TE WAN trowpaar e krutu nanga makandra, dan disi wani taki dati den no lobi makandra? Nôno! Fernando nanga Sarah, di wi taki fu den na a bigin fu na artikel, lobi makandra trutru. Ma awinsi a trowlibi e go heri bun, toku trowpaar sa krutu nanga makandra son leisi.

Fu san ede trowpatna e bigin krutu nanga makandra? San yu kan du fu sorgu taki a sani disi no pori yu trowlibi? Fu di a trowlibi na wan seti fu Gado, meki a bun fu luku san Bijbel, a Wortu fu en, e taki fu a trowlibi.—Genesis 2:21, 22; 2 Timoteyus 3:16, 17.

Furu trowpaar wani sori lobi nanga switifasi gi makandra. Ma Bijbel e sori wi krin taki „ala sma sondu èn den no man doro a glori fu Gado” (Romesma 3:23). Sobun, te trowpatna no e agri nanga makandra, dan a kan muilek gi den fu basi den firi fu den. Èn te son trowpatna e bigin krutu nanga makandra, dan kande den no man hori densrefi fu no du noso fu no taki sani di no fiti. Iya, kande den sa bigin bari noso den sa taigi makandra hati sani (Romesma 7:21; Efeisesma 4:31). Sortu tra sani kan tyari problema kon na ini a trowlibi?

Nofo tron, a fasi fa wan masra nanga wan wefi e taki fu sani, e difrenti. Michiko e taki: „Syatu baka di wi trow, mi kon si taki a fasi fa wi e taki fu sani, e difrenti. Mi no wani taki nomo fu san pasa, ma mi wani taki tu fu san ede wan sani pasa èn fa a pasa. A gersi leki mi masra wani taki soso fu a fasi fa a tori waka te fu kaba.”

A no Michiko wawan abi a problema disi. Na ini furu trowlibi a kan pasa taki te wan problema de, dan kande wan fu den trowpatna wani taki finifini fu a tori, aladi a trawan e suku fasi fu no taki fu a tori fu di a no lobi haritaki. Son leisi a de so taki, o moro a wan patna e suku okasi fu taki fu a problema, o moro a trawan e pruberi fu wai pasi gi a sani dati. Na disi e pasa na ini yu trowlibi? A de so taki wan fu unu ala ten e suku fu  taki finifini fu wan problema, aladi a trawan e pruberi fu wai pasi gi a sani dati?

Wan tra sani di trowpaar musu hori na prakseri, na taki a fasi fa wan sma kweki kan abi krakti tapu a fasi fa a e taki nanga en trowpatna, fu di a feni taki na so a musu de. Justin, di trow feifi yari kaba, e taki: „Mi kweki na ini wan osofamiri pe sma no ben e taki furu èn mi feni en muilek fu taki krin fa mi e firi. Mi wefi no man nanga a sani dati. A famiri fu en e taki krin fa den e denki fu sani, èn dati meki a makriki gi en fu fruteri mi fa a e firi.”

Ondrosukuman kon si taki a moro prenspari sani di sa yepi trowpaar fu kon abi wan koloku trowlibi, a no te den e taigi makandra furu leisi taki den lobi makandra. Wan bun sekslibi noso nofo moni, a no den moro prenspari sani tu. Na presi fu dati, a moro prenspari sani di sa yepi sma fu abi wan koloku trowlibi, na te a masra nanga a wefi sabi fa fu lusu iniwan problema di e miti den.

Boiti dati, Yesus ben taki dati te tu sma e trow, dan a no libisma e poti den na ondro wán tyatyari, ma na Gado e du dati (Mateyus 19:4-6). Fu dati ede, wan bun trowlibi e gi Gado glori. Ma te wan masra no e sori lobi nanga switifasi gi en wefi, dan a kan taki Yehovah Gado no sa arki den begi fu en (1 Petrus 3:7). Efu wan wefi no e lespeki en masra, dan fu taki en leti, a no e lespeki Yehovah, a Sma di poti a masra leki edeman fu na osofamiri.—1 Korentesma 11:3.

Awinsi fa yu gwenti fu taki, noso awinsi fa yu kweki, toku yu musu luku bun fa yu e taki efu yu wani fiti Bijbel gronprakseri èn efu yu wani lusu problema na wan bun fasi. Aksi yusrefi den sani disi:

’Mi e dwengi misrefi fu no pai ogri fu ogri?’

Wan moi odo e taki: „Te yu e kwinsi a noso, dan a noso sa brudu, èn te yu e kisi atibron, dan dati e tyari trobi kon” (Odo 30:33). San disi wani taki? Luku na eksempre disi. Te trowpatna no e agri nanga a fasi fa den e gebroiki den moni (Kande den e taki: „Wi no musu bai sani di no de fanowdu trutru”), dan fosi yu denki, wan fu den patna kan feni taki a trawan abi fruferi fasi. (Kande a e taki: „Yu no e denki fosi yu e du sani”.) A tru taki te yu patna e ’kwinsi yu noso’ fu taki en so, fu di a e taigi yu so wan hati sani, dan kande yu o wani taigi en wan hati sani baka. Ma te yu e pai ogri fu ogri, dan dati kan meki yu patna atibron èn a trobi kan kon moro bigi.

A Bijbel skrifiman Yakobus ben warskow: „Iya, wan pikin faya nomo de fanowdu fu sutu faya gi wan bun bigi busi! We, a tongo na wan faya” (Yakobus 3:5, 6). Te trowpatna no e luku bun fa den e taki nanga makandra, dan pikinpikin sani kan tron bigi trobi. Èn te trowpatna gwenti fu krutu nanga makandra, dan a lobi di den abi gi makandra no sa man gro.

Na presi fu pai ogri fu ogri, a ben o moro bun fu teki na eksempre fu Yesus, fu di te sma ben e kosi en, „dan a no ben e kosi den baka” (1 Petrus 2:23). A moro bun fasi fa yu kan sorgu taki a trobi no kon moro bigi, na fu poti prakseri na san yu patna abi fu taki, èn fu aksi pardon fu den sani di yu du di meki taki un bigin krutu nanga makandra.

’A de so taki mi no e broko mi ede nanga den firi fu mi trowpatna?’

Gado Wortu e gi wi a komando disi: „Un alamala musu abi a srefi denki, sori taki unu e firi gi tra sma” (1 Petrus 3:8). Luku tu sani di kan meki taki yu no e fiti a rai disi. Wan fu den sani, na taki kande yu no sabi soifri fa yu patna e denki, noso fa a e firi. Fu eksempre, efu yu patna e broko en ede nanga wan sani, aladi yu no e broko yu ede so furu nanga a sani dati, dan kande yu o wani taki: „Na fu soso yu e broko yu ede nanga a tori.” Kande na yepi yu wani yepi yu patna fu si a tori tra fasi. Ma  furu sma no breiti te trawan e taki den sortu sani dati. Wefi nanga masra musu sabi taki den lobiwan fu den e frustan fa den e denki, èn taki den e firi gi den.

Te wan sma e denki tumusi furu fu ensrefi, dan dati kan meki tu taki a no e broko en ede nanga den firi fu en trowpatna. Wan sma di abi heimemre e suku fu broko trawan saka soso fu hei ensrefi. Kande a e taigi a tra sma hati sani, noso kande a e taigi a sma taki trawan bun moro en. Luku na eksempre fu den Fariseiman nanga den leriman fu Wet na ini a ten fu Yesus. Efu wan sma, awinsi na wan tra Fariseiman, ben taki wan sani di no ben e kruderi nanga a denki fu den heimemre man dati, dan den ben e kosi a sma dati, èn den ben e taigi en hati sani (Yohanes 7:45-52). Yesus ben de tra fasi. A ben e firi gi sma te den ben e taigi en fa den ben e denki noso fa den ben e firi.—Mateyus 20:29-34; Markus 5:25-34.

Prakseri san yu e du te yu patna e taki fa a e denki noso fa a e firi. Den sani di yu e taki, a fasi fa yu e taki, èn a fasi fa yu e poti yu fesi, e sori taki yu e firi gi en? Noso yu de gaw fu taki noso fu du sani di e sori taki yu no e broko yu ede nanga den firi fu yu patna?

’Mi feni nofo tron taki mi patna e prakseri ensrefi nomo?’

„Na fu soso Yob sori taki a e frede Gado? A no yusrefi poti wan skotu lontu en, lontu en oso, èn lontu ala sani di a abi?” (Yob 1:9, 10) Na disi Satan ben taki fu sori taki a getrow man Yob ben e dini Gado soso fu kisi wini gi ensrefi.

Efu trowpatna no e luku bun, dan kande den sa bigin denki takru tu fu a patna fu den. Fu eksempre, efu yu patna e du wan bun sani gi yu, dan a de so taki yu e bigin aksi yusrefi san a wani, noso yu e denki taki na kibri a e kibri wan tori? Te yu patna meki wan fowtu, dan yu e si disi leki wan buweisi taki a no e broko en ede nanga yu? A de so taki yu e bigin prakseri wantewante taki yu patna ben meki den sortu fowtu disi kaba na ini a ten di pasa, èn taki a du en baka?

Na apostel Paulus ben skrifi: „Lobi . . . no e tan memre na ogri di trawan du” (1 Korentesma 13:4, 5). Wan sma di abi trutru lobi, sabi taki trawan abi swakifasi. Ma a no e tan memre den fowtu di trawan e meki. Paulus ben taki tu dati lobi „e bribi ala sani” (1 Korentesma 13:7). Disi no wani taki dati wi musu bribi iniwan sani di trawan e taigi wi, ma a e sori wi taki wi musu de klariklari fu frutrow makandra. Wi no musu denki takru fu trawan. Te wi abi a lobi di Bijbel e taki fu en, dan wi sa de klariklari fu gi sma pardon èn wi no sa denki takru fu den (Psalm 86:5; Efeisesma 4:32). Te trowpatna e sori na a fasi disi taki den lobi makandra, dan den sa abi wan koloku trowlibi.