SOWAN tin yari pasa, Gregorio nanga Marilou, wan trowpaar di ben pasa 30 yari kaba, ben e pionier na Manila, aladi den ben abi den grontapuwroko tu. A no ben makriki gi den, ma toku den ben man pionier. Ne Marilou kisi wan moro hei posisi na a bangi pe a ben e wroko. A e taki: „Fu di wi ben abi wan bun wroko, meki wi ben man libi wan switi libi.” Fu taki en leti, sani ben waka so bun gi den, taki den bosroiti fu bow na oso di den ben wani langa ten kaba, na ini wan bun birti sowan 19 kilometer owstusei fu Manila. Den meki wan kontrakti nanga wan sma fu bow na oso gi den èn den seti sani fu pai gi na oso ibri mun, tin yari langa.

Marilou e fruteri: „A nyun wroko fu mi ben teki so furu ten nanga krakti fu mi taki mi no ben de fayafaya moro na ini a diniwroko. A ben de neleki mi ben fufuru san de fu Yehovah.” A e taki tu: „Na presi fu gebroiki a ten fu Yehovah fu du a diniwroko fu en, mi ben gebroiki dati now fu du tra sani.” Fu di Gregorio nanga Marilou no ben lobi a tori, meki den  sidon taki nanga makandra wan dei fu luku san den ben o du nanga den libi. Gregorio e taki: „Wi ben wani kenki wi libi, ma wi no ben sabi fa wi ben musu du dati. Wi luku fa wi ben kan du moro gi Yehovah na ini a preikiwroko, spesrutu fu di wi no abi pikin. Wi begi Yehovah fu a yepi wi.”

Na a ten dati den yere lezing di ben e taki fa sma kan go dini na presi pe moro Kownukondre preikiman de fanowdu. „Wi ben abi a firi taki den lezing disi ben de a piki fu Yehovah na tapu den begi fu wi,” na so Gregorio e taki. Gregorio nanga Marilou begi fu kisi moro bribi so taki den ben kan abi a deki-ati fu teki a yoisti bosroiti. Wan sani di ben tapu den fu du moro na taki den ben e bow na oso fu den. Ma den ben pai dri yari kaba gi na oso. San den ben o du? Marilou e taki: „Efu wi ben o broko a kontrakti fu wi, dan wi ben o lasi ala a moni di wi ben pai kaba èn dati ben de furu moni. Ma wi si disi leki wan okasi fu sori san de moro prenspari gi wi: Du san Yehovah wani noso du san wisrefi wani.” Ne den prakseri den wortu fu na apostel Paulus di ben taki dati ’a drai baka gi ala sani’. Dati meki den no bow na oso fu den go doro, den tapu nanga a grontapuwroko fu den, den seri furu fu den sani di den ben abi èn den froisi go na wan farawe dorpu na a èilanti Palawan, sowan 480 kilometer zuidsei fu Manila.—Fil. 3:8.

Fosi Gregorio nanga Marilou froisi, den pruberi fu sreka densrefi fu libi nanga den moro prenspari sani, ma den no ben sabi o furu sani den no ben o abi drape. „Di mi doro, mi skreki,” na so Marilou e taki. „Stroom no ben de èn sani no ben makriki kwetikweti. Na presi fu bori nanga rice-cooker, wi ben abi fu kapu udu fu man bori. Mi no ben man go na mall noso restaurant èn mi no ben man du den tra sani di sma e du te den e libi na foto.” Ma toku den hori na prakseri fu san ede den froisi èn baka wan syatu pisi ten den teki gwenti. Marilou e taki: „Now mi lobi fu luku den sani na wi lontu soleki den moi stari na hemel. Ma a moro prenspari sani na taki wi e firi bun fu si fa sma e prisiri te wi e preiki gi den. Now di wi e dini dyaso, wi ’kon sabi san a wani taki’ fu no abi furu sani.”—Fil. 4:12.

Gregorio e fruteri: „Di wi doro dyaso, fo Kotoigi nomo ben de. Den ben breiti taki mi bigin hori lezing gi den ibri wiki èn taki mi ben e prei Kownukondre poku na tapu mi gitara te den ben e singi.” Baka wán yari, Gregorio nanga Marilou si fa wan pikin grupu sma tron wan fayafaya gemeente fu 24 preikiman. Gregorio e taki: „A e naki wi ati trutru te den sma na ini a gemeente e sori wi fa den lobi wi.” Te Gregorio nanga Marilou e prakseri den siksi yari  di den e dini na a farawe presi dati, den e taki: „A e gi wi bun furu prisiri te wi e si omeni nyun sma e kon na ini a gemeente. Now wi e firi moro koloku fu di wi du wan bun sani nanga wi libi.”

Na ini den Filippijnen, sowan 3000 brada nanga sisa froisi go na kontren pe moro Kownukondre preikiman de fanowdu. Sowan 500 fu den na sisa di no trow. Teki Karen fu eksempre.

Karen di pasa 25 yari kaba gro kon bigi na ini Baggao, Cagayan. Sensi di a ben de wan tini, a ben wani du moro na ini a diniwroko. A e fruteri: „Mi sabi taki furu ten no de moro èn taki ala sortu sma musu yere a Kownukondre boskopu ete. Dati meki mi ben wani dini pe moro preikiman de fanowdu.” Furu famiriman fu Karen ben gi en deki-ati fu teki moro hei skoroleri na presi fu froisi go na wan farawe presi fu preiki. Aladi dati ben de so toku a begi Yehovah fu yepi en. A go taki tu nanga sma di e dini na farawe presi. Di a ben abi 18 yari, a froisi go na wan kontren di de sowan 64 kilometer fu a foto fu en.

A pikin gemeente di Karen go yepi, e preiki na ini bergikontren di de na a sesyoro fu a Stille Oceaan. Karen e taki: „Fu go na a nyun gemeente fu Baggao, wi waka dri dei, wi abra omeni bergi èn 30 leisi wi abra liba.” A e taki tu: „Fu doro sonwan fu den Bijbelstudenti, mi musu waka siksi yuru, mi e sribi na a oso fu a Bijbelstudenti pe mi go èn a tra dei fu en mi e waka siksi yuru baka go na oso.” Na fu soso Karen e meki so furu muiti? „Son leisi mi futu e hati mi, ma mi hori sowan 18 Bijbelstudie kaba,” na so Karen e taki, aladi a e lafu. „Mi ’tesi èn si taki Yehovah bun’!”—Ps. 34:8.

San meki Sukhi, wan sisa di pasa 40 yari kaba èn di no trow, gowe libi Amerkankondre fu go tan na den Filippijnen? Na ini 2011 a go na wan kring konmakandra pe den interview wan trowpaar. A trowpaar disi fruteri taki den seri furu fu den sani di den ben abi so taki den ben kan froisi go na Meksikow fu yepi nanga a preikiwroko drape. Sukhi e taki: „Na interview dati meki mi go prakseri san mi wani du nanga mi libi. Noiti ete mi ben denki seryusu fu a sani disi.” A famiri fu Sukhi komoto na India. Sobun, di a yere taki furu yepi de fanowdu fu preiki gi den Punyabisma na den Filippijnen, a bosroiti fu go yepi drape. A ben makriki gi en fu du dati?

„Fu bosroiti san mi ben o hori èn san mi ben o seri, ben moro muilek leki san mi ben denki,” na so Sukhi e taki. „Baka di mi libi sowan 13 yari na ini mi eigi oso, mi ben abi fu go tan nanga mi famiri. Disi no ben makriki awansi dati ben de fu wan pisi ten nomo. Ma a ben de wan bun fasi fu sreka misrefi  gi wan libi pe mi ben o abi soso den moro prenspari sani.” Sortu tesi miti en baka di a froisi go na den Filippijnen? „Den moro bigi tesi na taki mi ben frede sani leki kakalaka nanga anansi èn mi ben e misi mi famiri. Toku mi leri fu frutrow na tapu Yehovah na wan heri tra fasi.” Na fu soso a du ala den sani disi? Sukhi e lafu èn a e fruteri: „Yehovah taigi wi: ’Luku san mi o du fu blesi unu so te, taki unu no o mankeri nowan sani.’ Mi e si taki den wortu disi tru, spesrutu te wan ososma e aksi mi: ’O ten yu o kon baka? Mi abi furu aksi ete.’ Mi e prisiri trutru taki mi man yepi sma fu kon sabi moro fu Yehovah” (Mal. 3:10). Sukhi e taki moro fara: „A moro muilek sani di mi du na taki mi teki a bosroiti fu froisi. Baka di mi du dati, a ben moi srefisrefi fu si fa Yehovah sorgu mi.”

Sime, wan brada di trow èn di pasa 35 yari kaba, gowe libi den Filippijnen fu di a ben feni wan bun wroko na wan kondre na zuidwest Asia. Di a ben de drape a kisi deki-ati fu wan kring-opziener èn fu wan lezing di wan memre fu a Tiri Skin ben hori. Dati yepi Sime fu poti Yehovah na a fosi presi na ini en libi. Sime e taki: „Mi bere ben e drai te mi ben prakseri taki mi ben o tapu nanga a wroko fu mi.” Toku a libi a wroko fu en èn a drai go baka na den Filippijnen. Now Sime nanga en wefi Haidee e dini na ini Davao del Sur, wan bigi kontren na a zuidsei pisi fu a kondre pe moro Kownukondre preikiman de fanowdu. Sime e taki: „Te mi e prakseri a ten dati, mi breiti taki mi no ben frede fu tapu nanga a wroko fu mi èn fu poti Yehovah na a fosi presi na ini mi libi. A moro bun sani di wan sma kan du nanga en libi na fu gi Yehovah ala san a abi.”

Ramilo nanga Juliet, na wan trowpaar di pasa 30 yari kaba èn den e pionier. Di den kon sabi taki wan gemeente di de sowan 30 kilometer nomo fu pe den e libi ben abi yepi fanowdu, den bosroiti fu horibaka gi a gemeente disi. Sobun, Ramilo nanga Juliet e rèi a brom fu den go na den konmakandra èn na a preikiwroko wan tu tron na ini a wiki, awansi alen e fadon noso son e skèin. Aladi a no makriki fu rèi na tapu olo-olo pasi èn fu abra udu broki di e anga na titei, toku den breiti taki bosroiti fu du moro na ini a preikiwroko. Ramilo e taki: „Mi nanga mi wefi abi 11 Bijbelstudie. A no makriki fu go dini pe moro preikiman de fanowdu, ma a e gi wi furu prisiri.”—1 Kor. 15:58.

Yu wani kon sabi san yu musu du fu go dini na presi na ini yu eigi kondre noso na ini tra kondre pe moro Kownukondre preikiman de fanowdu? Efu dati de so, dan taki nanga yu kring-opziener èn leisi na artikel di nen „Yu man ’abra kon na Masedonia’?” na ini Wi Kownukondre diniwroko fu augustus 2011.