Na apostel Paulus ben skrifi disi gi Timoteyus di ben de wan owruman neleki en: „Na wan seryusu fasi mi e taigi yu na fesi Gado èn na fesi Krestes Yesus nanga den engel di Gado poti fu du spesrutu wroko, taki yu musu gi yesi na den rai disi. Du dati sondro fu teki bosroiti bifo yu kon sabi a fini fu wan tori èn sondro fu teki sma sei.”​—1 Tim. 5:21.

Fu kon sabi suma na den engel disi, dan wi o luku sortu engel no kan de na ini a grupu disi. A de krin taki den engel disi no kan de fu den 144.000. Di Paulus ben skrifi a brifi fu en gi Timoteyus, dan den salfu Kresten no ben kisi wan opobaka ete na hemel. Den apostel nanga tra salfuwan no ben tron yeye ete, sobun, den no ben kan de den „engel di Gado poti fu du spesrutu wroko”.​—1 Kor. 15:50-54; 1 Tes. 4:13-17; 1 Yoh. 3:2.

Boiti dati, „den engel di Gado poti fu du spesrutu wroko” no ben kan de engel di ben trangayesi Gado na a ten fu a frudu. Fu di den engel dati ben teki a sei fu Satan, meki den tron ogri yeye èn den ben de feanti fu Yesus (Gen. 6:2; Luk. 8:30, 31; 2 Petr. 2:4). Na ini a ten di e kon, Yesus o trowe den na ini wan dipi peti pe den o tan 1000 yari langa. Baka dati, a o pori den makandra nanga Satan.​—Yud. 6; Openb. 20:1-3, 10.

Sobun, „den engel di Gado poti fu du spesrutu wroko” ben musu fu de engel na hemel di e wroko makandra nanga ’Gado nanga Krestes Yesus’.

Dusundusun getrow engel de (Hebr. 12:22, 23). Soleki fa a sori, dan Yehovah no e gi ala engel a srefi wroko fu du (Openb. 14:17, 18). Memre taki wan leisi na wán engel nomo ben kisi a wroko fu kiri 185.000 Asiriasma (2 Kow. 19:35). A kan taki difrenti engel kisi a wroko fu „puru ala den sma di e meki trawan du sondu èn di e du kruktudu. Den o puru den fu [Yesus] en kownukondre” (Mat. 13:39-41). Kande tra engel musu „tyari den sma kon na wán di Gado kari” fu libi na hemel (Mat. 24:31). Èn tra engel kisi a komando fu ’kibri wi, so taki nowan sani psa nanga wi’.​—Ps. 91:11; Mat. 18:10; luku Mateyus 4:11; Luk. 22:43.

A musu fu de so taki „den engel di Gado poti fu du spesrutu wroko”, soleki fa 1 Timoteyus 5:21 e sori, ben de engel di ben kisi a wroko fu yepi sorgu den gemeente. Na ini den tra vers na ini a kapitel disi, Paulus ben gi den owruman koni rai fa fu tyari den frantwortu fu den, èn a ben taki tu taki sma na ini a gemeente musu sori lespeki gi den owruman. Paulus ben taki dati den owruman no musu ’teki bosroiti bifo den kon sabi a fini fu wan tori èn sondro fu teki sma sei’. Boiti dati, owruman no ben musu teki besroiti sondro fu denki bun fosi. Baka dati, Paulus gi den bun reide fu teki a rai fu en. Paulus taki dati den owruman e dini den brada fu den „na fesi Gado èn na fesi Krestes Yesus nanga den engel di Gado poti fu du spesrutu wroko”. Sobun, a de krin taki son engel abi a frantwortu fu yepi a gemeente. Wan tu fu den sani di den e du, na taki den e kibri den futuboi fu Gado, den e yepi den nanga a preikiwroko, èn den e taigi Yehovah san den e si e psa na ini a gemeente.​—Mat. 18:10; Openb. 14:6