Wan pisi ten kaba Yesus de na ini a kontren fu Perea di de na abrasei fu Yordan-liba (Yohanes 10:40). Now a e hari go na Yerusalem di de na a zuidsei.

Yesus no de en wawan. Den disipel fu en de nanga en, sosrefi „wan heri ipi sma” (Lukas 14:25; 15:1). Sonwan fu den sma dati na sondari nanga sma di e teki belasting-moni gi lanti. Den Fariseiman nanga den leriman fu Wet di e krutu den sani di Yesus e taki èn e du, de drape tu. Den musu go denki san Yesus ben wani sori den nanga den agersitori fu a lasi skapu, fu a lasi manpikin, èn fu a gudu man nanga Lasarus.​—Lukas 15:2; 16:14.

Te Yesus e bigin taki nanga den disipel fu en, a e prakseri kande fa den gensman fu en ben krutu en èn fa den ben spotu en. A e taki baka fu wan tu sani di a ben leri den na ini Galilea.

Wan fu den sani di Yesus e taki, na disi: „A tru taki sani o pasa di o meki sma fadon. Ma helu fu a sma di e du sani fu meki trawan fadon! . . . Poti prakseri na unsrefi. Efu yu brada du wan sondu teige yu, gi en wan piri-ai. Efu a abi berow, gi en pardon. Awansi na seibi tron wan dei a du wan sondu teige yu èn seibi tron a kon baka na yu èn a taki: ’Mi abi berow’, toku yu musu gi en pardon” (Lukas 17:1-4). Kande a lasti sani di Yesus taki e meki Petrus prakseri a wan leisi di a ben aksi Yesus efu na seibi leisi a musu gi sma pardon.​—Mateyus 18:21.

Den disipel o man du san Yesus leri den? Te den e aksi Yesus „Masra, gi wi moro bribi”, dan Yesus e gi den a dyaranti disi: „Efu a bribi fu unu ben pikin leki wan mosterd-siri èn unu ben o taigi a bigi moerbei-bon disi: ’Rutu yusrefi puru, dan yu go prani yusrefi na ini se!’, a bon ben o du san unu taki” (Lukas 17:5, 6). Iya, awansi wan sma abi pikinso bribi nomo, toku a man du bigi sani.

Dan Yesus e sori den moro krin fu san ede a prenspari fu abi sakafasi èn fu no denki tumusi furu fu densrefi. A e taigi den apostel: „Suma fu unu di abi wan srafu di e plugu a gron noso di e luku den meti, o taigi a srafu te a komoto fu a gron: ’Kon dya wantewante, dan yu go sidon na tafra’? Na presi fu dati unu o taigi a srafu: ’Go sreka wan sani meki mi nyan, weri wan fesikoki, èn tyari sani kon gi mi teleki mi kaba nyan èn dringi. Baka dati yu kan go nyan èn dringi’. Unu denki taki wan masra o taigi en srafu tangi bika a srafu du san a ben musu du? Na so a musu de tu nanga unu. Te unu du ala san unu kisi fu du, dan un musu taki: ’Wi na srafu di no warti noti. Wi du san wi ben musu du.’”​—Lukas 17:7-10.

Ibri futuboi fu Gado musu frustan o prenspari a de fu poti den afersi fu Gado na a fosi presi. Boiti dati, ibriwan fu den musu hori na prakseri taki a de wan grani fu anbegi Gado leki wan futuboi na ini na oso fu en.

Soleki fa a sori, dan syatu baka di Yesus taki nanga den disipel fu en, wan sma e tyari wan boskopu kon fu Maria nanga Marta. Den tu uma disi na sisa fu Lasarus èn den e libi na Betania na ini Yudea. A boskopuman e taki: „Masra, yu mati di yu lobi so te, siki.”​—Yohanes 11:1-3.

Aladi Yesus kon sabi taki en mati Lasarus siki seryusu, toku a no e sari tumusi. Na presi fu dati a e taki: „A siki disi no o meki a dede, ma a o meki Gado kisi glori, èn na so a Manpikin fu Gado o kisi glori tu.” A e tan ete tu dei drape, dan a e taigi den disipel fu en: „Kon meki wi go na Yudea baka.” Ma den e taki: „Leriman, no so langa pasa den sma fu Yudea ben wani trowe ston na yu tapu fu kiri yu, dan toku yu e go drape baka?”​—Yohanes 11:4, 7, 8.

Yesus e taki: „Deiten e tan twarfu yuru langa, a no so? Efu wan sma e waka na deiten, a no o stotu en futu na wan sani, bika a e si a leti di e skèin gi libisma. Ma efu wan sma e waka na neti,  a o stotu en futu, fu di a leti no de na ini en” (Yohanes 11:9, 10). Kande Yesus wani sori den sma taki a ten di Gado poti fu a kaba a diniwroko fu en no doro ete. Fu di a no abi furu ten moro, meki a musu du so furu leki a man.

Yesus e taki moro fara: „Wi mati Lasarus e sribi, ma mi e go drape fu wiki en.” Soleki fa a sori, dan den disipel e denki taki Lasarus e sribi trutru èn taki a o wiki baka. Dati meki den e taki: „Masra, efu a e sribi, a o kon betre.” Yesus e taigi den krin: „Lasarus dede. . . . Ma kon meki wi go na en.”​—Yohanes 11:11-15.

Tomas sabi taki sma kan kiri Yesus na ini Yudea, ma toku a wani horibaka gi en. Dati meki a e taigi den tra disipel: „Kon meki wi go tu, dan wi o dede nanga en.”​—Yohanes 11:16.