Wi kan bribi san Bijbel e taki fu san bun èn san ogri
Efu wi e luku nomo fa wi e denki noso fa tra sma e denki, dan wi no kan de seiker taki den besroiti fu wi o abi bun bakapisi. Bijbel e ferteri fu san ede dati de so, ma a e ferteri wi moro tu. A abi bun rai di kan yepi wi fu sabi san bun èn san ogri so taki wi kan abi wan koloku libi.
WI ABI YEPI FU GADO FANOWDU
Na ini Bijbel, Yehovah a Gado e taki dati libisma abi a yepi fu en fanowdu èn taki den no man du ala sani den srefi (Yeremia 10:23). Dati meki a gi rai na ini Bijbel di e sori san bun èn san ogri. A lobi libisma èn a no wani taki wi teki fowtu besroiti di o abi takru bakapisi gi wi èn di o gi wi furu brok’ede (Deuteronomium 5:29; 1 Yohanes 4:8). Boiti dati, leki wi Mekiman a abi a koni nanga a sabi fu gi wi a moro bun rai di de, so taki wi kan sabi san bun èn san ogri (Psalm 100:3; 104:24). Tòg Gado noiti no e dwengi sma fu libi soleki fa a feni bun.
Yehovah ben gi a fosi man nanga uma, Adam nanga Eva, ala san den ben abi fanowdu fu de koloku trutru (Genesis 1:28, 29; 2:8, 15). A ben gi den wet tu di no ben muilek fu hori èn a ben ferwakti taki den arki en. Ma a meki den besroiti gi densrefi efu den ben o arki en noso efu den ben o trangayesi en (Genesis 2:9, 16, 17). Na wan sari sani taki Adam nanga Eva besroiti fu libi soleki fa densrefi wani na presi fu hori densrefi na san Gado taigi den (Genesis 3:6). San ben de a bakapisi? Libisma de koloku te den e besroiti gi densrefi san bun èn san ogri? No. Na ini ala den yari di psa, wi si taki sma no abi freide èn den no de koloku te den no teki den rai fu Gado.—Preikiman 8:9.
Bijbel e gi wi a rai di wi abi fanowdu fu teki koni besroiti, awinsi pe wi e tan èn awinsi fa wi kweki (2 Timoteyus 3:16, 17; luku a faki „ Wan buku gi ala sma”). Luku fa Bijbel e du dati.
Kon sabi fu san ede wi kan taki nanga reti taki Bijbel na „a wortu fu Gado”.—1 Tesalonikasma 2:13. Luku a felem Suma na a skrifiman fu Bijbel? tapu jw.org.
BIJBEL E SORI FA GADO WANI YEPI WI
Bijbel e ferteri wi fa sani ben e waka na mindri Yehovah nanga libisma. Den sani di skrifi na ini Bijbel e yepi wi fu ferstan san Gado e si leki bun sani noso fowtu sani, èn san o abi bun bakapisi noso takru bakapisi gi wi (Psalm 19:7, 11). Den les di wi e leri o yepi wi fu teki koni besroiti ala ten na ini wi aladei libi.
Luku fu eksempre a rai di wi e feni na ini Odo 13:20: „Te wan sma e waka nanga koniwan, dan ensrefi o kon koni, ma te wan sma e waka nanga don sma, dan sani no o waka bun gi en.” A rai disi ben bun gi sma na ini owruten èn te na a dei fu tide wi kan gebroiki a rai dati heri bun ete. Bijbel lai nanga den sortu bun rai disi di kan yepi wi.—Luku a faki „ A koni fu Bijbel bun ala ten”.
Ma kande yu e aksi yusrefi: ’Fa mi kan de seiker taki den rai fu Bijbel o man yepi mi na ini a ten disi?’ A tra artikel o poti prakseri na san sma ondrofeni.
a Yehovah na a nen fu Gado.—Psalm 83:18.
