A fosi brifi gi den Korentesma 15:1-58
15 Brada, now mi e memre unu na a bun nyunsu di mi ben fruteri unu èn di unu teki. Unu tan bribi na ini en tu.
2 Unu o kisi frulusu efu unu e tan bribi a bun nyunsu di mi fruteri unu, noso unu tron bribiman fu soso.
3 Bika wan fu den fosi sani di mi fruteri unu, na san misrefi kon sabi tu, taki Krestes dede gi den sondu fu wi soleki fa Gado Buku taki.
4 Den beri en èn a kisi wan opobaka na a di fu dri dei soleki fa Gado Buku taki.
5 A sori ensrefi na Seifas, èn baka dati na den twarfu apostel.
6 Baka dati a sori ensrefi na moro leki feifi hondro brada na a srefi ten. Furu fu den brada disi e libi te now ete, ma sonwan fu den dede.
7 Dan a sori ensrefi na Yakobus èn baka dati na ala den apostel.
8 Ma leki lastiwan fu un alamala a sori ensrefi na mi neleki mi de wan pikin di gebore tumusi fruku.
9 Bika mi na a moro pikinwan fu den apostel èn mi no warti fu den kari mi wan apostel, bika mi ben frufolgu a gemeente fu Gado.
10 Ma na fu di Gado sori mi bun-ati, meki mi de a sma di mi de nownow. A bun-ati di a sori mi no ben de fu soso, bika mi wroko moro tranga leki ala den trawan. A no mi du dati, ma na a bun-ati fu Gado di de nanga mi.
11 Ma a no abi trobi efu na mi, noso efu na den tra apostel e preiki. Wi alamala e preiki wán boskopu èn na dati unu e bribi.
12 We, efu wi e preiki taki Krestes opo baka, dan fa sonwan fu unu kan taki dati den dede sma no sa opo baka?
13 Efu a tru taki den dede sma no sa opo baka, dan Krestes no opo baka tu.
14 Ma efu Krestes no opo baka, dan a no de fu taki dati na fu soso wi e preiki èn na fu soso wi e bribi.
15 Dan wi na falsi kotoigi fu Gado tu, fu di wi e lei gi Gado taki a gi Krestes wan opobaka. Bika efu a de so trutru taki den dede sma no sa opo baka, dan Gado no gi Krestes wan opobaka.
16 Efu den dede sma no sa opo baka, dan Krestes no opo baka tu.
17 Boiti dati, efu Krestes no opo baka, dan na fu soso unu e bribi. Unu no kisi pardon fu un sondu.
18 Fu taki en leti, dan den wan di dede leki disipel fu Krestes, lasi gowe trutru.
19 Efu na ini a libi disi wawan wi howpu tapu Krestes, dan wi de fu sari moro leki ala tra libisma.
20 Ma Krestes kisi wan opobaka trutru. Fu den wan di dede en na a fosiwan di kisi wan opobaka.
21 Fu di na wan libisma tyari dede kon, dan na wan libisma o meki taki dede sma opo baka tu.
22 Neleki fa ala sma dede fu Adam ede, na so ala sma sa kon na libi baka tu fu Krestes ede.
23 Ma ibri sma o kisi wan opobaka te en ten doro. Krestes kisi wan opobaka leki fosiwan, èn bakaten den wan di de fu Krestes o kisi wan opobaka te a kon baka.*
24 Baka dati, na a kaba, a o gi a Kownukondre abra na en Gado èn Tata. Ma fosi dati pasa a o tyari wan kaba kon na ala tirimakti, na ala makti, èn na ala krakti.
25 Bika a musu tiri leki Kownu teleki Gado poti ala den feanti fu en na ondro en futu.
26 Dede na a lasti feanti di a o puru na pasi.
27 Bika Gado „poti ala sani na en ondro”. Ma te a e taki dati ’ala sani de na en ondro’, dan a de krin taki dati no de so nanga Gado di poti ala sani na en ondro.
28 Ma te ala sani de na a Manpikin ondro kaba, dan a o saka ensrefi na ondro Gado di ben poti ala sani na en ondro. Na so Gado kan de ala sani gi ala sma.
29 Bika sortu wini sma o kisi te den dopu fu dede? Efu trutru den dede sma no o kisi wan opobaka, dan fu san ede den e dopu tu fu dede?
30 Fu san ede ogri e miti wi ala yuru?
31 Ala dei mi kan lasi mi libi. A sani disi tru, neleki fa a tru taki mi e prisiri srefisrefi nanga unu fu di unu de wán nanga wi Masra Yesus Krestes.
32 Efu mi feti nanga ogri meti na Efeise neleki tra sma, dan sortu bun dati tyari kon gi mi? Efu den dede sma no o kisi wan opobaka, dan „meki wi nyan èn dringi, bika tamara wi o dede”.
33 No meki sma kori unu. Takru kompe e pori bun gwenti.
34 Un musu kisi unsrefi èn du san reti. Un no musu tan du sondu, bika sonwan fu unu no sabi Gado. Mi e taki disi fu meki unu firi syen.
35 Ma toku wan sma sa taki: „Fa den dede sma o opo baka? Iya, nanga sortu skin den o kon?”
36 Yu donman! Te yu e sai wan siri, dan a no o kon na libi efu a no dede fosi, a no so?
37 Te yu e sai, yu no e sai a bon di o gro, ma yu e sai wán siri nomo, iya, a kan de iniwan siri.
38 Ma Gado e meki a siri gro kon tron a bon di a wani. A e meki ibriwan fu den siri gro kon tron wan tra sortu bon.
39 A no ala skin de a srefi. Libisma abi den eigi skin, skapu nanga kaw abi den eigi skin, fowru abi den eigi skin, èn fisi abi den eigi skin.
40 Yu abi libisani na hemel di abi den eigi skin, èn yu abi libisani na grontapu di abi den eigi skin, ma a moi fu den libisani di de na hemel de tra fasi leki a moi fu den libisani na grontapu.
41 A son abi en eigi moi, a mun abi en eigi moi, èn den stari abi den eigi moi. Fu taki en leti, den stari no moi a srefi.
42 Na so a de tu nanga na opobaka fu dedewan. A skin de leki wan siri di sai èn a e pori. Ma a skin di e opo baka no man pori.
43 A skin sai sondro glori, ma a e opo baka nanga glori. A sai leki wan skin di swaki, ma a e opo baka leki wan skin di abi krakti.
44 A sai leki wan libisma skin, ma a e opo baka leki wan yeye skin. Efu wan libisma skin de, dan wan yeye skin de tu.
45 Gado Buku taki tu: „A fosi man, Adam, tron wan libisma.”* A lasti Adam tron wan yeye di e gi libi.
46 Ma a no a yeye skin ben de fosi. Na a libisma skin ben de fosi, èn baka dati a yeye skin kon de.
47 A fosi libisma na fu grontapu èn a meki fu doti. A di fu tu libisma na fu hemel.
48 Den sma fu a grontapu disi de leki a sma di meki fu doti. Den wan di sa go na hemel de leki a sma di de fu hemel.
49 Wi de leki a sma di meki fu doti. Sobun, wi o de tu leki a sma di de fu hemel.
50 Ma brada, mi e taigi unu taki skin nanga brudu no man go na ini a Kownukondre fu Gado, èn sani di kan pori no man kisi sani di no kan pori.
51 Luku, mi e fruteri unu wan santa kibritori: Wi alamala no o dede, ma wi alamala o kenki
52 na ini wan momenti, fosi yu pingi yu ai, te a lasti trompeti o bari. Bika a trompeti o bari èn den dede sma o kisi wan opobaka. Den o kisi wan skin di no man pori èn wi o kenki.
53 Bika a skin di man pori, musu tron wan skin di no man pori, èn a skin di man dede, musu tron wan skin di no man dede.
54 Ma te a skin di man pori, tron wan skin di no man pori, èn a skin di man dede, tron wan skin di no man dede, dan a sani di skrifi na ini Gado Buku o kon tru: „A swari dede fu têgo.”
55 „Dede, yu no o wini moro! Dede, pe yu maka de?”
56 A maka di e meki sma dede, na sondu, ma a Wèt e gi krakti na sondu.
57 Ma tangi fu Gado, bika a meki wi wini nanga yepi fu wi Masra Yesus Krestes!
58 Fu dati ede mi lobi brada, tanapu kánkan, no degedege, èn ala ten abi furu fu du na ini a wroko fu Masra, fu di unu sabi taki a wroko di unu e du gi Masra no de fu soso.
