Baka di Yesus go na a Paskafesa fu a yari 30, den poti Yohanes a Dopuman na strafu-oso. Sobun, a de drape wan pisi ten kaba. Yohanes ben wani taki den disipel fu en ben musu tron disipel fu Yesus. Ma na ini den mun di Yohanes de na strafu-oso sonwan fu den no tron bakaman fu Yesus.

Now a Paskafesa fu a yari 31 e doro èn son disipel fu Yohanes e kon na Yesus. Den e aksi: „Fu san ede den disipel fu yu no e faste, aladi wi nanga den Fariseiman e du dati?” (Mateyus 9:14) Den Fariseiman e faste, ma gi den dati na wan gwenti nomo di abi fu du nanga a bribi fu den. Bakaten Yesus taki fu a sani disi na ini wan fu den agersitori fu en. A fruteri fu wan Fariseiman di ben feni taki a bun moro trawan èn di ben begi: „Ke, mi Gado, mi e taki yu tangi taki mi no de leki den tra sma. . . . Tu tron wan wiki mi e faste” (Lukas 18:11, 12). A kan taki den disipel fu Yohanes e faste tu fu di a de wan gwenti nomo. Noso kande den e faste fu sori taki den e sari taki sma poti Yohanes na strafu-oso. Den sma di e si san e pasa e aksi densrefi fu san ede den disipel fu Yesus no e faste tu. Kande den feni taki den musu faste makandra nanga den disipel fu Yohanes fu sori taki den e sari fu a sani di pasa nanga Yohanes.

Yesus e piki den nanga wan agersitori. A e taki: „Den mati fu a trowmasra no abi fu sari, solanga a trowmasra de nanga den ete, a no so? Ma a ten sa kon te sma o puru a trowmasra na den mindri, dan den o faste.”​—Mateyus 9:15.

Yohanes srefi ben agersi Yesus nanga wan trowmasra (Yohanes 3:28, 29). Dati meki den disipel fu Yesus no e faste solanga Yesus de nanga den. Bakaten te Yesus dede den disipel fu en o sari èn den no o wani nyan. Ma sani o de heri tra fasi te a o kisi wan opobaka! Dan den no o abi fu faste moro fu di den e sari.

Baka dati Yesus e fruteri tu agersitori. A e taki: „Nowan sma e nai wan nyun pisi krosi na tapu wan owru dyakti, bika a nyun pisi krosi kan hari a dyakti priti èn a priti o kon moro bigi. Sosrefi, sma no e poti nyun win na ini owru winsaka. Efu den e du dati, den winsaka o priti, a win o komoto na ini èn den winsaka no o bun moro. Ma te sma e poti nyun win na ini nyun winsaka, dan nowan fu den tu o lasi gowe” (Mateyus 9:16, 17). San Yesus wani sori nanga den agersitori disi?

A wani sori den disipel fu Yohanes a Dopuman taki den no musu fruwakti taki den bakaman fu en o hori densrefi na den gwenti fu a Dyu bribi, soleki a faste di sma e faste. A no kon fu moksi wan nyun fasi fu anbegi nanga wan owru fasi fu anbegi di ben de hondrohondro yari kaba èn di no ben o teri moro. A fasi fu anbegi di Yesus e leri sma no e kruderi nanga den leri èn den gwenti di den kerki fesiman fu a Dyu bribi ben e leri sma na a ten dati. Sobun, a no kon fu ’nai wan nyun pisi krosi na tapu wan owru dyakti’ noso fu ’poti nyun win na ini owru winsaka’ di kon drei.