1-3. (a) Foe sortoe fonten den krakti di e tjari pori kon, èn di de wan kefar gi na osofamiri, e kon? (b) Sortoe balansi papa nanga mama abi fanowdoe foe kibri na osofamiri foe den?

JOE de foe seni a pikin boi foe joe go na skoro, èn alen e kon tranga. San joe e doe na ini so wan situwâsi? Joe e meki a lon go na dorosei sondro foe weri mantel gi na alen? Noso joe e weri someni krosi gi en foe kibri en, taki pikinmoro a no man boeweigi srefi? A no de foe taki, dati joe no o doe no wan foe den toe sani disi. Joe e gi en soso san de fanowdoe foe tan drei.

² Na a srefi fasi, papa nanga mama moesoe feni wan balansi fasi foe kibri na osofamiri foe den gi den krakti di e tjari pori kon èn di e fadon na den tapoe komoto foe foeroe fonten — a bisnis sistema di e sorgoe gi den sani di sma e gebroiki foe meki prisiri, a njoensoe, speri, èn son tron srefi skoro. Wan toe papa nanga mama e doe pikinso noso noti foe kibri na osofamiri foe den. Trawan, di e si pikinmoro ala krakti di e kon foe dorosei leki takroe, e poti so foeroe skotoe taki den pikin e firi leki den e stik. A kan foe hori wan balansi?

³ Ija, a kan. A no sa wroko boen efoe wi e go dorosei foe den skotoe, èn a kan opo na okasi gi rampoe (Preikiman 7:16, 17). Ma fa kresten papa nanga mama e feni a joisti balansi foe kibri na osofamiri foe den? Loekoe dri kontren: skoro, demakandra, nanga ontspanning.

4. Fa kresten papa nanga mama moesoe si a skoro di sma e kisi?

⁴ Kresten papa nanga mama e si skoro leki wan warti sani. Den sabi taki skoro e jepi den pikin foe leisi,  skrifi èn foe abi komunikâsi, èn so srefi foe loesoe problema. A skoro moesoe leri den toe fa foe leri. Den bekwaamfasi di pikin e kisi na skoro, kan jepi den foe abi boen bakapisi ala di den tjalensi foe a grontapoe na ini a ten disi de. Moro fara, wan boen skoro kan jepi den foe doe boen wroko. — Odo 22:29.

5, 6. Fa den pikin na skoro kan opo gi kroektoe bodoi foe seks afersi?

⁵ Ma a skoro e meki den pikin miti nanga tra pikin toe — èn foeroe foe den pikin di den e miti abi kroektoe fasi foe si sani. Foe eksempre, loekoe den fasi fa den e si seks èn boen gwenti nanga wet. Na wan mulo-skoro na Nigeria, wan oemapikin di abi seks nanga foeroe difrenti sma, ben abi a gwenti foe gi den skoro kompe foe en rai di abi foe doe nanga seks. Den ben arki en nanga faja, ala di den idea foe en ben lai nanga dondon sani di a ben teki foe seks boekoe. Wan toe foe den oemapikin ben go proeberi a rai foe en. Leki wan bakapisi foe dati, wán oemapikin ben kisi bere sondro foe trow èn a ben dede foe di ensrefi ben poeroe a bere.

 ⁶ A de wan sari sani foe taki, dati wan toe foe den fowtoe bodoi ini a tori foe seks di e gi na skoro, no e kon foe pikin, ma foe den skoromeester nanga den jufrow. Foeroe papa nanga mama e skreki te den skoro e leri pikin foe seks, sondro foe froeteri den foe den markitiki akroederi boen gwenti nanga wet èn foe a frantiwortoe di den abi. A mama foe wan oemapikin di abi 12 jari ben taki: „Wi e libi na wan kontren di lobi relisi èn di abi owroe gwenti, èn tokoe leti na a middelbaar-skoro foe a kontren, den e gi den skoropikin condoom!” En nanga en masra ben broko den ede di den ben kon sabi taki boi di owroe a srefi leki na oemapikin foe den, ben aksi en foe abi seks nanga den. Fa papa nanga mama kan kibri na osofamiri foe den gi den sortoe takroe krakti disi?

7. Fa wi kan tapoe den fowtoe bodoi ini a tori foe seks na wan moro boen fasi?

⁷ A moro boen foe kibri den pikin so taki den no e kisi noti foe jere foe seks afersi? Nôno. A moro boen te joesrefi e leri den pikin foe joe foe seks (Odo 5:1). A troe, taki na pisi foe Europa nanga Noord Amerika, foeroe papa nanga mama no wani taki foe a tori disi. Na so a de toe na wan toe Afrikan kondre, taki papa nanga mama pikinso noiti e taki nanga den pikin foe den foe seks. „A no de wan pisi foe na Afrikan koeltoeroe foe doe dati”, na so wan papa na Siera Leon e taki. Wan toe papa nanga mama e denki taki te den e leri den pikin foe seks, dan den e gi den pikin den idea di sa meki den pikin go doe hoeroedoe! Ma fa Gado e si a tori?

8, 9. Sortoe boen bodoi foe seks afersi de foe feni na ini bijbel?

⁸ Bijbel e sori krin, taki a no de wan sjen sani srefisrefi foe taki na wan joisti fasi foe seks. Na Israèl, Gado ben taigi en pipel foe kon makandra, so srefi den „pikinwan” foe den, foe arki te den e leisi a Wet foe Moses tranga (Deuteronomium 31:10-12; Josua 8:35). A Wet ben taki langalanga foe afersi di abi foe doe nanga seks, so srefi  foe a ten te oema e kisi den foetoe, a loesoe di man-nengre e loesoe skiti, hoeroedoe, soetadoe, homo-sekslibi, seks nanga joe eigi famiri, èn foe seks na mindri libisma nanga meti (Lefitikus 15:16, 19; 18:6, 22, 23; Deuteronomium 22:22). Baka te den sortoe sani disi ben leisi, dan seiker den papa nanga mama ben moesoe froeklari foeroe sani gi den jongoewan foe den di wani sabi sani nomonomo.

⁹ Pisi de na ini a di foe feifi, a di foe siksi, nanga a di foe seibi kapitel foe Odo, di e gi lobi rai na papa nanga mama èn di e taki foe den kefar foe seks hoeroedoe. Den vers disi e sori taki hoeroedoe kan de wan tesi son tron (Odo 5:3; 6:24, 25; 7:14-21). Ma den e leri taki a fowtoe èn taki a abi rampoe leki bakapisi, èn den e gi tiri foe jepi jongoesma foe tan farawe foe hoeroedoe libi (Odo 5:1-14, 21-23; 6:27-35; 7:22-27). Moro fara, hoeroedoe de kontrari foe a satisferi di sma e satisferi a seks lostoe foe den na wan joisti fasi, inisei a trowlibi (Odo 5:15-20). Disi na wan heri boen eksempre foe gi leri, di papa nanga mama kan waka na baka!

10. Foe san ede a no sa meki den pikin doe hoeroedoe, te wi e gi den a sabi foe Gado di abi foe doe nanga seks?

¹⁰ Den sortoe leri disi e meki pikin doe hoeroedoe? Kontrari foe dati, bijbel e leri: „Den regtfardikiwan e kisi froeloesoe nanga jepi foe sabi” (Odo 11:9). Joe no wani froeloesoe den pikin foe joe foe den krakti foe a grontapoe disi? Wan papa ben taki: „Foe sensi a ten di den pikin ben jongoe srefisrefi, wi proeberi foe no kibri noti gi den te a abi foe doe nanga seks. Na a fasi disi, te den e jere tra pikin e taki foe seks, dan a no de wan sani di den wani sabi nomonomo. A no wan kibritori gi den.”

11. Fa wi kan leri den pikin safrisafri foe den moro krosibei afersi foe a libi?

¹¹ Soleki fa den kapitel na fesi ben taki, dan froekoe kaba joe moesoe bigin leri den pikin den sani di abi foe doe nanga seks. Te joe e leri den pikin-nengre foe kari pisi foe a skin, dan no djompo den sjenpresi foe den,  neleki den na sani di joe moesoe sjen foe den. Leri den pikin den joisti nen foe den sani disi. Baka ten, a de fanowdoe foe leri den pikin san den moesoe hori gi densrefi èn san na den skotoe di den moesoe poti. A moro boen efoe a papa èn so srefi a mama e leri den pikin, taki den presi disi foe a skin na spesroetoe sani, sani di tra sma no mag fasi noso no mag si na ini moro foeroe kefal, èn noiti den moesoe taki na wan takroe fasi foe den. Te den pikin e gro kon moro owroe, den moesoe kon sabi fa wan man nanga wan oema e kon na makandra foe meki wan pikin. Na a ten te na eigi skin foe den e doro puberteit, dan den moesoe sabi heri boen kaba san na den kenki di den kan froewakti. Soleki fa ben taki na ini Kapitel 5, dan so wan leri kan jepi toe foe kibri den pikin foe sma no gebroiki den na seks sei. — Odo 2:10-14.

12. Sortoe kroektoe fasi foe si sani, nofo tron e leri na skoro?

¹² Papa nanga mama moesoe de klariklari foe tapoe tra falsi idea di kande den e leri na skoro — filosofia foe grontapoe soleki na evolutie, a nationalisme, noso na idea taki no wan waarheid de troe dorodoro. (1 Korentesma 3:19; teki gersi Genesis 1:27; Lefitikus 26:1; Johanes 4:24; 17:17.) Foeroe opregti skoro edeman e poti toemoesi foeroe krakti na tapoe a kisi di sma moesoe kisi moro hei skoro. Ala di a de wan persoonlijk sani efoe wan sma wani bosroiti foe kisi moro hei skoro, tokoe wan toe skoromeester nanga jufrow e bribi taki a de a wan-enkri fasi fa wan sma kan feni wini gi ensrefi. * — Psalm 146:3-6.

13. Fa wi kan kibri den pikin di e go na skoro, gi fowtoe denki?

¹³ Efoe papa nanga mama wani tapoe fowtoe noso kroektoe leri, dan den moesoe sabi soifri sortoe leri den pikin foe den e kisi. So boen, papa nanga mama, hori  na prakseri taki oenoe abi wroko na oso toe! Sori wan opregti belangstelling gi a skoro di den pikin foe oenoe e kisi. Taki nanga den na baka te den komoto na skoro. Aksi san den e leri, san den lobi moro foeroe, san den feni moro moeilek. Loekoe den wroko di den kisi foe doe na oso, den sani di den skrifi, èn fa den doe nanga den repetitie. Proeberi foe kon sabi den skoromeester nanga den jufrow foe den. Meki den skoromeester nanga den jufrow sabi taki oenoe e warderi a wroko di den e doe èn taki oenoe wani jepi na ala fasi di oenoe kan.

14. Foe san ede a de toemoesi prenspari taki pikin di e dini Gado e teki boen mati?

¹⁴ „San, pe joe ben leri a sani dati?” Omeni papa nanga mama poti na aksi dati, di den ben skreki foe wan sani di a pikin foe den taki noso doe èn di no de wan sani foe en srefisrefi? Èn o foeroe tron a piki abi foe doe nanga wan njoen mati na skoro noso na ini a birti? Ija, kompe abi foeroe krakti na wi tapoe, awansi wi jongoe noso owroe. Na apostel Paulus ben warskow: „No kori oensrefi. Takroe kompe e pori boen gwenti” (1 Korentesma 15:33; Odo 13:20). Spesroetoe den jongoewan opo gi a druk foe den speri foe den. Son tron den no de seiker foe densrefi èn son tron den abi a tranga firi foe plisi den kompe foe den èn foe abi krakti na den tapoe. A de toemoesi prenspari foe dati ede, taki den e teki boen mati!

15. Fa papa nanga mama kan tiri den pikin foe den te den e teki mati?

¹⁵ Soleki fa ibri papa noso mama sabi, a no ala ten pikin sa teki boen mati; den abi pikinso tiri fanowdoe. A no wani taki dati joe moesoe teki den mati gi den. Na presi foe dati, ala di den e gro, leri den a koni foe man si sani krin èn jepi den foe si sortoe eigifasi den moesoe si leki warti sani na ini mati. A moro prenspari eigifasi na lobi gi Jehovah èn foe doe san boen na ini en ai (Markus 12:28-30). Leri den foe lobi èn foe lespeki den wan di abi  eerlijkfasi, boenfasi, di lobi foe gi èn di de fajafaja. Jepi den pikin na a ten foe na osofamiri studie foe si den sortoe eigifasi disi na ini den sma di skrifi na ini bijbel, èn baka dati foe feni den srefi eigifasi disi na ini tra sma na ini a gemeente. Poti na eksempre, foe di joe e gebroiki den srefi markitiki te joe e teki joe eigi mati.

16. Fa papa nanga mama kan ondrosoekoe fa den pikin foe den e teki mati?

¹⁶ Joe sabi soema na den mati foe den pikin foe joe? Foe san ede joe no e meki den pikin foe joe tjari den kon na oso, so taki joe kan kon sabi den moro boen? Joe ben sa kan aksi den pikin foe joe toe, fa den tra pikin e denki foe den mati disi. Den sabi den leki sma di e hori den soifri retifasi noso leki sma di e libi wan dobroe libi? Efoe den e libi wan dobroe libi, jepi den pikin foe joe foe prakseri foe san ede den sortoe kompe disi ben kan doe den ogri (Psalm 26:4, 5, 9-12). Efoe joe e si wan kenki di no boen ini a fasi fa joe pikin e tjari ensrefi, ini a fasi fa a e weri krosi, ini a fasi fa a e denki, noso ini a fasi fa a e taki, dan kande a de fanowdoe foe taki nanga en foe den mati foe en. Kande a pikin foe joe e gebroiki ten nanga wan mati di abi wan fowtoe krakti na en tapoe. — Teki gersi Genesis 34:1, 2.

17, 18. Boiti taki papa nanga mama moesoe warskow gi takroe kompe, sortoe praktis rai den kan gi?

¹⁷ Ma tokoe a no nofo foe leri den pikin foe joe taki den moesoe tan farawe nomo foe takroe kompe. Jepi den foe feni boenwan. Wán papa e taki: „Ala leisi wi ben sa proeberi foe poti tra sani ini a presi. So boen, te a skoro ben wani meki a boi foe wi ben moesoe de ini a team foe prei foetoebal, dan mi wefi nanga mi ben sidon nanga en èn ben taki makandra foe san ede dati no ben sa de wan boen idea — bika foe den njoen kompe di ben sa de ini a tori toe. Ma dan wi ben gi na idea foe teki wan toe foe den tra pikin na ini a gemeente èn teki den alamala foe prei foetoebal na ini a park. Èn dati ben loesoe a problema.”

¹⁸ Koni papa nanga mama e jepi den pikin foe den foe  feni boen mati èn dan foe abi gosontoe ontspanning nanga den. Ma gi foeroe papa nanga mama, na afersi disi foe ontspanning e tjari tjalensi kon foe ensrefi.

19. Sortoe eksempre foe bijbel e sori taki a no de wan sondoe te osofamiri abi prisiri?

¹⁹ Bijbel e kroetoe a meki di sma e meki prisiri? Kwetikweti! Bijbel e taki dati „wan ten [de] foe lafoe . . . èn wan  ten foe djompodjompo lontoe” * (Preikiman 3:4). A pipel foe Gado na Israèl foe owroeten ben prisiri foe pokoe nanga dansi, foe sani di den ben prei, nanga foe raitori. Jesus Krestes ben de na wan bigi trowfesa èn na „wan bigi njanjan-fesa” di Mateus Levi ben sreka gi en (Lukas 5:29; Johanes 2:1, 2). A de krin taki Jesus no ben de wan sma di ben pori a prisiri foe tra sma. Meki a de so, taki noiti joe e si lafoe nanga prisiri leki wan sondoe na ini joe osofamiri!

20. San den papa nanga mama moesoe hori na prakseri te den e sorgoe gi ontspanning gi na osofamiri?

²⁰ Jehovah na „a kolokoe Gado” (1 Timoteus 1:11). So boen, na anbegi foe Jehovah moesoe de wan fonten foe prisiri, a no moesoe de wan sani di no e meki prisiri de na ini a libi. (Teki gersi Deuteronomium 16:15.) Foe densrefi, pikin-nengre de nanga faja èn den lai nanga krakti di den kan gebroiki na ini sani di den e prei èn na ini ontspanning. Wan boen ontspanning na moro leki prisiri nomo. A de wan fasi fa wan pikin kan leri èn kan kon lepi. Wan edeman foe wan osofamiri abi a frantiwortoe foe sorgoe gi ala den sani di en osofamiri abi fanowdoe, so srefi gi ontspanning. Ma a de fanowdoe foe de ini balansi.

21. Sortoe trapoe de na ini ontspanning na ini a ten disi?

²¹ Na ini den moeilek „lasti dei” disi, a libisma libimakandra lai nanga sma di „lobi prisiri moro leki den lobi Gado”, neleki fa a ben taki na fesi na ini bijbel (2 Timoteus 3:1-5). Gi foeroe sma a de so, taki ontspanning na a moro prenspari sani na ini a libi. So foeroe sani de foe meki prisiri, taki a kan kon makriki na ini a presi foe sani di de moro prenspari. Boiti dati, foeroe foe a disiten prisiri abi foeroe foe doe nanga seks hoeroedoe, ogri di doe nanga tranga, fowtoe gebroiki foe drug, nanga tra  sani di e doe foeroe ogri (Odo 3:31). San wi kan doe foe kibri den jongoewan gi prisiri di e doe ogri?

22. Fa papa nanga mama kan leri den pikin foe den foe teki koni bosroiti di abi foe doe nanga ontspanning?

²² Papa nanga mama moesoe poti skotoe èn den moesoe poti wet di e tapoe pikin foe doe wan toe sani. Ma a de moro leki dati nomo, den moesoe leri den pikin foe den fa den kan kon sabi sortoe ontspanning takroe èn foe sabi o ten ontspanning de toemoesi foeroe. So wan leri e teki ten nanga moeiti. Loekoe wan eksempre. Wan papa foe toe boi ben kon si taki a moro owroe manpikin foe en ben e arki wan njoen radio station foeroe leisi. So boen, di a papa ben e rèi en truk go na wroko wan dei, a ben poti a radio na a srefi station dati. Wanwan leisi a ben stop èn ben skrifi den wortoe foe son singi. Baka ten,  a ben sidon nanga den manpikin foe en èn ben taki makandra foe den sani di a ben jere. A ben poti aksi gi den foe sabi fa den e prakseri, èn a ben e bigin nanga: „San oenoe e prakseri?” èn a ben arki nanga pasensi na den piki foe den. Baka di a taki-go-taki-kon foe na afersi nanga jepi foe bijbel, den boi ben feni en boen foe no arki a station dati.

23. Fa papa nanga mama kan kibri den pikin foe den gi prisiri di no gosontoe?

²³ Koni kresten papa nanga mama e ondrosoekoe den pokoe, den telefisi programa, den video banti, den lafoe boekoe, den preisani na tapoe video, nanga den kino di abi a belangstelling foe den pikin foe den. Den e loekoe a prenki na tapoe a kafti, den wortoe, a sani pe den domroe na ini, èn den e leisi den sani di koranti skrifi foe wan boekoe noso wan kino èn den e loekoe den pisi di teki poeroe foe den. Foeroe foe den papa nanga mama e skreki srefisrefi foe son wan foe a „prisiri” di sma e pristeri den pikin na ini a ten disi. Den wan di wani kibri den pikin foe den gi krakti di no krin, e sidon nanga na osofamiri èn den e taki nanga den foe den kefar, ala di den e gebroiki bijbel nanga poeblikâsi di gron tapoe bijbel, soleki a boekoe Wat jonge mensen vragen — Praktische antwoorden (Jongoe sma e aksi — Piki di e wroko) èn den artikel na ini A Waktitoren nanga Ontwaakt! * Te papa nanga mama e poti steifi skotoe, èn den e hori densrefi na dati èn den reidelek, dan moro foeroe den e si boen bakapisi. — Mateus 5:37; Filipisma 4:5.

24, 25. San na wan toe gosontoe fasi foe ontspanning di osofamiri kan abi makandra?

²⁴ A no de foe taki, dati foe tapoe den foe abi fasi foe ontspanning di e doe ogri, na wan pisi nomo foe a feti. Boen sani moesoe kon ini a presi foe na ogriwan, noso den pikin kan drifi safrisafri go na wan takroe pasi. Foeroe kresten osofamiri e memre foeroe okasi pe den ben  abi ontspanning nanga makandra di ben gi waran èn prisiri — piknik, koiri, kampeer, prei sani nanga sport, teki waka go fisiti famiri noso mati. Wan toe sma feni taki a e gi foeroe prisiri nanga trowstoe foe leisi tranga nanga makandra gi ontspanning. Trawan e feni en wan prisiri sani foe froeteri lafoe tori noso moi tori. Èn trawan e doe sani nanga makandra na ini a fri ten foe den, foe eksempre, foe meki oedoe sani èn foe meki sani nanga anoe, so srefi prei sani foe meki pokoe, foe ferfi, noso foe ondrosoekoe den mekisani foe Gado. Den pikin di e leri foe njan boen foe den fasi disi foe gebroiki den ten, kibri gi foeroe prisiri di no krin, èn den e leri taki moro de na ontspanning leki foe sidon nomo sondro foe doe wan sani èn foe meki tra sma gi den wan prisiri ten. Foe abi wan prati, abi nofo tron moro prisiri leki foe loekoe nomo.

²⁵ Demakandra nanga tra sma kan de wan fasi foe abi ontspanning toe, di e gi winimarki. Efoe ai e hori boen na tapoe èn a no de toemoesi bigi noso e teki foeroe ten, den kan gi den pikin foe joe moro leki prisiri nomo. Den kan jepi foe tranga den banti foe lobi na ini a gemeente. — Teki gersi Lukas 14:13, 14; Judas 12.

26. San na a moro prenspari eigifasi di de fanowdoe foe kibri na osofamiri gi krakti di no gosontoe?

²⁶ Sondro foe tweifri, a e aksi foeroe tranga wroko foe kibri joe osofamiri gi krakti foe a grontapoe disi di e tjari pori kon. Ma wan sani de di, moro leki iniwan tra sani, sa meki taki sani e waka boen. Dati na lobi! Krosibei famiri banti foe lobi sa meki joe oso de wan lanpe di e gi kibri èn a sa meki komunikâsi de, di de wan bigi kibri gi takroe krakti. Moro fara, a de moro prenspari srefi foe kweki wan tra sortoe lobi — lobi gi Jehovah. Te so wan lobi de foeroe na ini na osofamiri, dan a sa kan moro foeroe, taki den pikin e gro kon bigi ala di den no sa lobi na idea srefi foe no plisi Gado foe di den sa broko kindi gi den krakti foe grontapoe. Èn den papa nanga mama di lobi Jehovah nanga den heri ati, sa doe moeiti foe waka  na baka en eigifasi foe lobi, reidelekfasi, nanga balansifasi (Efeisesma 5:1; Jakobus 3:17). Efoe den papa nanga mama e doe dati, dan den pikin foe den no sa abi no wan reide foe si na anbegi foe Jehovah leki wan lijst foe sani nomo di den no mag doe, noso leki wan fasi foe libi sondro prisiri noso lafoe, wan sani di den wani lon gowe foe en so esi leki a kan. Na presi foe dati, den sa si taki na anbegi foe Gado na a moro prisiri fasi foe libi èn wan fasi foe libi na a moro boen fasi.

27. Fa wan osofamiri kan wini grontapoe?

²⁷ Den osofamiri di e tan makandra na ini a kolokoe, balansi diniwroko gi Gado, èn di e doe moeiti nanga den heri ati foe tan „sondro flaka èn sondro doti” foe den krakti foe a grontapoe disi di e tjari pori kon, de wan fonten foe prisiri gi Jehovah (2 Petrus 3:14; Odo 27:11). Den sortoe osofamiri disi e waka na baka den foetoestap foe Jesus Krestes, di ben kakafoetoe gi ibri moeiti di a grontapoe foe Satan ben doe foe doti en. Pikinmoro na a kaba foe en libi leki wan libisma, Jesus ben man taki: „Mi wini grontapoe” (Johanes 16:33). Meki a de so, taki so srefi joe osofamiri e wini grontapoe èn e njan boen foe têgo libi!