Leisiman e aksi

Yehovah Kotoigi e bribi taki den na den wan-enkri sma di o kisi frulusu?

Yehovah Kotoigi e bribi taki den feni a tru bribi. Efu dati no ben de so, dan den ben o teki wan tra bribi. Neleki fa a de nanga sma fu tra bribi, na so Yehovah Kotoigi abi a howpu fu kisi frulusu. Ma den e bribi tu taki a no de na den fu taki suma o kisi frulusu. A sani di prenspari, na taki Gado na a Krutuman, èn na en e bosroiti suma o kisi frulusu.—Yesaya 33:22.

Gado Wortu e tyari kon na krin taki den sma di o kisi frulusu no musu wani dati nomo, ma den musu wroko makandra tu nanga a Frulusuman. Fu eksempre: Kon meki wi taki dati a boto fu wan fisiman de fu sungu. A e du ala san a man fu no sungu nanga a boto fu di a no wani dede kwetikweti. A o dede, noso a o pasa a sani disi libilibi? A fasi fa a e handri te sma wani yepi en, o meki taki a o dede noso a o tan na libi. Efu a abi bigifasi, a o weigri kande fu sma yepi en. Na a tra sei, efu a abi sakafasi a o teki a yepi di sma wani gi en èn a o tan na libi.

Na so a de tu taki na den sma di e wroko makandra nanga Yehovah Gado, a Frulusuman, o kisi frulusu. A kisi di sma e kisi frulusu na wan kado di Gado e gi wi, ma toku a no ala sma o kisi a kado dati. Yesus, a Manpikin fu Gado, ben taki: „A no ala sma di e taigi mi: ’Masra, Masra’, sa go na ini a kownukondre fu hemel, ma na a sma di e du a wani fu mi Tata na hemel, sa go na ini.”—Mateyus 7:21.

Yehovah Kotoigi e bribi taki Gado e frulusu soso den sma di e poti bribi na ini a frulusu-ofrandi fu Yesus èn di e du san Yesus leri sma (Tori fu den Apostel 4:10-12). Poti prakseri na dri prenspari sani di skrifi na ini Gado Wortu èn di wan sma musu du fu man kisi frulusu.

(1) Yesus ben taigi den mati fu en: „Na a fasi disi ala sma o sabi taki unu na mi disipel, te unu lobi makandra” (Yohanes 13:35). Na eksempre di Yesus gi fu di a dede gi trawan, e sori krin o prenspari lobi de. Den sma di lobi trawan, e sori taki den abi wan fasi di de tumusi prenspari fu kisi frulusu.

(2) Yesus ben taigi en Tata na ini begi: „Mi meki yu nen bekènti na den” (Yohanes 17:26). Gado nen, Yehovah, de prenspari gi en, èn Yesus ben sabi dati. Yesus ben begi taki a nen fu en Tata „kon santa” (Mateyus 6:9). Fu santa Gado nen wani taki dati wi musu sabi a nen dati èn wi musu si en leki wan prenspari èn santa sani. Neleki Yesus, den sma di e suku fu kisi frulusu musu gebroiki Gado nen. Den musu leri trawan tu san na Gado nen èn san na den fasi fu en (Mateyus 28:19, 20). Fu taki en leti, soso den sma di e kari Gado nen o kisi frulusu.—Romesma 10:13.

(3) Yesus ben taigi Pontius Pilatus: „Mi kownukondre no de fu a grontapu disi” (Yohanes 18:36). Furu sma na ini a ten disi no e sori bribi na ini Gado Kownukondre, noso a tirimakti fu en, pe Yesus e tiri leki Kownu. Na presi fu dati, den e poti den frutrow tapu libisma tirimakti nanga organisâsi. Tra fasi leki den sma dati, den wan di o kisi frulusu e horibaka gi Gado Kownukondre awansi san e pasa èn den e leri trawan taki a Kownukondre dati o frulusu ala libisma di e tan gi yesi na Gado.—Mateyus 4:17.

Baka di Yesus leri sma san den musu du fu kisi frulusu, den disipel fu en aksi en: „Dan suma man kisi frulusu?” Yesus piki den: „Den sani di libisma no man du, na dati Gado man du” (Lukas 18:18-30). Yehovah Kotoigi e du ala san den man fu du den sani disi di o meki taki den kisi frulusu. Den e du tranga muiti tu fu yepi trawan fu kisi frulusu.