Gado gi libisma wan tumusi moi kado. A meki den na so wan fasi taki den man taki nanga en na ini begi èn taki den man fruteri en fa den e firi. A profeiti David ben begi: „Yu na a sma di e arki begi. Na yu ala sortu sma o kon suku yepi” (Psalm 65:2). Ma fa wi musu begi efu wi wani taki Gado arki wi èn blesi wi?

Te yu e begi, dan yu kan fruteri Gado ala san de na tapu yu ati (Psalm 62:8). Na Almaktiwan lobi te sma e begi en nanga den heri ati.

Omeni fasi de fa sma e kari Gado. Son leisi den e kari en Allah, a Mekiman noso na Almaktiwan. Toku a abi wán nen nomo. Gado taki: „Mi na Yehovah. Dati na mi nen” (Yesaya 42:8). Na ini den Santa Buku, a nen Yehovah skrifi sowan 7000 tron. Furu profeiti ben e gebroiki Gado nen na wan lespeki fasi te den ben e taki nanga en. Abraham ben taki: „Mi e begi yu, Yehovah, . . . gi mi primisi fu taki ete wan sani” (Genesis 18:30). Wi musu gebroiki Gado nen, Yehovah, tu te wi e begi.

Gado e frustan fa wi e denki èn fa wi e firi awinsi sortu tongo wi e taki. A Wortu fu en e taigi wi: „Gado no lobi a wan sma moro a trawan, ma awansi fu sortu kondre wan sma de, efu a e lespeki Gado èn a e du san reti, dan Gado feni en bun.”​—Tori fu den apostel 10:34, 35.

Ma efu wi wani taki Gado blesi wi, dan wi no musu begi nomo. Na ini den artikel di e kon, wi o si san moro de fanowdu.