Na ini owruten furu pipel ben abi a gwenti fu anga son ogriman na wan postu te den ben kisi dedestrafu. Den Romesma ben e tai noso spikri so wan sma na wan postu pe a ben tan anga omeni dei langa teleki a dede fu skin-ati, dreiwatra, angri, alen nanga a faya son. Gi den Romesma, a ben de wan syen te wan sma ben spikri na wan postu, fu di disi ben de wan strafu gi den moro bigi ogriman.

Fa a ben de nanga den Israelsma fu owruten? A de so taki den ben abi a gwenti fu anga ogriman na wan postu te den ben gi den dedestrafu? A Wèt fu Moses ben taki: „Kon meki wi taki dati wan sma kisi dedestrafu fu wan sondu di a du. Te unu kiri en èn unu anga en na wan postu, dan un no musu meki en dedeskin anga drape heri neti. Awinsi fa a no fa, un musu beri en a srefi dei dati” (Deut. 21:22, 23). Soleki fa a sori, te wan sma na ini a ten fu den Hebrew Buku fu Bijbel ben kisi dedestrafu, dan den ben kiri en fosi èn baka dati den ben anga en na wan postu noso na wan bon.

Lefitikus 20:2 e taki fu a tori disi: „Efu wan Israelsma noso wan trakondre sma di e tan na ini Israel, gi en pikin na a gado Molek, dan un musu kiri a sma dati. Den sma fu a kondre musu trowe ston na en tapu teleki a dede.” Efu wan sma ’ben e wroko nanga ogri yeye, noso efu a ben e du lukuman-wroko’, dan den ben kiri en. Fa? Den ben „musu trowe ston na en tapu teleki a dede”.—Lef. 20:27.

Deuteronomium 22:23, 24 e taki: „Efu wan man na ini wan foto didon nanga wan nyunwenke di abi mofo fu trow nanga wan tra man, dan un musu tyari den go na a portu fu a foto dati, èn un musu trowe ston na den tapu teleki den dede. Na uma musu dede, fu di a no bari na ini a foto. A man musu dede, fu di a didon nanga a wefi fu en kondreman. Na so unu musu puru ogri na un mindri.” Sobun, den Israelsma fu a ten dati ben abi a gwenti fu ston den moro bigi ogriman kiri. *

Deuteronomium 21:23 e taki dati „wan sma di anga na wan postu, na wan sma di Gado fluku”. A no de fu taki dati a ben o abi furu krakti na tapu den Israelsma te den ben o si fa a dedeskin fu „wan sma di Gado fluku” ben e anga na wan postu. Te a dedeskin fu so wan sma ben anga na wan postu noso na wan bon, dan dati ben de wan warskow gi trawan.