Yu na wán fu den milyunmilyun sma di kisi fu du nanga wan bigi rampu? Den rampu disi di e pori furu sani, e kon na difrenti fasi. Bigi draiwinti nanga sibibusi e pori furu sani èn den e sungu presi. Hebi alen e meki taki bigi pisi doti e saka kon fu den bergi, èn bigi winti kan meki faya koti na hemel di kan meki bigi busi teki faya. Sosrefi bigi dreiten, faya weer nanga furu snew kan pori sani.

 Na furu presi na grontapu moro nanga moro rampu e pasa èn den e pori moro nanga moro sani. Wan organisâsi di e yepi sma baka te wan rampu pasa, e taki dati „moro furu sma e kisi fu du nanga wan rampu fu di moro furu bigi winti nanga bigi dreiten de èn moro furu presi e sungu. A bakapisi na taki ibri yari furu sma e dede, trawan e lasi den wroko èn milyunmilyun sma e lasi den oso” (The International Federation of Red Cross and Red Crescent Societies).

 Den rampu disi no e meki sma kisi mankeri nomo, ma den e meki tu taki sma e sari trutru. Den e sari fu di den e lasi den gudu, den oso noso srefi wan lobiwan fu den.

 Bijbel kan yepi yu te wan rampu pasa. A e trowstu wi, a e gi wi howpu èn a e gi bun rai di yepi furu sma di kisi fu du nanga wan rampu (Romesma 15:4). Bijbel e piki wan prenspari aksi di furu sma abi: Fu san ede Gado e gi pasi taki den sortu sani disi e pasa? Na strafu a e strafu mi?

 Bijbel e leri wi taki a no Gado e meki taki sma e pina. A e gi wi a dyaranti taki „nowan sma kan tesi Gado nanga ogri sani èn Gado srefi no e tesi sma tu” (Yakobus 1:13). Disi wani taki dati a no Gado e meki taki so furu sma e pina now.

 Na ini Bijbel wi kan feni tori pe Gado tyari rampu kon na tapu ogri sma. Ma den rampu dati ben de tra fasi leki den wan fu now, bika na ini a ten disi wi no e sabi na fesi o ten wan rampu o pasa èn den rampu fu now e miti ogri sma nanga bun sma. Te wi luku den Bijbel tori pe Gado ben strafu sma nanga wan rampu, dan wi e si taki Gado ben warskow sma na fesi, a ben sori fu san ede a ben o tyari wan rampu kon èn a ben kibri den bun sma. Fu eksempre, Gado ben sori fu san ede a ben o tyari a bigi Frudu na ini a ten fu Noa, a ben warskow sma na fesi èn a kibri Noa nanga en osofamiri.​—Genesis 6:13; 2 Petrus 2:5.

 Efu yu wani sabi moro fu san ede wi kan bribi taki den rampu fu now a no wan strafu fu Gado, dan leisi na artikel „San Bijbel e taki fu den rampu di e miti libisma?”

 Bijbel e sori wi taki Yehovah a Gado lobi wi èn taki a e broko en ede nanga wi. Luku fa den tekst disi kan trowstu yu.

•   Yesaya 63:9: „Te den ben de na ini banawtu, ensrefi ben de na ini banawtu tu.”

   San disi wani taki: A e hati Yehovah trutru te a e si taki sma e pina.

•   1 Petrus 5:7: „A e broko en ede nanga unu.”

   San disi wani taki: Yehovah wani taki sani waka bun nanga yu.

 A lobi di Yehovah abi gi wi, e pusu en fu du wan sani. A e trowstu wi nanga bun rai di de fu feni na ini Bijbel èn wan moi howpu taki rampu no o de moro na ini a ten di e kon.​—2 Korentesma 1:3, 4.

 Bijbel e sori taki Yehovah ’wani taki sani waka bun gi wi na ini a ten di e kon èn taki wi musu abi howpu’ (Yeremia 29:11). A wani taki sma kan prisiri fu a libi dyaso na grontapu ini wan paradijs sondro fu frede taki wan rampu o miti den.​—Genesis 1:28; 2:15, Yesaya 32:18.

 Gado o gebroiki en Kownukondre, wan regering di de na hemel èn di abi Yesus leki kownu, fu du den moi sani disi gi libisma (Mateyus 6:10). Yesus abi a koni nanga a makti fu sorgu taki rampu no pasa. Di Yesus ben de na grontapu, a sori taki a abi a makti fu basi a weer (Markus 4:37-41). Te Yesus o tiri a o gebroiki a koni fu en fu leri sma fu sorgu a grontapu na so wan fasi taki den no pori en (Yesaya 11:2). Te Yesus o tiri, nowan sma o pina moro fu di wan rampu miti den.

 Kande yu e aksi yusrefi: ’O ten Yesus o gebroiki a makti fu en fu basi a weer?’ Fu piki na aksi dati, dan leisi na artikel „O ten Gado Kownukondre o bigin tiri grontapu?”

 Bijbel rai kan yepi yu fu sabi san yu kan du fosi wan rampu pasa, na a momenti di a rampu e pasa èn baka te wan rampu pasa

•   Fosi wan rampu: Sreka na fesi so taki yu kan du sani wantewante te wan rampu kon.

   San Bijbel e taki: „A koniwan si taki ogri o miti en èn a go kibri, ma a sma sondro ondrofeni waka go doro èn dati meki a musu kisi strafu.”​—Odo 22:3.

   San disi wani taki: Luku sortu rampu kan pasa na ini a kontren fu yu so taki yu kan du sani wantewante èn kibri yu osofamiri

   Ondrofenitori: „A dei di unu ben lowe gi a bigi faya, wi ben de srekasreka. Wi ben abi wi rampu tas. Wi abi unu dresi. Wi ben abi unu krosi. Sma lontu wi ben e bruya, fu di den no ben sabi san fu du. Ma wi ben abi ala san un ben abi fanowdu, èn mi de nanga tangi gi dati!”​—Tamara, Kalifornia, Amerkankondre.

•   Te wan rampu de: Poti prakseri na den moro prenspari sani.

   San Bijbel e taki: „Srefi te wan sma abi furu gudu, toku den sani di a abi no kan gi en libi.”​—Lukas 12:15.

   San disi wani taki: A libi prenspari moro den gudu di wi abi.

   Ondrofenitori: „Di a bigi draiwinti Lawin b pori wi oso, mi no ben man denki krin. Ma wan sani di mi du na taki mi begi Yehovah Gado nanga wan krin ati. Mi kon frustan taki wi ben lasi den gudu fu wi, ma wi no lasi wi libi”​—Leslie, Filippijnen.

•   Baka wan rampu: Luku san yu kan du tide èn no broko yu ede nanga tamara.

   San Bijbel e taki: „Noiti un musu broko un ede nanga tamara, bika tamara o abi en eigi broko-ede.”​—Mateyus 6:34.

   San disi wani taki: No broko yu ede tumusi nanga sani di kan pasa na ini a ten di e kon.

   Ondrofenitori: „Baka di bigi winti Irma sungu mi oso, dan wantronso mi ben abi fu teki furu bosroiti èn mi ben stress srefisrefi.Mi pruberi fu fiti a Bijbel rai fu no broko yu ede nanga tamara. Mi kon si taki nanga a yepi fu Yehovah, mi man horidoro.”​—Sally, Florida, Amerkankondre

 Efu yu wani sabi moro san fu du te wan rampu miti yu, dan leisi na artikel „Een ramp! Tips die levens kunnen redden.”