Nono. Bijbel e sori krin taki Gado meki libisma, difrenti „sortu” meti nanga sani di e gro a (Genesis 1:12, 21, 25, 27; Openbaring 4:11). A e taki dati ala libisma komopo fu wi fosi papa nanga mama, Adam nanga Eva (Genesis 3:20; 4:1). Bijbel no e horibaka gi a leri taki Gado gebroiki evolutie fu meki den difrenti sani di e libi na grontapu, wan leri di furu sma sabi leki na theïstisch evolutie. Ma Bijbel no e krutu a sani di sabiman kon si taki ibri sortu libisani e meki en eigi pransun. b

•  Gado ben gebroiki evolutie fu meki sani?

•  Evolutie e kruderi nanga san Bijbel e leri?

•  Ma fa a de te meti noso sani di e gro e fiti densrefi na nyun situwâsi fu man tan na libi?

 Sma di e bribi na ini „theïstisch evolutie” abi difrenti prakseri fu a fasi fa Gado du dati. Soleki fa na Encyclopædia Britannica e taki, dan disi wani taki dati „Gado e gebroiki den meti nanga tra libisani di man fiti densrefi na a natuur, fu meki nyun sortu.”

 „Theïstisch evolutie” kan abi fu du nanga den leri disi tu:

•   Ala den libisani di de now, komopo fu sani di ben e libi langa ten na fesi.

•   Wan libisani kan kenki tron wan heri tra sortu libisani. Disi na san sma e kari macro-evolutie.

•   Na a wan noso tra fasi Gado e meki den sani disi pasa.

 Efu „theïstisch evolutie” ben de tru, dan dati ben o sori taki den sani di skrifi na ini a Bijbel Buku Genesis, fu a fasi fa Gado meki grontapu, no tru. Ma Yesus ben sori taki den sani di skrifi na ini Genesis pasa trutru (Genesis 1:26, 27; 2:18-24; Mateyus 19:4-6). Bijbel e sori taki fosi Yesus ben kon na grontapu a ben e libi na ini hemel èn a ben yepi Gado fu meki „ala sani” (Yohanes 1:3). Sobun, wi no kan taki dati Gado gebroiki evolutie fu meki difrenti sani na grontapu, fu di a leri disi no e kruderi nanga Bijbel.

 Bijbel no e taigi wi omeni sortu pransun de fu ibri sortu libisani. A no e taki tu dati meti nanga tra sani di e gro no man fiti densrefi na a kontren fu den noso taki den no man meki nyun pransun. Aladi son sma e si a sani disi leki evolutie, toku dati no de so fu di a no wan nyun sortu libisani kon de.