Yu e bow na tapu santi noso na tapu ston?

YU LOBI fu leisi Bijbel? Yu e poti wan spesrutu ten fu studeri Bijbel doronomo nanga wan fu den Kotoigi fu Yehovah? Efu dati de so, dan a no de fu taki dati den sani di yu kon sabi yepi yu fu frustan moro bun fu san ede grontapu lai nanga so furu problema (Openbaring 12:9, 12). Boiti dati, furu bijbeltekst gi yu trowstu kande na ini muilek ten èn sosrefi howpu gi a ten di e kon.—Psalm 145:14; 147:3; 2 Petrus 3:13.

A de tumusi prenspari taki den sma di wani tron bakaman fu Krestes e teki soifri sabi fu Bijbel. Ma na dati wawan den musu du? Nôno. Te wan bijbelstudenti wani tan de wan tru Kresten, spesrutu te a e kisi tesi tapu en bribi, dan a musu du wan tra prenspari sani. San na dati? Fu kisi piki tapu na aksi dati, meki wi go luku syatu a Bergitaki, noso a takimakandra di Yesus ben abi na tapu wan bergi na ini Galilea.—Mateyus 5:1, 2.

Tu oso e kisi fu du nanga den srefi sani

Yu sabi san Yesus ben taki na ini a Bergitaki? A takimakandra disi di furu sma sabi, skrifi na ini na Evangelietori fu Mateyus nanga a di fu Lukas (Mateyus 5:1–7:29; Lukas 6:20-49). A e teki 20 miniti nomo fu leisi a pisi disi. Ma toku, moro leki 20 sani fu den Hebrew Buku fu Bijbel de fu feni na ini a takimakandra dati èn a abi moro leki 50 agersitori. Wan fu den agersitori di abi fu du nanga tu man di ben bow oso, na wan apartiwan, fu di Yesus gebroiki na agersitori dati na a kaba fu a takimakandra fu en. Te yu frustan o prenspari a lasti agersitori dati de, dan dati o yepi yu fu si fa yu kan tan tanapu kánkan leki wan bakaman fu Krestes, awansi sortu tesi yu e kisi tapu yu bribi.

Yesus ben taki: „Efu wan sma e yere den sani disi di mi taki èn a e du den, dan a sa de leki wan koni man di bow en oso na tapu ston-gron. Ne alen fadon, bigi frudu kon, winti wai èn a naki na oso dati bun tranga, ma na oso no fadon, bika a ben bow na tapu ston-gron. Sosrefi, efu wan sma e yere den sani disi di mi taki èn a no e du den, dan a sa de leki wan don man di bow en oso na tapu santi. Ne alen fadon, bigi frudu kon, winti wai èn a naki na oso dati bun tranga èn na oso fadon broko èn noti fu en no tan abra.”—Mateyus 7:24-27.

Wan man di „diki go dipi na ini a gron”

Sortu prenspari sani Yesus ben wani leri den disipel fu en nanga na agersitori disi di e taki fu den tu man di bow oso? Fu kon sabi dati, meki wi go ondrosuku den wortu fu Yesus moro bun. San ben pasa nanga den tu oso? Den tu oso ben kisi fu du nanga den srefi sani. Kande den oso ben gersi makandra. A ben kan de so tu taki den ben de na ini a srefi kontren, èn kande den ben de sei nanga sei srefi. Ma toku, wan fu den ben bow na tapu santi èn a trawan ben bow na tapu ston. Fa dati kan? Soleki fa na Evangelietori fu Lukas e sori, dan a koni man „diki go dipi na ini a gron” so taki a doro a ston-gron te fu kaba  (Lukas 6:48). Leki bakapisi fu dati, na oso fu a koni man ben tan tanapu steifi.

San Yesus ben wani tyari kon na krin? Yesus no ben fruteri na agersitori disi fu sori fa den oso ben de noso pe den ben tanapu noso o tranga a winti nanga na alen ben de. Nôno, nanga na agersitori disi Yesus ben wani sori fa den man di bow den oso, ben handri. Wan fu den man diki go dipi na ini a gron, aladi a trawan no du dati. Fa yu kan de leki a koni man di ben diki go dipi na ini a gron? Yesus srefi ben sori san prenspari na ini na agersitori disi, fu di a ben taki: „Dan fu san ede unu e kari mi ’Masra, Masra!’, ma unu no e du den sani di mi taki? Ibri sma di e kon na mi, di yere san mi taki èn di e du en tu, mi sa sori unu suma a gersi: A de leki wan man di ben . . . diki go dipi na ini a gron fu poti wan fondamenti na tapu ston-gron.”—Lukas 6:46-48.

Iya, te wan sma e arki den leri fu Bijbel nomo noso te a e leisi Bijbel na oso nomo, dan dati de neleki a no e diki go na ini a gron, ma a e bow en oso na tapu santi. Ma wan sma musu du tranga muiti te a wani du san Krestes leri. Disi wani taki dati a musu diki go dipi fu man doro a ston-gron.

Sobun, yu musu du san yu e yere efu yu wani tan de wan bakaman fu Krestes. Te yu e du san yu leri fu Bijbel, dan yu de leki a koni man di ben diki go dipi na ini a gron. Fu dati ede, ibri bijbelstudenti musu teki ten fu aksi ensrefi disi: ’Mi na wan sma di e yere nomo, noso wan sma di e du san mi yere? Mi e leisi èn studeri Bijbel nomo sondro fu du wan sani? Noso mi e hori misrefi na den komando fu Bijbel te mi musu teki bosroiti?’

Den wini di wi o kisi te wi e diki dipi

Luku na ondrofenitori fu José. En papa nanga mama leri en fu tyari ensrefi soleki fa Bijbel e taki, ma noiti José srefi studeri Bijbel. José e taki: „Di mi froisi fu oso, dan mi ben pruberi fu de wan bun sma, ma mi ben abi takru mati. Mi bigin gebroiki drugs, mi ben e du hurudu, èn ibri leisi mi ben e feti nanga trawan.”

Te fu kaba, José bosroiti fu kenki a fasi fa a ben e libi èn a bigin studeri Bijbel fayafaya. José e taki: „Wan sani di gi mi deki-ati trutru fu kenki, na di mi ben e leisi èn di mi kon frustan a Bergitaki fu Yesus. Ma a ben teki ten fu kenki den fasi fu mi èn fu drai mi libi. Na a bigin, mi ben frede san den so-kari mati fu mi ben o denki fu mi, ma bakaten mi no ben frede moro. Mi no ben e lei moro, mi no ben taki dotitaki moro, èn mi bigin go na den konmakandra fu Yehovah Kotoigi. Mi leri taki te mi no e feti baka grontapu sani èn te mi e teki den rai fu Bijbel, dan dati e meki taki mi de koloku trutru, soleki fa Yesus ben pramisi.”—Mateyus 5:3-12.

San o de a bakapisi te yu e diki dipi fu bow  na tapu ston-gron, noso te yu e meki tranga muiti fu du san yu leisi na ini Gado Wortu? Yesus ben taki: „Di wan frudu kon, dan a liba naki na oso dati bun tranga, ma a no ben tranga nofo fu seki na oso, bika na oso ben bow bun” (Lukas 6:48). Iya, te yu e bow bun fu di yu e du san yu leri, dan awansi o hebi a tesi de yu bribi no o kon swaki, nôno, yu no o degedege srefi. A sani disi e gi wi deki-ati trutru!

A disipel Yakobus, na afu-brada fu Yesus, e taki fu ete wan blesi di bijbelstudenti o kisi te den no e yere wawan san skrifi na ini Gado Wortu, ma te den e du dati tu. Yakobus ben skrifi: „Un musu tron sma di e du san a wortu e taki, èn un no musu de sma di e yere nomo . . . Ma te wan sma e luku finifini san skrifi na ini a volmaakti wet di e meki sma kon fri, èn te a e tan du dati, dan a sma disi o de koloku, bika a no de wan sma di e frigiti san a yere, ma a de wan sma di e du san a wortu e taki.”—Yakobus 1:22-25.

Iya, den sma di e teki a rai fu Bijbel de koloku trutru. Leki bakapisi fu dati, den bakaman fu Krestes e kisi krakti fu tanapu kánkan te den e kisi tesi tapu den bribi èn te den musu sori taki den e tan dini Gado awansi san e pasa.

San yu o du?

Di Yesus hori a Bergitaki, dan a tyari kon na krin taki te wi e dini Yehovah, wi musu teki bosroiti. Fu eksempre, Yesus leri taki wan sma en ai krin noso a dungru, wan sma e dini Gado leki srafu noso a e dini gudu, èn wan sma e waka na tapu a smara pasi noso a e waka na tapu a bradi wan (Mateyus 6:22-24; 7:13, 14). Ne, na ini a lasti agersitori di Yesus gi fu den tu man di ben bow oso, a taigi den bakaman fu en taki ete wan sani de di den musu bosroiti. A ben taigi den taki den kan de leki a koni man noso den kan de leki a don man.

Te yu e tan meki muiti nanga yu heri ati fu du san yu leri fu Bijbel, dan yu de leki a koni man. Iya, te yu e diki dipi fu doro ston-gron, dan dati o tyari blesi kon gi yu now èn na ini a ten di e kon.—Odo 10:25.

[Prenki na tapu bladzijde 30]

Du san yu leri so taki yu kan tanapu kánkan