A ben de leki a meisje fu Israel na ini owruten

TU WIKI bifo a Memrefesa fu a dede fu Yesus, ibri memre fu a famiri Sales, di e libi na ini a foto Praia Grande, na Brasyonkondre, ben skrifi den nen fu den sma di den ben wani kari kon na a Memrefesa. Abigayl, di abi siksi yari, ben kisi wan fu den spesrutu papira fu gi sma wan kari. En papa nanga mama ben aksi en suma a ben o wani gi a kari disi.

A piki den: „Mi wani gi a man di lobi fu lafu nanga mi.”

„Suma na a man dati?”, na so en papa nanga mama aksi.

A piki den: „Na a man di e sidon na ini a rolsturu.”

Fo dei baka dati, Abigayl sori en papa nanga mama suma na a man disi. A man disi, di nen Walter, ben libi krosibei fu a Kownukondre zaal. Moro leki 15 yari pasa, di a man disi ben abi 28 yari, a ben de na ini wan ongoloku nanga wagi, èn leki bakapisi fu dati en futu kon lan. Ala ten tu man de nanga en fu kibri en, fu di a gudu. Baka di Abigayl kisi primisi fu taki nanga Walter, dan a papa nanga mama fu Abigayl fruteri Walter taki na umapikin fu den wani gi en wan kari.

Baka di Abigayl fruteri a man disi moro fu a spesrutu kari, a taigi en: „Ala den tra sma na ini wi Kownukondre zaal abi wan lo fu den papira disi, ma mi abi wán nomo. Fu dati ede, yu na a wan-enkri sma di mi e gi wan kari. Efu yu no kon, dan mi no o abi nowan sma di mi kari kon na a Memrefesa. Ma efu yu kon, dan mi sa breiti srefisrefi, èn Yehovah o breiti moro.”

Tapu a dei fu a Memrefesa, den Kotoigi, èn Abigayl sosrefi, ben e krin a Kownukondre zaal gi a Memrefesa di ben o hori moro lati a dei dati. A bakadina dati, Walter ben e pasa nanga wagi èn di a si Abigayl a taigi a man di ben e rèi a wagi fu stop. A opo a fensre fu a wagi, èn a aksi Abigayl san a ben e du. Abigayl taigi en taki den ben e krin a zaal fu meki en moi gi en.

A mofoneti dati, Abigayl no ben man wakti fu si efu Walter ben o kon. A lezing ben bigin kaba, èn Abigayl ben e luku lontu fu si efu Walter ben doro kaba. Ne wantronso, Walter nanga den man di ben de nanga en, kon na inisei. Abigayl ben breiti srefisrefi. Baka a lezing, Walter taki dati a ben de na pasi kaba fu go na wan tra foto, ma a kenki en prakseri èn a kon na a Memrefesa fu Abigayl ede. Baka dati Walter taki: „A lezing ben de soifri san mi ben abi fanowdu.” A ben wani wan Bijbel, èn baka dati a bigin studeri èn a bigin go na den konmakandra.

Na a srefi ten, a sisa fu Walter ben taki dati a wani miti Abigayl tu, fu di en brada ben lobi fu taki fu en. Di a miti Abigayl, a ben feni en moi fu si taki Abigayl na wan meisje di abi bun maniri trutru. „Now mi sabi fu san ede mi brada de so koloku”, na so a taki.

Walter e tan studeri èn a e go na den konmakandra doronomo. A e gi piki srefi, èn a e fruteri trawan den sani di a leri. A no de fu taki dati Abigayl e meki wi prakseri a meisje fu Israel di ben yepi Naman fu kon sabi a tru Gado, Yehovah.—2 Kownu 5:2-14.