1. San na wan tu fu den problema di wi abi, ma fu san ede Yehovah breiti nanga den reti-ati futuboi fu en? (Luku den prenki na a bigin fu na artikel.)

WI ALAMALA sabi taki a libi na ini a sistema disi no de sondro broko-ede. Yehovah sabi taki furu fu unu abi wan seryusu siki. Trawan musu sorgu gi famiriman di kon owru, aladi den srefi no yongu moro. Tra sma baka musu du furu muiti fu sorgu taki den osofamiri abi den moro prenspari sani di den abi fanowdu fu man tan na libi. Èn wi sabi taki furu fu unu no e kisi fu du nanga wán problema nomo, ma nanga difrenti sortu problema na a srefi ten! A sani disi e teki bun furu fu wi ten nanga wi krakti, dan wi no taki ete fu den kostu. Ma toku yu sabi taki Yehovah o yepi yu èn taki a o go moro bun, fu di ala ten a e du san a pramisi. A no de fu taki dati Yehovah breiti nanga yu!

2. Sortu deki-ati Yesaya 40:29 e gi wi, ma sortu fowtu denki wi kan abi?

² Ma yu e firi son leisi leki a libi hebi tumusi gi yu? Efu na so a de, dan yu no de yu wawan. Bijbel e sori taki furu reti-ati futuboi fu owruten ben e firi leki den no ben man moro (1 Kow. 19:4; Yob 7:7). Toku den sma disi no gi abra, ma den  suku krakti na Yehovah. Bijbel e taki dati ’te wan sma weri, Gado e gi en krakti’ (Yes. 40:29). Ma a sari taki na ini a ten disi sonwan fu den futuboi fu Gado e denki taki a moro bun sani di den kan du te problema e miti den, na fu tapu nanga a tru anbegi fu wan pisi ten. Gi den sma dati den frantwortu di wi leki Kresten abi a no blesi, ma den e si den leki hebi. Dati meki den no e leisi Gado Wortu moro, den no e go na den konmakandra èn den no e preiki moro. Èn dati na soifri san Satan wani.

3. (a) Fa wi kan sorgu taki Satan no e swaki wi bribi? (b) San wi o luku na ini na artikel disi?

³ Didibri sabi taki te wi abi furu fu du na ini a tru anbegi, dan dati o tranga wi èn a no wani taki wi bribi tranga. Te wi weri èn wi e firi brokosaka, dan wi no musu drai baka gi Yehovah. Kon moro krosibei na en èn ’a o meki yu tanapu kánkan, èn a o meki yu kon tranga’ (1 Petr. 5:10; Yak. 4:8). Na ini na artikel disi wi o luku tu situwâsi di kan meki taki wi no e du so furu moro na ini na anbegi èn wi o si fa den rai na ini Bijbel kan yepi wi fu horidoro. Ma meki wi go luku fosi fa Yesaya 40:26-31 e sori wi taki Yehovah man tranga wi.

4. San wi kan leri fu Yesaya 40:26?

⁴ Leisi Yesaya 40:26. Nowan sma man teri ala den stari di de na hemel. Sabiman e bribi taki a Melkwegstelsel fu wi abi moro leki 400 milyard stari. Ma toku Yehovah e gi ibri stari wan nen. San a sani disi e leri wi? Efu Yehovah e poti prakseri na sani di no abi libi, dan prakseri fa a e si yu di e dini en. Yu no e dini en fu di yu musu du dati, ma fu di yu lobi en (Ps. 19:1, 3, 14). Wi lobi hemel Papa sabi wi moro bun leki iniwan sma. Bijbel e taki: „A Tata teri srefi ala den wiwiri na tapu un ede” (Mat. 10:30). Èn a psalm skrifiman e gi wi a dyaranti disi: „Yehovah sabi fa den reti-ati sma e libi” (Ps. 37:18). Iya, a e si den problema di e miti yu èn a o gi yu a krakti di yu abi fanowdu fu man horidoro.

5. Fu san ede wi kan de seiker taki Yehovah man tranga wi?

⁵ Leisi Yesaya 40:28. Yehovah abi bun furu krakti. Prakseri a krakti di a e gi a son. A sabiman David Bodanis skrifi: „A krakti di e komoto fu a son ibri sekonde na a srefi leki a krakti fu [milyardmilyard atoom] bom.” Wan tra ondrosukuman e taki dati nownowde a son „e gi nofo krakti fu hori sma na libi 200.000 yari langa”! Wi no abi fu tweifri taki a sma di e gi a son krakti, kan gi wi a krakti di wi abi fanowdu te problema e miti wi.

6. Fu san ede wi kan taki dati a tyatyari fu Yesus switi fu tyari, èn sortu krakti disi abi na wi tapu?

⁶ Leisi Yesaya 40:29. A e gi wi furu prisiri te wi e dini Yehovah. Yesus ben taigi den disipel fu en: „Teki mi tyatyari na un tapu.” Èn a ben taki tu: „Unu o kisi krakti baka. Bika a tyatyari fu mi switi fu tyari èn mi lai lekti” (Mat. 11:28-30). A sani disi tru srefisrefi! Son leisi a kan taki wi weri te wi musu go na wan gemeente konmakandra noso na ini a preikiwroko. Ma fa wi e firi te wi drai kon baka na oso? Wi e firi taki wi kisi krakti baka èn dati e yepi wi fu horidoro. Iya, a tyatyari fu Yesus switi fu tyari!

7. Fruteri wan ondrofenitori di e sori taki den sani di skrifi na Mateyus 11:28-30 tru.

⁷ Wan sisa di wi o kari Kayla, abi wan siki di e meki taki a e firi weri, a e firi brokosaka, èn en ede e hati en. Wi kan frustan taki son leisi a ben feni en muilek fu  go na den gemeente konmakandra. Ma baka di a du muiti fu go na wan gemeente konmakandra, dan a skrifi: „A lezing ben e taki fu sma di lasi-ati. A brada hori a lezing na wan fasi di ben e sori taki a ben e frustan fa sma ben e firi èn taki a ben e broko en ede nanga den. A lezing memre mi taki a prenspari taki mi go na den konmakandra.” Kayla ben breiti srefisrefi taki a ben meki muiti fu de na a konmakandra!

8, 9. San Paulus ben wani taki di a skrifi: „Te mi swaki, mi tranga”?

⁸ Leisi Yesaya 40:30. Awansi sortu koni wi abi, wi no man du ala sani nanga wi eigi krakti. Dati na wan sani di wi alamala musu leri. Aladi na apostel Paulus ben man du furu, toku a no ben man du ala san a ben wani du. Di a fruteri Yehovah fa a ben e firi, dan Yehovah taigi en: „Te yu swaki, a o de krin taki mi e gi yu a krakti di yu abi fanowdu.” Paulus frustan san Yehovah ben wani taigi en. Dati meki a taki: „Te mi swaki, mi tranga” (2 Kor. 12:7-10). San Paulus ben wani taki nanga den wortu dati?

⁹ Paulus ben e frustan taki a no man du ala sani nanga en eigi krakti. A santa yeye fu Gado ben o gi en a krakti di a ben abi fanowdu. Boiti dati, a yeye fu Gado ben o yepi Paulus fu du den sani di en srefi noiti ben o man du nanga en eigi krakti. Na so a de tu nanga wi. Efu na Yehovah e gi wi krakti, dan wi o tranga srefisrefi!

10. Fa Yehovah yepi David fu pasa den problema di miti en?

¹⁰ A psalm skrifiman David ondrofeni furu tron fa a santa yeye fu Gado gi en krakti. A ben e singi: „Na yu e meki taki mi man lon go feti nanga ogri-ati fufuruman. Na mi Gado e meki taki mi man kren wan skotu” (Ps. 18:29). Neleki fa a muilek gi wi fu kren wan hei skotu, na so den problema fu wi kan bigi so te son leisi taki wi srefi no man lusu den. Wi abi a yepi fu Yehovah fanowdu.

11. Fruteri fa a santa yeye e yepi wi te wi abi problema.

¹¹ Leisi Yesaya 40:31. Aka no e tan frei na loktu nanga den eigi krakti nomo. Te waran loktu e opo go na tapu, dan dati e yepi na aka fu tan na loktu. Na so na aka man frei bun fara sondro fu gebroiki furu fu en eigi krakti. Sobun, te yu musu du wan muilek sani, dan prakseri na aka. Begi Yehovah fu opo yu nanga yepi fu „a santa yeye” (Yoh. 14:26). Koloku taki wi kan aksi Yehovah fu gi wi a yeye disi na iniwan yuru fu a dei. Spesrutu te wi e kisi trobi nanga sma na ini a gemeente, dan wi kan firi taki wi abi a yeye tranga fanowdu. Ma fu san ede wi e kisi trobi nanga trawan?

12, 13. (a) Fu san ede Kresten e kisi trobi nanga makandra? (b) San a tori fu Yosef e leri wi fu Yehovah?

¹² Wi e kisi trobi nanga trawan son leisi, fu di wi alamala na sondusma. Dati meki son leisi den sani di brada nanga sisa e taki noso e du kan meki wi atibron èn kande wi srefi e taki noso du sani di e meki den atibron. A sani disi kan de wan seryusu tesi. Ma a e gi wi na okasi fu tan du san Yehovah e aksi fu wi. Fa so? Wi musu leri fu wroko na ini freide nanga wi brada nanga sisa. Yehovah lobi den aladi den abi fowtu èn wi musu lobi den tu.

¹³ Yehovah no e kibri den futuboi fu en gi tesi. Wi e si dati krin te wi e luku a tori fu Yosef. Di Yosef ben de wan yonguman, den afubrada fu en di ben e dyarusu na en tapu seri en leki srafu èn sma tyari en go na Egepte (Gen. 37:28). Yehovah ben sabi san ben e pasa, èn a no de fu taki dati a ben sari fu si san sma ben  e du nanga en bun mati Yosef. Toku a no du wan sani. Bakaten sma lei gi Yosef taki a pruberi fu dwengi a wefi fu Potifar fu abi seks nanga en èn den poti en na strafu-oso. Ma toku Yehovah no du wan sani. A sani disi wani taki dati Yehovah ben gowe libi Yosef? Kwetikweti, na presi fu dati, Bijbel e taki: „Yehovah meki ala sani di Yosef ben e du, waka bun.”​—Gen. 39:21-23.

14. Sortu wini wi e kisi te wi no e kisi atibron?

¹⁴ David na wan tra eksempre. Furu sma no de di ondrofeni den sani di David ben ondrofeni. Toku a man disi di ben de wan mati fu Gado, no meki atibron basi en. Na presi fu dati, a skrifi: „No kisi atibron moro èn no rigeri moro. No ati bron so te, taki yu go du ogri” (Ps. 37:8). A moro prenspari reide fu san ede wi ’no musu kisi’ atibron, na fu di wi wani de leki Yehovah di „no gi wi ala strafu di wi ben musu kisi gi den sondu fu wi” (Ps. 103:10). Ma wi e kisi wini tu te wi ’no e kisi’ atibron. Atibron kan meki taki wi brudu e hei èn taki wi bro de na tapu doronomo. Wi kan kon siki na wi lever nanga wi alvleesklier èn wi maag kan muilek wi. Te wi e kisi atibron, dan wi no man denki krin ala ten èn a kan meki taki wi e firi brokosaka wan pisi ten. Ma na a tra sei Bijbel e taki dati, „wan ati di no e bruya esi, bun gi a skin” (Odo 14:30). Ma san wi musu du te trawan e du hati sani nanga wi èn fa wi kan meki freide baka nanga den? Wi kan fiti a koni rai di Bijbel e gi.

15, 16. San wi musu du te wan sma du wan hati sani nanga wi?

¹⁵ Leisi Efeisesma 4:26. Te sma di no e anbegi Yehovah e du hati sani nanga wi, dan dati no e fruwondru wi. Ma te wan Kresten brada noso sisa, noso wan famiriman e taki noso e du wan sani di e hati wi, dan kande wi e mandi. Kon meki wi taki dati a muilek gi yu fu frigiti san pasa. Yu o tan atibron omeni yari langa? Noso yu o teki a koni rai di Bijbel e gi fu meki sani bun baka esi-esi? O moro wi e wakti fu taki nanga a tra sma, o moro a o muilek gi wi fu meki freide nanga en.

¹⁶ Kon meki wi taki dati wan brada noso sisa du wan hati sani nanga yu èn yu no man frigiti a sani. San yu kan du fu meki freide baka nanga a sma? A fosi sani di yu kan du, na fu begi Yehovah. Aksi en fu yepi yu so taki yu man taki bun nanga yu brada. Hori na prakseri taki a sma dati na wan mati fu Yehovah tu (Ps. 25:14). Gado lobi en. Yehovah e sori switifasi gi den mati fu en èn a wani taki wi du a srefi  (Odo 15:23; Mat. 7:12; Kol. 4:6). Baka dati, denki fosi san yu o taki. No denki taki na fu espresi yu brada du wan hati sani nanga yu. Kande un no frustan makandra bun. Kande yu srefi meki tu taki un kisi problema nanga makandra. Te yu o taki nanga yu brada, dan kande yu kan taigi en: „Kande na mi no frustan yu bun yèrè, ma esde di yu taki nanga mi, mi ben firi . . . ” Efu a takimakandra no e waka soleki fa yu ben wani, dan suku wan tra okasi fu meki freide. Ma tan begi gi yu brada èn aksi Yehovah fu blesi en. Aksi Gado fu yepi yu fu tan poti prakseri na den bun fasi fu yu brada. Awansi fa sani e waka, yu kan de seiker taki Yehovah o breiti nanga a muiti di yu du fu wini yu brada di de wan mati fu Gado.

17. Fa Yehovah e yepi wi fu meki sani bun baka nanga en te wi du wan sondu, èn fu san ede wi musu teki a yepi dati?

¹⁷ Son sma di du wan seryusu sondu feni taki den no warti fu dini Yehovah. Te wi abi konsensi fonfon, dan dati kan meki taki wi no abi freide nanga prisiri, èn wi no abi krakti fu du san wi musu du. Kownu David di ben abi konsensi fonfon ben taki en so: „Te mi no ben e taki fu den sondu fu mi, mi ben e geme heri dei, teleki mi no ben abi krakti moro. Dei nanga neti yu anu ben hebi na mi tapu.” Koloku David ben abi a deki-ati fu du san Yehovah ben e fruwakti fu den anbegiman fu en. A skrifi: „Te fu kaba mi fruteri yu sortu sondu mi du.” A e taki moro fara: „Ne yu gi mi pardon fu den fowtu nanga den sondu fu mi” (Ps. 32:3-5). Efu yu du wan seryusu sondu, dan Yehovah de klariklari fu yepi yu so taki yu e kisi yu srefi baka. Ma yu musu teki a yepi di a e gi yu nanga yepi fu a gemeente (Odo 24:16; Yak. 5:13-15). No draidrai, noso yu kan lasi na okasi fu kisi têgo libi. Ma kande Yehovah gi yu pardon langa ten kaba gi wan sondu di yu du, èn toku yu konsensi e tan fon yu ete. San yu kan du te dati de so?

18. Fa na eksempre fu Paulus kan yepi den wan di e firi leki den no warti noti?

¹⁸ Son leisi den sondu di na apostel Paulus ben du fosi, ben e meki a firi brokosaka. A e taki: „Mi na a moro pikinwan fu den apostel èn mi no warti fu den kari mi wan apostel, bika mi ben frufolgu a gemeente fu Gado.” Ma Paulus ben taki tu: „Ma na fu di Gado sori mi bun-ati, meki mi de a sma di mi de nownow” (1 Kor. 15:9, 10). Fosi Paulus bigin anbegi Yehovah a ben du furu ogri sani. Toku Yehovah no tan prakseri den sani dati èn a ben wani taki Paulus bribi dati tu. Efu trutru yu abi berow fu den sondu di yu ben du èn efu yu taki nanga den owruman fu den sondu dati te dati de fanowdu, dan yu kan abi a frutrow taki Yehovah o gi yu pardon. Sobun, no tweifri, ma bribi taki Yehovah gi yu pardon!​—Yes. 55:6, 7.

19. San na a yaritekst fu 2018, èn fu san ede a tekst dati fiti?

¹⁹ Now di a sistema disi e doro en kaba, dan wi kan fruwakti taki a libi o kon moro muilek. Ma yu kan abi a dyaranti taki a Gado di e gi krakti na sma di weri èn di e tranga sma di no abi krakti, kan gi yu iniwan sani di yu abi fanowdu fu man horidoro (Yes. 40:29; Ps. 55:22; 68:19). Na ini 2018, wi o prakseri a prenspari sani disi ibri leisi te wi e go na wan konmakandra na a Kownukondre zaal. Drape wi o si a yaritekst fu wi di e taki: „Den wan di e frutrow na tapu Yehovah o kisi krakti baka.”​—Yes. 40:31.