Yehovah Kotoigi e meki sma broko trow?

„EFU wan fu den patna e teki wan tra bribi, dan a trow o broko.” Na so furu sma e denki. Son leisi, na a warskow dati son trowpatna e kisi te den bosroiti fu tron wan fu den Kotoigi fu Yehovah. Ma na ala ten sani e waka soleki fa sma e taki?

A no de fu taki dati te wan sma di trow, e bigin sori taki a wani sabi moro fu wan tra bribi, noso a e kenki a bribi fu en di a ben abi langa ten kaba, dan dati kan gi a tra patna furu broko-ede. Disi kan meki taki a firi brokosaka èn kande a e firi leki a tra patna no lobi en moro.

Nofo tron na a wefi fosi e feni en fanowdu fu teki wan tra bribi. Efu yu wefi e studeri Bijbel nanga Yehovah Kotoigi, dan fa disi kan abi krakti tapu a trowlibi fu yu? Efu yu na wan wefi di e studeri Bijbel nanga Yehovah Kotoigi, dan san yu kan du fu meki yu patna no broko en ede tumusi furu?

A fasi fa den masra e denki

Mark, di e libi na ini Australia, ben trow 12 yari kaba di en wefi bigin studeri Bijbel nanga Yehovah Kotoigi. „Mi ben abi wan koloku trowlibi èn mi ben abi wan wroko di ben gi mi furu prisiri”, na so Mark e taki. „Sani ben e waka bun na ini a libi. Ne mi wefi bosroiti fu studeri Bijbel nanga Yehovah Kotoigi. Wantronso mi ben feni taki mi no ben o man libi moro soleki fa mi ben gwenti. Na a bigin, mi no ben breiti taki mi wefi studeri Bijbel. Ma di a taigi mi taki a bosroiti fu teki dopu leki wan fu den Kotoigi fu Yehovah, mi bigin broko mi ede trutru.”

Mark bigin aksi ensrefi efu a trow fu en ben o broko fu di en wefi teki wan tra bribi. A ben denki fu tapu en wefi fu studeri Bijbel èn fu taigi en taki a no musu abi noti fu du moro nanga den Kotoigi. Ma na presi taki Mark handri sondro fu denki, a meki wan pisi ten pasa. Fa sani waka na ini a trowlibi fu en?

Mark e taki: „Koloku taki a trowlibi fu wi kon moro bun now. Sani waka moro bun na ini a trowlibi fu wi, sensi di mi wefi teki dopu leki wan Kotoigi fu Yehovah 15 yari pasa.” San meki taki a trowlibi fu den waka bun? Mark e taki: „Te mi e prakseri a ten di pasa,  dan na fu di mi wefi fiti den bun rai fu Bijbel, meki sani waka bun. Ala ten a pruberi fu sori lespeki gi mi.”

A fasi fa wefi yepi den masra fu abi wan moro bun denki

Efu yu na wan wefi di e studeri Bijbel nanga Yehovah Kotoigi, dan san yu kan du èn san yu kan taki fu meki taki yu masra no broko en ede so furu? Luku san wan tu wefi fu difrenti kondre e taki.

Sakiko, di e libi na ini Yapan, e taki: „Mi trow 31 yari kaba èn mi abi dri pikin. Mi de wan Kotoigi fu Yehovah 22 yari kaba. Son leisi a muilek fu libi nanga wan masra di no abi a srefi bribi leki yu. Ma mi e du tranga muiti fu fiti a rai fu Bijbel di e taki dati wi ’musu gaw fu yere, ma wi no musu gaw fu taki, èn wi no musu atibron esi-esi’ (Yakobus 1:19). Mi e pruberi fu sori switifasi gi mi masra èn mi e du san a wani solanga dati no de teige den wet fu Bijbel. Disi meki taki sani waka bun na ini wi trowlibi.”

Nadezhda, di e libi na ini Rosiakondre, e taki: „Mi trow 28 yari kaba èn mi de wan Kotoigi 16 yari. Fosi mi bigin studeri Bijbel, mi no ben feni taki mi masra musu de na ede fu na osofamiri. Mi ben lobi fu teki mi eigi bosroiti. Ma safrisafri mi kon si taki te mi e fiti den rai fu Bijbel, dan dati e meki taki vrede de na ini wi osofamiri èn wi de koloku (1 Korentesma 11:3). Safrisafri, a ben kon moro makriki gi mi fu saka misrefi na ondro mi masra èn ensrefi ben kon si den kenki di mi tyari kon.”

Marli, di e libi na ini Brasyonkondre, e taki: „Mi abi tu pikin èn mi trow 21 yari kaba. Tinasiksi yari pasa, mi tron wan Kotoigi. Mi kon leri taki Yehovah Gado no wani taki trowpaar prati, ma a wani taki den tan nanga makandra. Fu dati ede, mi e pruberi fu de wan bun wefi, èn mi e pruberi fu libi na wan fasi di e meki Yehovah nanga mi masra prisiri.”

Larisa, di e libi na ini Rosiakondre, e taki: „Di mi tron wan Kotoigi fu Yehovah sowan 19 yari pasa, mi ben frustan taki a moro prenspari sani di mi ben musu du, na taki mi ben musu tyari kenki kon na ini mi libi. Mi masra kan si taki Bijbel yepi mi fu de wan moro bun wefi, èn Bijbel yepi mi fu de nanga moro tangi taki mi abi so wan bun masra. Na a bigin, wi ben e meki trobi fu a fasi fa wi ben o kweki den pikin, ma now wi lusu den problema dati. Mi masra e gi den pikin pasi fu go nanga mi na den konmakandra, fu di a kon si taki den sani di den e leri drape de gi a bun fu den.”

Valquíria, di e libi na ini Brasyonkondre, e taki: „Mi abi wán pikin èn mi trow 19 yari kaba. Tinadri yari pasa, mi tron wan Kotoigi fu Yehovah. Na a bigin, mi masra no ben wani taki mi go preiki. Ma mi leri fu taki nanga en na wan switi fasi fu a tori dati, èn mi leri fu yepi mi masra frustan taki Bijbel abi bun krakti tapu mi. Safrisafri mi masra kon frustan o prenspari a de gi mi fu teki prati na a preikiwroko. Now a e horibaka gi mi te mi e du sani di abi fu du nanga a bribi fu mi. Te mi musu hori bijbelstudie na farawe presi, dan a e tyari mi go nanga wagi èn nanga pasensi a e wakti na dorosei teleki mi kaba.”

Bijbel e tyari wini kon gi a trowlibi

Efu a trowpatna fu yu e studeri nanga Yehovah Kotoigi, yu no musu frede taki a trow fu yu o broko. Furu masra nanga wefi na ala sei na grontapu, kon si taki Bijbel e tyari wini kon gi a trowlibi.

Wan masra di no de wan Kotoigi fu Yehovah, taki: „Na a bigin mi ben firi sari di mi wefi tron wan Kotoigi fu Yehovah, ma aladi a ben muilek gi mi toku mi kon si den bun bakapisi.” Wan tra masra ben taki disi fu en wefi: „A tranga bribi fu mi wefi, a fasi fa a horidoro na ini a bribi fu en, èn a fasi fa a gi yesi na Gado, meki mi kisi bigi lespeki gi Yehovah Kotoigi. Wi kisi furu wini na ini a trowlibi fu di mi wefi tron wan Kotoigi. Wi meki mofo nanga makandra fu difrenti afersi na ini a libi èn wi pramisi fu tan nanga makandra wi heri libi langa.”

 [Faki/​Prenki na tapu bladzijde 13]

Fa Yehovah Kotoigi e si a trowlibi?

Yehovah Kotoigi e si Bijbel leki a Wortu fu Gado. Fu dati ede, den e si den sani di Bijbel e taki fu a trowlibi, leki seryusu sani. Luku fa Bijbel e gi piki tapu den aksi di e kon now:

▪ Yehovah Kotoigi e gi den memre fu a gemeente fu den deki-ati fu prati nanga den trowpatna di no de wan Kotoigi? Nôno. Na apostel Paulus ben skrifi: „Efu wan brada abi wan wefi di no de na bribi, èn efu a wefi disi wani tan nanga en, dan a brada disi no musu gowe libi en; èn efu wan uma abi wan masra di no de na bribi, èn efu a masra disi wani tan nanga en, dan na uma no musu gowe libi en masra” (1 Korentesma 7:12, 13). Yehovah Kotoigi e hori densrefi na a komando disi.

▪ Wan wefi di de wan Kotoigi fu Yehovah, e kisi a deki-ati fu no gi yesi na en masra efu a masra no de wan Kotoigi? Nôno. Na apostel Petrus ben skrifi: „Un uma, . . . un musu saka unsrefi tu na ondro un eigi masra, so taki te sonwan fu den no e du san a wortu e taki, dan unu kan wini den sondro wortu nanga yepi fu a fasi fa unu e tyari unsrefi, bika den si nanga den eigi ai fa unu e tyari unsrefi na wan krin fasi èn nanga bigi lespeki.”—1 Petrus 3:1, 2.

▪ Yehovah Kotoigi e leri sma taki wan masra na a moro hei edeman di de? Nôno. Na apostel Paulus taki: „Mi wani fu unu sabi taki Krestes na a ede fu ibri man; a man na a ede fu na uma, èn Gado na a ede fu Krestes” (1 Korentesma 11:3). Wan Kresten wefi o lespeki en masra leki na edeman fu na osofamiri. Ma wan masra abi wan edeman tu, fu di a abi fu gi frantwortu na Gado èn na Krestes. Fu dati ede, te wan masra taigi en wefi fu du wan sani di de teige Gado wet, dan wan Kresten wefi o „gi yesi na en [Gado] na presi fu libisma”.—Tori fu den Apostel 5:29.

▪ Yehovah Kotoigi e leri sma taki den no mag broko trow? Nôno. Yesus Krestes ben taki: „Mi e taigi unu taki efu wan man broko trow nanga en wefi, ma a wefi no ben du hurudu, èn a man trow nanga wan tra uma, dan a du sutadu” (Mateyus 19:9). Fu dati ede, Yehovah Kotoigi e hori densrefi na san Yesus ben taki, èn dati na taki wan sma mag broko trow efu wan fu den patna du sutadu. Ma den e bribi tu taki sma no musu broko trow fu pikinpikin sani ede. Den e gi den memre fu a gemeente fu den deki-ati fu hori densrefi na den wortu disi di Yesus taki: „Wan man sa gowe libi en papa nanga mama èn a sa tan nanga en wefi, èn a man nanga en wefi sa de wán skin. . . . Fu dati ede, nowan sma musu prati san Gado poti na ondro wán tyatyari.”—Mateyus 19:5, 6.