Gado e broko en ede nanga mi?
Gado e broko en ede nanga mi?
Sani di sma gwenti taki:
▪ „Gado bigi tumusi fu broko en ede nanga den problema fu mi.”
▪ „Mi no denki taki a e broko en ede nanga mi.”
San Yesus ben taki?
▪ „A no de so, taki sma e seri feifi pikin fowru gi tu sensi di no warti furu? Toku Gado no e frigiti nowan fu den. Ma a teri srefi ala den wiwiri na un ede. No frede; un warti moro leki furu pikin fowru” (Lukas 12:6, 7). A no de fu taki dati Yesus ben leri sma taki Gado e broko en ede nanga wi.
▪ „Noiti un musu broko un ede nanga sani èn un no musu taki: ’San wi o nyan?’ noso ’San wi o dringi?’ noso ’San wi o weri?’ Bika ala den sani disi na san den grontapusma e feti fu kisi. Bika un Tata na hemel sabi taki unu abi ala den sani disi fanowdu” (Mateyus 6:31, 32). Yesus ben bribi taki Gado sabi san ibriwan fu wi abi fanowdu.
BIJBEL e taki krin dati Gado e broko en ede nanga wi (Psalm 55:22; 1 Petrus 5:7). Efu a e broko en ede nanga wi, dan fu san ede wi e pina so furu na ini a ten disi? Efu Gado na wan lobi-ati Gado di abi ala makti, dan fu san ede a no e tyari wan kaba kon na a pina di wi e pina?
A piki tapu den aksi dati abi fu du nanga wan sani di furu sma no sabi, èn dati na taki Satan Didibri na a tiriman fu na ogri grontapu disi. Di Satan ben tesi Yesus, dan a ben wani gi en ala den kownukondre fu grontapu. Satan taki: „Mi o gi yu a makti fu tiri ala den sani disi èn mi o gi yu a glori fu den tu, bika na mi kisi a makti, èn mi e gi en na suma mi wani.”—Lukas 4:5-7.
Suma meki taki Satan tron a tiriman fu grontapu? Di wi fosi papa nanga mama, Adam nanga Eva, gi yesi na Satan, èn drai baka gi Gado, dan na so fasi den teki Satan leki den tiriman. Sensi a ten dati di sma opo densrefi teige Yehovah Gado, dan a sori pasensi, fu di a meki ten pasa fu sori taki Satan no man tiri libisma kwetikweti. Yehovah no e dwengi sma fu anbegi en, ma a gi wi na okasi fu drai kon baka na en.—Romesma 5:10.
Fu di Gado e broko en ede nanga wi, meki a seti sani, so taki Yesus frulusu wi fu a tiri fu Satan. Na ini a ten di e kon Yesus sa „meki Didibri, a wan di man kiri sma, kon tron noti” (Hebrewsma 2:14). Na so fasi a sa „tyari wan kaba kon na den wroko fu Didibri”.—1 Yohanes 3:8.
Paradijs sa seti baka na a grontapu disi. Na a ten dati, Gado „o figi ala watra puru na den [sma] ai, èn dede no sa de moro; nowan sari, noso krei, noso pen no sa de moro. Den fositen sani [o] pasa gowe”.—Openbaring 21:4, 5. *
[Futuwortu]
^ paragraaf 12 Efu yu wani sabi moro fu san ede Gado e gi pasa taki pina de, dan luku kapitel 11 fu a buku San Bijbel e leri wi trutru? Yehovah Kotoigi tyari en kon na doro.
[Prenspari pisi na tapu bladzijde 8]
Paradijs sa seti baka na a grontapu disi