1, 2. San Yesus du na a neti fu 14 Nisan na ini a yari 33? (Luku a prenki na a bigin fu na artikel.)

WAN furu mun de fu si na ini Yerusalem, na a neti fu 14 Nisan na ini a yari 33. Yesus nanga den apostel fu en e hori a Paskafesa fu memre a dei di Yehovah frulusu Israel fu katibo na Egepte sowan 1500 yari pasa. Baka te den hori a Paskafesa, Yesus de soso nanga den 11 apostel di tan gi yesi na en. Den e nyan wan nyanyan di wani taki wan spesrutu sani. Den bakaman fu en ben o du a srefi sani disi ibri yari fu memre a dede fu en. *—Mat. 26:1, 2.

² Yesus e begi, dan a e prati a brede sondro srudeki gi den apostel fu en. A taigi den: „Un teki a brede, nyan.” A e teki wan kan nanga win, a e begi baka, dan a e taigi den: „Un alamala musu dringi en” (Mat. 26:26, 27). A brede nanga a win wani taki wan spesrutu sani. Yesus leri den apostel fu en furu sani na a prenspari neti dati.

3. Sortu aksi wi o luku na ini na artikel disi?

 ³ Na a neti dati Yesus seti a Memrefesa fu a dede fu en. Bakaten sma kari a fesa disi na Avondmaal fu Masra noso „a neti-nyanyan fu Masra” (1 Kor. 11:20). Kande son sma e aksi densrefi: Fu san ede wi musu memre a dede fu Yesus? San a brede nanga a win wani taki? Fa wi musu sreka gi a Memrefesa? Suma mag nyan a brede èn dringi a win? Fa Kresten e sori warderi gi a howpu di Gado gi den?

4. Sortu wini a dede fu Yesus tyari kon gi wi?

⁴ Fu di wi na bakapikin fu Adam, meki wi abi sondu èn wi e dede (Rom. 5:12). Nowan sondu libisma kan pai Gado wan lusu-paiman gi ensrefi noso gi tra sma (Ps. 49:6-9). Ma fu di Yesus no ben abi sondu, meki en ben de a wan-enkri sma di ben kan gi en libi leki wan lusu-paiman. Di Yesus go na hemel, a gi Gado a waarde fu a lusu-paiman fu en. A sani disi meki taki wi kan kisi frulusu fu sondu nanga dede, èn wi kan kisi têgo libi.—Rom. 6:23; 1 Kor. 15:21, 22.

5. (a) Fa wi sabi taki Gado nanga Krestes lobi libisma? (b) Fu san ede wi musu go na a Memrefesa?

⁵ A lusu-paiman e sori taki Gado lobi libisma trutru (Yoh. 3:16). Yesus sori tu taki a lobi wi fu di a dede gi wi. Srefi fosi Yesus ben kon na grontapu, a „ben lobi den libisma srefisrefi” (Odo 8:30, 31). Wi de nanga tangi gi san Gado nanga en Manpikin du gi wi! Dati meki wi e go na a Memrefesa. Wi wani gi yesi na Yesus di ben taki: „Tan du disi fu memre mi.”—1 Kor. 11:23-25.

6. San a brede nanga a win fu a Memrefesa wani taki?

⁶ Di Yesus seti a Memrefesa, a no du wan wondru fu kenki a brede nanga a win kon tron en skin nanga en brudu. Na presi fu dati a taki fu a brede: „Disi wani taki mi skin.” A ben taki fu a win: „Disi wani taki mi ’brudu fu a frubontu’ di o kanti trowe, so taki furu sma kan feni bun” (Mark. 14:22-24). Sobun, a de krin taki a brede nanga a win na sani di e agersi en skin nanga en brudu.

7. San a brede fu a Memrefesa e agersi?

⁷ Na a tumusi prenspari neti dati na ini a yari 33, Yesus gebroiki brede sondro srudeki di ben tan abra fu a Paskafesa (Eks. 12:8). Son leisi Bijbel e agersi sondu nanga srudeki (Mat. 16:6, 11, 12; Luk. 12:1). Sobun, a brede sondro srudeki di Yesus gebroiki e agersi a skin fu Yesus di no ben abi sondu (Hebr. 7:26). Dati meki wi e gebroiki brede sondro srudeki na a Memrefesa.

8. San a win e agersi?

⁸ A win di Yesus gebroiki tapu 14 Nisan fu a yari 33 e agersi a brudu fu en, èn na so a de tu nanga a win di wi e gebroiki na a Memrefesa na ini a ten disi. Na Golgota, wan presi na dorosei fu Yerusalem, en brudu ben kanti trowe so taki sma „kan kisi pardon fu sondu” (Mat. 26:28; 27:33). Efu wi de nanga tangi gi a diri kado disi, dan wi o sreka wisrefi ibri yari gi a spesrutu okasi disi. Fa wi kan du dati?

9. (a) Fu san ede wi musu leisi den pisi fu Bijbel di wi musu leisi na a ten fu a Memrefesa? (b) Fa yu feni a lusu-paiman?

⁹ Wan fasi fa wi kan sreka wisrefi gi a Memrefesa na fu leisi den Bijbeltekst di  wi musu leisi na a ten fu a Memrefesa. Yu kan feni den tekst disi na ini a buku Ondrosuku den Buku fu Bijbel ala dei. Te wi e leisi den tori disi na ini Bijbel, dan dati o yepi wi fu prakseri den sani di Yesus du syatu fosi a dede. * Wan sisa ben skrifi: „Wi no man wakti fu go na a Memrefesa. Ibri yari a e kon moro prenspari gi wi. Mi man memre di mi ben tanapu na ini a mortuarium . . , e luku mi lobi-ati papa di dede. Mi ben kon abi moro warderi gi a lusu-paiman. . . . Mi sabi ala den Bijbeltekst di e taki fu a lusu-paiman èn mi sabi fa fu fruklari den! Ma na di wan lobiwan fu mi dede, mi kon frustan trutru san Gado o du gi wi nanga yepi fu a prenspari ofrandi dati. Dati e gi mi furu prisiri.” Iya, wan fu den prenspari sani di wi kan du fu sreka wisrefi gi a Memrefesa, na fu prakseri fa a srakti-ofrandi fu Yesus e yepi wi.

10. Sortu tra sani wi kan du fu sreka wisrefi gi a Memrefesa?

¹⁰ Wan tra fasi fa wi kan sreka wisrefi gi a Memrefesa na fu du moro na ini a preikiwroko na a ten dati. Wi wani gi so furu sma leki a kan wan kari fu kon na a Memrefesa. Kande wi kan du a yepi-pionierwroko. Te wi e taki nanga trawan fu Gado, fu en Manpikin èn fu a howpu di wi abi fu kisi têgo libi, dan dati o gi wi furu prisiri fu di wi sabi taki wi e du a wani fu Gado.—Ps. 148:12, 13.

11. Fu san ede Paulus taki dati son Kresten fu Korente no ben warti fu nyan a brede èn dringi a win na a Memrefesa?

¹¹ Te yu e sreka yusrefi gi a Memrefesa, dan prakseri fu den sani di na apostel Paulus skrifi gi den Kresten na ini Korente. (Leisi 1 Korentesma 11:27-34.) Paulus taki dati efu wan sma nyan a brede èn dringi a win aladi a no warti fu du dati, dan a sma dati du wan ogri fu di a no sori lespeki „gi a skin èn gi a brudu fu Masra”. Sobun, efu wan salfuwan du wan seryusu sondu èn a e nyan a brede èn dringi a win, dan dati ’sa meki taki a kisi krutu’. Na ini a ten fu Paulus furu Kresten na ini Korente ben e du sondu. Kande sonwan fu den ben e nyan èn dringi tumusi furu na a Memrefesa, noso fosi den go na a Memrefesa. Kande disi ben meki taki sribi ben e  kiri den. Den no ben abi nowan lespeki gi a spesrutu okasi dati. Sobun, te den ben e nyan a brede èn dringi a win, dan Gado no ben feni dati bun.

12. (a) Nanga san Paulus agersi a Memrefesa, èn sortu warskow a gi den sma di e nyan a brede èn dringi a win? (b) San wan salfuwan musu du te a du wan seryusu sondu?

¹² Paulus agersi a Memrefesa nanga wan nyanyan di sma e nyan nanga makandra, èn a warskow den wan di ben e nyan a brede èn dringi a win: „Unu no kan dringi fu a kan fu Yehovah èn fu a kan fu ogri yeye. Unu no kan nyan na ’a tafra fu Yehovah’ èn na a tafra fu ogri yeye” (1 Kor. 10:16-21). Efu wan sma di e nyan a brede èn dringi a win na a Memrefesa du wan seryusu sondu, dan a musu go suku yepi na den owruman. (Leisi Yakobus 5:14-16.) Efu so wan salfuwan ben o ’du sani di e sori taki a abi berow’, dan a e sori lespeki gi na ofrandi fu Yesus te a e nyan a brede èn dringi a win na a Memrefesa.—Luk. 3:8.

13. Fu san ede a bun fu begi fu a howpu di Gado gi wi?

¹³ Ete wan sani di yu kan du fu sreka gi a Memrefesa, na fu begi èn fu teki ten fu prakseri fu a howpu di Gado gi yu fu libi na grontapu noso na hemel. Efu wan futuboi fu Yehovah èn wan bakaman fu en Manpikin abi lespeki gi na ofrandi fu Yesus, dan a no o nyan a brede èn dringi a win na a Memrefesa, efu a no abi krin buweisi taki en na wan salfu Kresten. Ma fa wan sma kan de seiker taki a kan nyan a brede èn dringi a win?

14. San den salfuwan e du na a Memrefesa fu di den de na ini a nyun frubontu?

¹⁴ Den sma di abi a reti fu nyan a brede èn dringi a win de seiker taki den de na ini a nyun frubontu. Yesus ben taki fu a win: „A kan disi wani taki a nyun frubontu di o seti te mi gi mi brudu” (1 Kor. 11:25). Nanga yepi fu a profeiti Yeremia Gado ben taki dati a ben o meki wan nyun frubontu di ben o de heri tra fasi leki a Wetfrubontu di a ben meki nanga Israel. (Leisi Yeremia 31:31-34.) Gado meki a nyun frubontu nanga na Israel fu Gado (Gal. 6:15, 16). Na ofrandi fu Yesus meki taki a nyun frubontu ben man seti (Luk. 22:20). Yesus na a Mindriman fu a nyun frubontu èn den salfuwan di e tan dini Gado te na dede o de nanga Yesus na hemel.—Hebr. 8:6; 9:15.

15. Suma de na ini a Kownukondre frubontu, èn sortu grani den o kisi te den tan gi yesi na Gado te na dede?

¹⁵ Den sma di abi a reti fu nyan a brede èn dringi a win na a Memrefesa sabi taki den de na ini a Kownukondre frubontu. (Leisi Lukas 12:32.) Yesus ben meki a frubontu disi nanga den salfu bakaman fu en di „pina neleki fa en ben e pina” (Fil. 3:10). Fu di den salfuwan disi de na ini a Kownukondre frubontu, meki den o tiri makandra nanga Krestes leki kownu na hemel fu têgo (Openb. 22:5). Den sma disi abi a reti fu nyan a brede èn dringi a win na a Avondmaal fu Masra.

16. Fruteri syatu san Romesma 8:15-17 wani taki.

¹⁶ Soso te a yeye fu Gado sori wan sma krin taki a de wan pikin fu Gado, a mag nyan a brede èn dringi a win na a Memrefesa. (Leisi Romesma 8:15-17.) Paulus taki dati den e bari: „Abba, Tata!” Na ini Arameisitongo, te wan pikin taki „Abba”, dan disi e sori taki a lobi en papa èn a abi lespeki gi en tu. Efu ’Gado teki wan sma leki en manpikin’, dan na a yeye fu Gado  e sori en taki en na wan pikin fu Gado. A yeye fu Yehovah e meki taki den de seiker taki den na salfu manpikin fu en. Sobun, disi a no wan firi nomo di den sma disi abi taki den no wani libi moro na grontapu. Den de seiker taki den o tiri makandra nanga Yesus na ini a hemel Kownukondre efu den tan dini Gado te na dede. Den sabi taki ’a santawan Yehovah salfu den’. Na ini a ten disi wan tu fu den 144.000 manpikin fu Gado de na grontapu ete (1 Yoh. 2:20; Openb. 14:1). Den e firi taki Yehovah na den papa trutru. Dati meki den e kari en „Abba, Tata!”

17. Sortu howpu den salfuwan abi èn fa den sabi taki den na salfuwan?

¹⁷ Efu yu na wan salfu Kresten, dan yu o begi furu fu a howpu di yu abi fu go na hemel. Èn den Bijbeltekst di abi fu du nanga a howpu disi wani taki furu gi yu. Fu eksempre, te Bijbel e taki fu a trow fu Yesus nanga en „trowmisi” na hemel, dan yu sabi taki disi abi fu du nanga yu èn yu e angri fu de na ini a grupu di Bijbel e kari a „trowmisi” fu Krestes (2 Kor. 11:2; Yoh. 3:27-29; Openb. 21:2, 9-14). Boiti dati, te Gado e taki na ini Bijbel dati a lobi den salfu manpikin fu en, dan yu e denki: „Nanga mi a e taki.” Èn te a Wortu fu Yehovah e gi den salfuwan rai, dan santa yeye e meki yu gi yesi na a rai dati, èn yu e denki: „A rai disi na gi mi.” Na so a yeye fu Gado srefi e sori yu taki yu abi a howpu fu libi na hemel.

18. Sortu howpu den „tra skapu” abi, èn fa den feni a howpu disi?

¹⁸ Ma efu yu de na ini a „bigi ipi” „tra skapu”, dan Gado gi yu a howpu fu libi na grontapu (Openb. 7:9; Yoh. 10:16). Yu wani libi fu têgo na ini a Paradijs èn yu e prisiri te yu e prakseri san Bijbel e taki fu a libi na grontapu na ini a ten di e kon. Yu e angri fu libi makandra nanga yu famiri nanga mati na ini wan grontapu pe freide de. Yu e wakti fayafaya fu si a ten pe angri, pôtifasi, pina, siki, nanga dede no sa de moro (Ps. 37:10, 11, 29; 67:6; 72:7, 16; Yes. 33:24). Yu no man wakti fu si den lobiwan di o kisi wan opobaka èn di o kisi na okasi tu fu libi fu têgo na grontapu (Yoh. 5:28, 29). Yu de nanga tangi trutru taki Yehovah blesi yu nanga a moi howpu disi! Awinsi yu no e nyan a brede èn dringi a win na a Memrefesa, toku yu e go fu di yu abi warderi gi a frulusu-ofrandi fu Yesus Krestes.

19, 20. (a) Fa yu kan kisi têgo libi? (b) Fu san ede yu o go na a Memrefesa?

¹⁹ Yu kan libi fu têgo na grontapu noso na hemel, soso te yu abi bribi na ini Yehovah Gado, Yesus Krestes, nanga a lusu-paiman. Te yu e go na a Memrefesa, yu o abi na okasi fu prakseri fu a howpu di yu abi èn yu o prakseri o prenspari a dede fu Yesus de. Tapu freida 3 april 2015, baka te son dongo, milyunmilyun sma na heri grontapu o go na a Memrefesa na ini den Kownukondre zaal noso na tra presi.

²⁰ Te yu o go na a Memrefesa, yu o kisi moro warderi gi a frulusu-ofrandi fu Yesus. Te yu e arki a lezing bun, dan dati o gi yu deki-ati fu sori lobi gi tra sma. Yu o wani fruteri den fa Yehovah lobi libisma èn sortu moi sani a o du gi den (Mat. 22:34-40). Sobun, awinsi san e pasa, no misi na Avondmaal fu Masra!