Si duket Djalli?

LUAJ

Si duket Djalli?

Përgjigjja e Biblës

Djalli është një krijesë e padukshme qiellore. Kjo do të thotë që nuk ka një trup fizik si njerëzit.—Efesianëve 6:11, 12.

Zakonisht Djallin e paraqesin si një cjap me brirë, me bisht të gjatë dhe me një sfurk. Disa janë të mendimit që ky imazh për Djallin e ka origjinën nga artistët e mesjetës, që ka mundësi të jenë ndikuar nga folklori dhe mitologjia.

Si përshkruhet Djalli në Bibël?

Në Bibël, Djalli përshkruhet në shumë mënyra. Kjo na ndihmon të kuptojmë ç’personalitet ka dhe jo si duket. Ja disa shembuj:

Engjëll drite. U ofron njerëzve gjëra të mira në dukje, që të ndjekin mësimet e tij, jo të Perëndisë.—2 Korintasve 11:14.
Luan që ulërin. Sulmon pa mëshirë adhuruesit e Perëndisë.—1 Pjetrit 5:8.
Dragua i madh. Ngjall frikë, është i fuqishëm e sjell shkatërrim.—Zbulesa 12:9.

Vargje nga Bibla për Djallin

2 Korintasve 11:14: «Vetë Satanai shtiret si engjëll drite.»

Kuptimi: Satanai hiqet si i mirë që njerëzit të ndjekin atë, jo Perëndinë.
Efesianëve 6:11: «Vishni armaturën e plotë që jep Perëndia, që të jeni në gjendje të qëndroni të patundur përballë intrigave të Djallit.»

Kuptimi: Djalli përdor taktika dinake që njerëzit të mos i binden Perëndisë.
Jakovi 4:7: «Prandaj, nënshtrojuni Perëndisë dhe kundërvijuni Djallit, e ai do të ikë nga ju.»

Kuptimi: Një njeri mund t’u bëjë ballë sulmeve të Satanait, nëse i bindet Perëndisë dhe jo Djallit.
1 Pjetrit 5:8: «Kundërshtari juaj, Djalli, vjen rrotull si një luan që ulërin, duke kërkuar të gllabërojë ndonjë.»

Kuptimi: Djalli i urren ata që i binden Perëndisë dhe do që t’ua prishë miqësinë që kanë me Të.