Efu yu e broko yu ede tumusi, dan dati kan meki yu kon siki èn a kan meki yu firi brokosaka. A kan meki yu kisi problema srefi di bigi moro a broko-ede di yu ben abi fosi.

•  No luku noso arki tumusi furu takru nyunsu. Te wan takru sani pasa, dan yu no abi fu sabi ala sani finifini. Efu yu e luku, arki, noso leisi tumusi furu takru nyunsu, dan dati kan meki yu kon moro frede èn moro sari.

   Bijbel rai: „Te wan sma e sari, dan dati e meki en bonyo kon drei.”​—Odo 17:22.

   „Yu kan kisi a gwenti makriki fu wani sabi doronomo sortu takru sani e pasa, ma dati a no wan bun gwenti. Te mi no e luku noso arki tumusi furu takru nyunsu, dan mi no e broko mi ede so furu moro.”​—John.

   Prakseri a sani disi: A de fanowdu fu luku ibri tron baka sortu nyunsu de?

•  Meki wan schema. Pruberi fu poti a yuru di yu wani opo, nyan, du osowroko, èn go sribi. Te yu abi wan schema, dan yu no o du sani bruyabruya èn yu no o broko yu ede tumusi furu.

   Bijbel rai: „Te wan sma e wroko tranga, dan den sani di a abi na prakseri fu du o tyari wini kon gi en.”​—Odo 21:5.

   „Di a COVID-19 siki bigin, dan mi no ben poti prakseri moro na den bun sani di mi ben gwenti du. Mi ben e gebroiki furu fu mi ten fu meki prisiri. Mi ben wani gebroiki mi ten moro bun, sobun mi meki wan schema fu du den prenspari sani di mi musu du ibri dei.”​—Joseph.

   Prakseri a sani disi: Yu seti yu libi na so wan fasi taki yu e firi bun na a kaba fu ibri dei?

•  Poti prakseri na bun sani. Te yu e tan denki san yu ben kan du tra fasi, noso sortu takru sani kan pasa na ini a ten di e kon, dan dati o meki yu broko yu ede moro furu. Na presi fu dati, prakseri tu noso dri sani di e meki yu de nanga tangi.

   Bijbel rai: „Sori taki unu de nanga tangi.”​—Kolosesma 3:15.

   „Te mi e leisi Bijbel, dan dati e yepi mi fu no furu mi ede nanga takru nyunsu. A e yepi mi fu poti prakseri na bun sani. Kande yu yere en furu kaba, ma a e yepi trutru te yu e leisi Bijbel!”​—Lisa.

   Prakseri a sani disi: Yu abi a gwenti fu denki den takru sani di e pasa na ini yu libi so te taki yu e frigiti den bun sani?

•  Prakseri tra sma. Te yu e broko yu ede doronomo, dan kande yu no o wani de nanga tra sma. Ma na presi fu tan yu wawan, prakseri fa yu kan yepi sma di de na nowtu.

   Bijbel rai: „No poti prakseri na un eigi afersi nomo, ma poti prakseri na den afersi fu trawan tu.”​—Filipisma 2:4.

   „Te mi e du sani gi tra sma, dan mi e firi koloku. Mi e meki den sma firi bun, èn dati e meki taki mi no e broko mi ede so furu moro. Fu taki en leti, mi no abi ten moro fu broko mi ede nanga sani.”​—Maria.

   Prakseri a sani disi: Yu sabi sma di abi spesrutu yepi fanowdu? San yu kan du fu yepi den?

•  Tan gosontu. Oefen a skin nofo èn rostu bun. Nyan gosontu sani. Te yu e sorgu yusrefi bun, dan dati kan yepi yu fu si den bun sani na ini a libi èn fu no broko yu ede tumusi.

   Bijbel rai: „Te wi e oefen a skin, dan dati bun.”​—1 Timoteyus 4:8.

   „Mi nanga mi boi no kan go lon na dorosei leki fa wi wani. Dati meki wi e oefen na ini oso. Disi e meki wi prisiri, èn wi man sori moro switifasi nanga pasensi gi makandra.”​—Catherine.

   Prakseri a sani disi: A de fanowdu fu nyan moro gosontu nyanyan èn fu oefen a skin so taki yu kan de moro gosontu?

 Boiti den rai disi, furu sma kisi wini tu fu den pramisi fu Bijbel di e taki dati wan moro bun ten o kon trutru. Luku na artikel „San Gado Kownukondre o du?”