Si sani soleki fa Gado e si den

TINAFO SEPTEMBER 2002, ben de wan moi dei na ini a foto New York, Amerkankondre. A dei dati, wan bigi grupu fu 6521 sma fu difrenti kondre ben kon makandra na a Patterson Skoro Centrum èn sosrefi na tu tra presi fu Yehovah Kotoigi, namku na ini Brooklyn nanga Wallkill. Ala den sma disi ben kon makandra fu si a di fu 113 klas fu a Waktitoren Bijbelskoro Gilead, di ben kaba a skoro dati nanga bun bakapisi. Den studenti ben komoto na 14 kondre. Feifi mun langa den ben sreka densrefi fu go dini leki zendeling na 19 difrenti kondre.

A fesiman fu a programa ben de Carey Barber. A brada disi di pasa 97 yari, na wan memre fu a Tiri Skin fu Yehovah Kotoigi. A ben poti prakseri na a fasi fa sani waka na ini den pikinmoro 60 yari di a Gileadskoro e hori èn na a fasi fa a skoro disi sreka dusundusun sma fu dini leki zendeling. Brada Barber ben taki: „Wi no e meki bigi te wi taki dati a leri di den kisi dyaso, meki taki den abi tumusi bun bakapisi. Iya, den zendeling di leri fa fu yepi trawan moro bun, ben man yepi dusundusun safri-ati sma na heri grontapu fu gi den libi abra na Yehovah, so taki den sma disi ben kan teki a tru anbegi èn ben kan du santa diniwroko.”

Furu fu den studenti di ben de na a skoro a yari disi, ben sori taki den ben wani du moro na ini a diniwroko fu den, srefi bifo den kon na a skoro. Wán trowpaar ben teki wan heri yari fu leri Sneisitongo, so taki den kan yepi furu fu den Sneisi di e tan na ini a kontren pe den ben e libi na ini Kanada. Wan tra trowpaar ben bosroiti fu bigin leri Albaneisitongo. Bakaten den froisi go na Albania fu go yepi drape fu di moro nanga moro sma na ini a kondre dati wani kon sabi moro fu Bijbel. Tra brada nanga sisa fu a klas disi ben komoto fu Hongaria, Gwatemala, nanga a Dominikan Republiek. Den ben froisi go na den kondre disi fu dini pe moro leriman fu a Wortu fu Gado ben de fanowdu.

Ma now, fosi den studenti disi di kaba a skoro ben o kisi a frantwortu fu go du diniwroko na ini Afrika, Owstu-Europa, Centraal nanga Zuid-Amerika, èn sosrefi na ini kondre na a Fara Owstusei, dan den ben e kisi deki-ati fu prakseri Gado na ini ala den sani di den o du.

Si sani soleki fa Gado e si den

Baka di brada Barber ben opo a konmakandra, dan a ben kari brada Maxwell Lloyd, di na wan memre fu a Bijkantoro Komte fu Amerkankondre. A brada disi ben taki fu a pisi tori, „Si ala sani soleki fa Gado e si den”. Brada Lloyd ben poti prakseri na a eksempre fu David nanga a di fu Yesus, a Manpikin fu Gado (1 Samuel 24:6; 26:11; Lukas 22:42). A takiman ben memre den studenti taki na ini den feifi mun di den ben kisi leri na a skoro, den ben kon frustan fa den kan si sani soleki fa Gado e si den. Baka dati a ben aksi den: „San yu o du te yu e studeri Bijbel dyonsro nanga sma na ini a kondre pe yu e go? Yu sa leri den fu si sani soleki fa Gado e si den?” Di a ben taki fu a fasi fa den musu gi trawan rai, dan a ben taigi den: „No taki: ’Soleki fa mi e si a tori, dan mi denki . . . ’ Na presi fu dati yu musu yepi den fu kon frustan fa Gado e si a tori. Efu yu wroko na a fasi disi, dan yu sa sori fu de wan trutru blesi gi den wan di sa abi demakandra nanga yu, na ini a kondre pe yu sa go dini.”

A tra takiman ben de Gerrit Lösch, wan memre fu a Tiri Skin. A ben e taki fu a pisi tori, „Mi de  na nanga yu”. A ben poti prakseri na den furu okasi pe Yehovah ben taigi den getrow futuboi fu en: „Mi de nanga yu” (Genesis 26:23, 24; 28:15; Yosua 1:5; Yeremia 1:7, 8). Wi di e libi na ini a ten disi, kan frutrow tapu Yehovah na a srefi fasi efu wi tan du a wani fu en doronomo. Brada Lösch ben taki: „Yu e aksi yusrefi efu yu sa feni sma fu studeri Bijbel nanga den? Memre taki Yehovah ben taki: ’Mi de nanga yu’. Yu e aksi yusrefi efu yu o feni ala den sani di yu sa abi fanowdu na ini yu aladei libi? We, Yehovah ben taki: ’Mi no sa gowe libi yu kwetikweti, èn noiti mi no sa drai mi baka gi yu’” (Hebrewsma 13:5). Na a kaba fu a takimakandra, dan brada  Lösch memre den studenti taki Yesus ben pramisi taki a ben o de nanga den bakaman fu en, efu den ben o tan du a wroko fu meki disipel.—Mateyus 28:20.

„Yu sa man fu tan horidoro te yu e kisi tesi di de leki faya?” Dati ben de a nen fu a lezing di Lawrence Bowen, wan fu den leriman fu a skoro, ben hori. A ben taki dati den strei di ben kon na fesi na ini Eden, meki taki ala den sma di ben wani dini Yehovah wawan, ben kisi fu du nanga bigi problema, èn ten na ten, nanga hebi tesi di de leki faya. A ben gi den studenti disi deki-ati fu teki na eksempre fu Yesus, di ben e horidoro te a ben e kisi tesi fu di a ben e frutrow dorodoro tapu Yehovah. Yehovah ben gi pasi taki hebi tesi di ben de leki faya ben kan kon na Yesus tapu, so taki a fasi fa a Manpikin fu Yehovah ben e gi yesi, ben kan kon de volmaakti  dorodoro. Yesus fu en sei, ben de klariklari fu teki ibriwan fu den tesi disi (Hebrewsma 5:8, 9). Wi kan teki Yehovah gersi nanga wan sma di e bron gowtu fu meki a kon soifri. A sabi soifri omeni faya a musu gebroiki fu bron a gowtu fu man puru ala doti. Efu bribi kan tan tranga srefi te a e kisi fu du nanga tesi di de leki faya, dan a no de fu taki dati so wan bribi kan kibri wan sma moro leki gowtu di sma e bron fu meki a kon soifri. Fu san ede? Brada Bowen ben taki: „Bika bribi di meki kon soifri kan pasa ibriwan tesi di a sa kisi, èn a e meki taki wi man horidoro sosrefi te na ’a kaba’.”—Mateyus 24:13.

Wan tra leriman fu a Gileadskoro na brada Mark Noumair. A brada disi ben aksi: „Sma sa lobi yu?” A lezing fu en ben abi fu du nanga 1 Samuel 2:26. Drape skrifi taki ’Yehovah èn sosrefi libisma, ben lobi Samuel’. Baka di brada Noumair ben taki fu na eksempre fu Samuel, dan a brada disi di ben dini leki zendeling na ini Afrika moro leki tin yari langa, ben taki moro fara: „Yu kan tron wan sma tu di Gado lobi, efu yu tan du a wroko di a ben gi yu fu du, soifri soleki fa a leri yu fu du dati. A gi yu a tumusi warti diniwroko leki zendeling.” Baka dati brada Noumair ben taki moro fara nanga den studenti di ben kaba a skoro nanga bun bakapisi. A ben gi den a deki-ati fu si a zendeling wroko fu den leki wan santa frantwortu di Gado gi den. A ben gi den a deki-ati sosrefi fu du a wroko disi soleki fa Gado wani taki den musu du en.

Na a pisi ten di a skoro ben e hori, dan den studenti ben kisi furu okasi na a kaba fu ibri wiki, fu taki nanga sma na ini a kontren fu den „tumusi moi sani di Gado du” soleki fa Bijbel e sori dati (Tori fu den Apostel 2:11). Te yu luku en bun, dan den studenti disi ben man taki fu den tori disi na ini sowan tin difrenti tongo. Wallace Liverance, di na wan leriman fu Gileadskoro sosrefi, ben taki nanga wan tu fu den studenti di ben e fruteri den ondrofenitori fu den. A nen fu a takimakandra fu en ben de, „’Den tumusi moi sani di Gado du’ e meki sma du bun wroko”. A ben taki: „A yeye fu Gado ben meki taki den wan di ben de na ini a tapusei kamra na a Pinksterfesa, ben kisi na angri fu taki fu den ’tumusi moi sani di Gado du’. A srefi yeye dati e wroko na ini a ten disi na tapu ala den futuboi fu Gado di e du soifri san a wani.” A yeye disi naki na ati fu son wan fu den srefi fu go leri wan tra tongo, so taki den ben man preiki gi moro furu sma.

Bun rai di e yepi wi fu si sani soleki fa Gado e si den

Baka den lezing na a bigin fu a programa, dan Gary Breaux nanga William Young, di na memre fu a Bethelfamiri fu Amerkankondre, ben abi wan takimakandra nanga brada fu difrenti bijkantoro komte di de na ini kondre pe zendeling e dini na a momenti disi. Den ben taki sosrefi nanga wan trowpaar di de na ini a zendelingwroko, moro leki 41 yari kaba. Wan sani di ben kon na fesi ben de taki: „Den wan di no e feti fu abi wan tumusi switi libi, e tan moro langa na ini a zendelingwroko. Den e hori na prakseri nanga sortu marki den ben kon. Den sabi taki den ben kon fu preiki a bun nyunsu èn fu yepi sma fu kon sabi Yehovah.”

David Splane, wan tra memre fu a Tiri Skin, ben tapu a konmakandra nanga wan lezing di ben abi leki nen „Yu no e go farawe!” Te yu luku en bun, dan den 46 studenti di ben klari a skoro nanga bun bakapisi, ben o seni go now na difrenti kondre fu grontapu. Sobun, san a brada disi ben wani taki nanga a pisi tori di a tyari kon na fesi? A ben fruklari: „Awinsi pe fu grontapu yu sa go, yu sa de na ini na oso fu Gado, so langa leki yu e tan du a wroko di a ben gi yu fu du.” Iya, ala Kresten di e tan du a wani fu Gado, awinsi pe fu grontapu den de, e dini na ini wan pisi fu a bigi yeye tempel, noso na oso fu Gado, di seti na a ten di Yesus teki dopu na ini a fosi yarihondro (Hebrewsma 9:9). A ben de wan bigi trowstu gi den arkiman fu sabi taki Yehovah de krosibei fu ala den futuboi fu en di e tan du san a wani, awinsi pe den de na grontapu. Neleki fa Yehovah ben poti prakseri na Yesus di a ben de dyaso na grontapu, na so A e poti prakseri tu na ibriwan fu wi. A wani sabi sosrefi fa a e go nanga a diniwroko di wi e du gi en, awinsi pe wi de. Sobun, na ini afersi di abi fu du nanga na anbegi fu wi, wi noiti no de fara fu makandra, noso fu Yehovah nanga Yesus.

Baka dati den brada ben meki bekènti taki brada fu difrenti pisi fu grontapu ben seni taki odi. Den ben taki sosrefi na sortu kondre den difrenti studenti ben o go. Dan den ben leisi wan brifi di a klas ben skrifi fu sori warderi gi a leri di den ben kisi tapu a Gileadskoro. Di ala den sani disi ben kaba, dan a fesiman ben tapu a programa na wan fasi di fiti. A ben gi den nyun zendeling a deki-ati fu go doro nanga a bun wroko fu den èn fu prisiri na ini a diniwroko fu Yehovah.—Filipisma 3:1.

[Faki na tapu bladzijde 23]

WAN TU SANI FU A KLAS DISI

Nomru fu kondre pe den komoto: 14

Nomru fu kondre pe den e go fu dini: 19

Nomru fu studenti: 46

Gemiddeld yari di den abi: 35,0

Gemiddeld yari di den de na ini waarheid: 17,2

Gemiddeld yari na ini a furuten diniwroko: 13,7

[Prenki na tapu bladzijde 24]

A di fu 113 klas fu a Waktitoren Bijbelskoro Gilead di klari a skoro nanga bun bakapisi

Den nen di de fu si na ondrosei, poti na ini rei di nomru fu fesisei go na bakasei, èn den nen poti fu a kruktu-anusei go na a reti-anusei na ini ibri rei.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.