KAPITEL 35

Fa mi kan tron Gado mati?

Di wan bigi problema miti Jeremy a kon frustan o prenspari a ben de taki a de wan mati fu Gado. A e taki: „Di mi ben abi 12 yari, mi papa gwe libi wi osofamiri. Wan neti di mi ben e didon na ini mi bedi, mi begi Yehovah fu meki mi papa kon baka.”

Fu di Jeremy ben e sari so te, meki a bigin leisi en Bijbel. Ne a feni Psalm 10:14 èn a tekst dati naki en ati trutru. A tekst dati e taki: „Den pikin di no abi papa, iya, den wan di de na nowtu, poti frutrow na yu tapu. Na yu tron a yepiman fu den.” Jeremy e taki: „Mi ben firi leki na Yehovah srefi e taki nanga mi èn a ben e taigi mi taki a de mi yepiman nanga mi Papa. En na a moro bun papa di wan sma kan abi.”

AWINSI yu de na ini wan srefi sortu situwâsi leki di fu Jeremy, noso yu de na ini wan tra situwâsi, Bijbel e sori taki Yehovah wani taki yu de en mati. Fu taki en leti, Bijbel e taki: „Kon krosibei na Gado èn a o kon krosibei na unu” (Yakobus 4:8). Prakseri san den wortu dati wani taki: Aladi yu no man si en èn a de heri tra fasi leki den mati fu yu, toku Yehovah Gado e gi yu a kari fu tron en mati!

Ma efu yu wani tron wan mati fu Gado, dan yu o abi fu meki muiti. Luku wan eksempre: Efu yu prani wan moi bromki na ini wan patu èn yu poti en na ini oso, dan yu sabi taki a bromki no o gro fu ensrefi. Efu yu wani taki a gro bun, yu musu gi en watra ibri leisi baka èn yu musu poti en na wan presi so taki a man gro bun. Na so a de tu efu yu wani de wan mati fu Gado. San yu kan du fu tron wan moro bun mati fu Gado?

A prenspari fu studeri Bijbel

Efu yu wani de bun mati fu wan sma, yu musu taki nanga en, ma yu musu arki en tu. Disi de so tu te wi e tron mati fu Gado. Te wi e leisi èn studeri Bijbel, dan na so wi e arki san Gado wani taigi wi.​—Psalm 1:​2, 3.

Ma kande yu o taki dati yu no lobi studeri. Furu yonguwan feni en moro bun fu luku TV, prei game noso fu go du wan sani nanga den mati. Ma efu yu wani tron wan mati fu Gado, dan yu no kan du wan tu sani snelsnel dan a bun kaba. Yu musu du den sani di a taki dati wi musu du fu man tron wan mati fu en. Yu o abi fu arki en. Yu e du dati te yu e studeri en Wortu.

Ma no broko yu ede tumusi. Studeri Bijbel no abi fu hebi so leki fa yu e denki. Yu kan leri fu lobi dati, awinsi yu feni taki yu na wan sma di no lobi studeri. A fosi sani di yu musu du na fu poti wan ten spesrutu fu studeri Bijbel. Wan meisje di nen Lais e taki: „Mi abi wan schema. A fosi sani di mi e du te mi wiki mamanten, na fu leisi wán kapitel fu Bijbel.” Maria di abi 15 yari e du wan tra sani. A e taki: „Mi e leisi wan pikinso na ini Bijbel ibri neti fosi mi go sribi.”

Fosi yu seti yu eigi schema fu studeri, luku a faki di nen „ Kon sabi yu Bijbel”. Drape yu kan skrifi o ten yu o studeri Gado Wortu, awinsi yu e bigin nanga wan afu yuru nomo.

․․․․․

A bun te yu poti a ten kaba fu studeri. Ma te yu bigin studeri, dan kande yu o skreki fu si taki a no ala sani na ini Bijbel makelek fu leisi. Kande yu e denki so tu leki Jezreel, di abi 11 yari. A e taki krin: „Son pisi fu Bijbel yu musu leisi bun fu man frustan den èn son pisi no span srefisrefi.” Efu yu e denki so tu, no gi abra. Ibri leisi te yu e studeri Bijbel, yu musu si en leki a ten di yu e teki spesrutu fu arki Yehovah Gado, yu mati. Te fu kaba yu o si taki efu yu e meki a muiti, yu o lobi studeri Bijbel èn yu o feni furu bun fu en.

Begi prenspari

Te wi e begi, dan na so wi e taki nanga Gado. Prakseri fa a de wan kefalek bigi kado taki wi man begi! Yu kan taki nanga Yehovah Gado awinsi o lati a de, awinsi na deiten, noso awinsi na neti. Ala ten a de klariklari fu arki yu. San moro moi, na taki a wani arki san yu wani taigi en. Dati meki Bijbel e gi yu a deki-ati disi: „Begi Gado ala ten, begi en fayafaya èn taki en tangi tu. Na so a o kon sabi san unu wani aksi en.”​—Filipisma 4:6.

Soleki fa a tekst dati e sori, dan yu kan taki nanga Yehovah fu difrenti sani. Yu kan taki nanga en fu den problema di yu abi noso den sani di e gi yu broko-ede. Yu kan taki en tangi tu fu den sani di yu breiti fu abi. Na so yu e du nanga den mati fu yu tu, toch? Yu e taki den tangi gi den bun sani di den du gi yu, a no so? Yu kan du a srefi tu nanga Yehovah, di du moro gi yu leki iniwan tra mati di yu kan abi.​—Psalm 106:1.

Skrifi wan tu sani na ondrosei gi san yu wani taki Yehovah tangi.

․․․․․

A no de fu taki dati sani de tu di e meki yu frede son leisi noso di e gi yu broko-ede. Psalm 55:22 e taki: „Trowe yu hebi na tapu Yehovah, dan en srefi o horibaka gi yu. Noiti a o gi pasi taki wan reti-ati sma degedege.”

Na ondrosei yu kan skrifi iniwan sani di e meki yu frede noso di e gi yu broko-ede èn di yu wani taki fu den na ini begi.

․․․․․

San yusrefi ondrofeni nanga Yehovah

Wan tra sani de di yu no musu frigiti te yu tron wan mati fu Gado. A psalm skrifiman David ben skrifi: „Tesi èn si taki Yehovah bun” (Psalm 34:8). Leti fosi David skrifi Psalm 34, a ben miti wan muilek situwâsi di ben meki a frede. A ben e lon gi Kownu Saul di ben wani kiri en. A sani dati ben meki a sari èn a ben gi en furu broko-ede. Baka dati a ben musu suku kibri na den Filisteasma di ben de en feanti. David ben si taki na dede a ben o dede. Dati meki a du neleki a ben law èn na so a ben man komoto drape.​—1 Samuel 21:10-​15.

David no ben denki taki na ensrefi du sani na so wan fasi taki a ben man lowe so taki a no dede. Na presi fu dati, a ben taki dati na Yehovah frulusu en. Na ini Psalm 34:4 a ben skrifi: „Di mi begi Yehovah fu a yepi mi, a piki mi. Ne a meki taki mi no ben frede moro”. Sobun, na David srefi ben ondrofeni fa Yehovah yepi en. Dati meki a ben man gi trawan deki-ati fu „tesi èn si taki Yehovah bun”. *

Yu sabi wan ten ete di yu ondrofeni wan sani na ini yu libi di meki taki yu de seiker dati Yehovah lobi yu? Efu yu e memre dati, dan skrifi en na ondrosei. Na ondrofenitori fu yu no abi fu de wan kefalek sani. Pruberi fu denki fu pikinpikin blesi di yu e kisi ibri dei, kande sani di yu no ben o poti prakseri na den srefi.

․․․․․

Kande yu papa nanga mama leri yu sani fu Bijbel. Efu dati de so, dan dati na wan blesi. Toku yu srefi musu du muiti fu tron wan mati fu Gado. Efu yu no du dati ete, dan yu kan gebroiki den sani na ini a kapitel disi fu yepi yu. Yehovah o blesi a muiti di yu e meki. Bijbel e taki: „Tan aksi, dan unu o kisi. Tan suku, dan unu o feni.”​—Mateyus 7:7.

YU KAN LEISI MORO FU A TORI DISI NA INI KAPITEL 38 NANGA 39, FU DEEL 1

NA INI A TRA KAPITEL

Yu e feni en muilek fu fruteri trawan fu Gado? Leri fa yu kan opo taki gi a bribi fu yu.

[Futuwortu]

PRENSPARI TEKST

„Koloku fu den sma di sabi taki den abi Gado fanowdu.”​—Mateyus 5:3.

SAN YU KAN DU

Efu yu e leisi fo bladzijde fu Bijbel ibri dei, yu kan kaba leisi en na ini wán yari.

YU BEN SABI A SANI DISI?

Efu yu e leisi a buku disi èn yu e teki den moi rai fu Bijbel di skrifi na ini, dan dati e sori taki Yehovah e poti prakseri na yu.​—Yohanes 6:​44.

SAN MI O DU

Fu man kisi moro wini te mi e studeri Bijbel, mi musu ․․․․․

Fu man tron wan sma di e begi moro, mi musu ․․․․․

San mi wani aksi mi papa nanga mama fu a tori disi ․․․․․

SAN YU E DENKI?

● Fa yu kan kon lobi studeri Bijbel?

● Fu san ede Yehovah wani arki den begi fu sondu libisma?

● San yu kan du fu meki den begi fu yu de moro bun?

[Prenspari pisi]

„Di mi ben moro yongu, mi ben e begi den srefi sani baka ibri dei. Now mi e pruberi fu taki fu den bun sani nanga den ogri sani di miti mi ibri dei. Fu di ibri dei tra sani e pasa, meki disi e yepi mi fu no taki den srefi sani ibri leisi baka.’’​—Eve

[Faki]

 Kon sabi yu Bijbel

1. Suku wan Bijbel tori di yu wani leisi. Begi fu kisi koni so taki yu kan frustan san yu e leisi.

2. Leisi nanga ala yu prakseri. No hasti, teki yu ten fu leisi. Prakseri fa sani ben de ini a tori di yu e leisi. A musu de neleki a e pasa trutru na yu fesi. Pruberi fu si san e pasa, pruberi fu yere a sten fu den sma ini a tori, pruberi fu smeri fa a presi de, pruberi fu tesi a nyanyan, èn go so moro fara. Meki a tori de neleki yusrefi de drape!

3. Prakseri den sani di yu leisi didyonsro. Aksi yusrefi den sani disi:

● Fu san ede Yehovah poti a tori disi na ini en Wortu?

● Sortuwan fu den sma na ini a tori de wan bun eksempre di mi kan teki èn sortuwan fu den na wan eksempre fu warskow mi?

● San mi kan leri fu a tori disi?

● San a tori disi e leri mi fu Yehovah èn a fasi fa a e du sani?

4. Begi syatu. Fruteri Yehovah san yu leri fu a pisi fu Bijbel di yu studeri èn fruteri en fa yu wani du den sani na ini yu eigi libi. No frigiti fu taki Yehovah tangi ala ten gi a moi kado di a gi yu, dati na en Wortu, Bijbel!

[Prenki]

„Yu wortu na wan lampu gi mi futu èn wan leti na tapu mi pasi.”​—Psalm 119:105.

[Faki]

Luku san na den moro prenspari sani

Yu no abi ten fu begi? Yu no abi ten fu studeri Bijbel? A kan yepi te yu go luku san na den moro prenspari sani fu du.

Pruberi a sani disi: Teki wan emre, dan yu e poti wan tu bigi ston na ini en. Furu na emre now nanga santi teleki a doro a lanki. Now yu abi wan emre nanga ston èn santi.

Leigi na emre now, ma poti a santi nanga den ston na wan presi pe yu kan gebroiki den baka. Now yu o furu na emre baka, ma tra fasi: Furu na emre nanga a santi fosi èn baka dati pruberi fu poti den ston na ini na emre. Presi no de moro fu poti den srefi ston baka? Dati e kon fu di yu poti a santi fosi na ini na emre.

San na a les? Bijbel e taki: „Kon sabi san na den moro prenspari sani” (Filipisma 1:10). Te yu e poti pikinpikin sani, soleki den sani di yu e du fu relaks pikinso, na a fosi presi, yu no o abi ten noiti gi den prenspari sani na ini yu libi, dati na den sani di yu e du fu dini Gado. Ma efu yu e teki a rai fu Bijbel, dan yu o si taki yu o abi ten fu du sani na ini a diniwroko fu Gado èn yu o abi ten tu fu relaks. Sobun, luku san yu e poti fosi na ini na emre!

[Prenki]

Neleki fa yu musu meki muiti fu sorgu wan bromki na ini wan patu so taki a e gro bun, na so yu musu meki muiti fu sorgu taki yu tron wan mati fu Gado