivia u referohet këtyre krijesave si «monstra të mbinatyrshme» dhe thotë se ato janë «të lidhura ngushtë me vdekjen, me të vdekurit ose me frikën nga vdekja».

•   Kungujt e Hallouinit: Në Britaninë e mesjetës, «disa shkonin shtëpi më shtëpi duke kërkuar ushqim në këmbim të një lutjeje për të vdekurit» dhe mbanin në dorë «rrepa të gërryera me qiri brenda që nënkuptonte një shpirt të burgosur në purgator». (Halloween—From Pagan Ritual to Party Night) Disa historianë thonë se rrepat që ndriçonin, përdoreshin për të mbajtur larg frymërat e liga. Gjatë viteve 1800, në Amerikën e Veriut, rrepat u zëvendësuan nga kungujt sepse kishte me shumicë dhe gërryheshin e gdhendeshin kollaj.

 Po. Megjithëse disa e konsiderojnë Hallouinin si një festë të padëmshme, praktikat që lidhen me të, bien krejtësisht në kundërshtim me mësimet e Biblës. Hallouini bazohet në bindjet e rreme për të vdekurit dhe për frymërat e padukshme të njohura si demonë.

 Vini re vargjet e mëposhtme që tregojnë mendimin e Zotit për bindjet që lidhen me Hallouinin:

•   «Kurrë të mos gjendet midis jush ndonjë që . . . këshillohet me fantazmat a frymërat, ose pyet të vdekurit.»—Ligji i përtërirë 18:10, 11, The Jerusalem Bible.

   Kuptimi: Perëndia nuk i miraton ata që përpiqen të komunikojnë me të vdekurit e madje as ata që lënë përshtypjen sikur po komunikojnë me ta.

•   «Të vdekurit s’dinë asgjë.»—Eklisiastiu 9:5.

   Kuptimi: Të vdekurit janë të pavetëdijshëm, ndaj është e pamundur të komunikojnë me të gjallët.

•   «Unë nuk dua që ju të keni pjesë me demonët. Ju nuk mund të pini kupën e Zotit dhe kupën e demonëve.»—1 Korintasve 10:20, 21, Diodati i Ri i Rishikuar

   Kuptimi: Kush dëshiron të ketë miratimin e Zotit, duhet të shmangë çdo lloj lidhjeje me demonët.

•   ‘Qëndroni të patundur përballë intrigave të Djallit, sepse ne kemi një betejë me forcat e liga qiellore.’—Efesianëve 6:11, 12.

   Kuptimi: Të krishterët duhet t’u kundërvihen forcave të liga qiellore, jo të festojnë me to.