YU BEN sabi taki na apostel Paulus ben abi famiri di ben de bakaman fu Yesus? *— Bijbel e sori taki wan sisa fu Paulus, èn wan manpikin fu a sisa disi ben de bakaman fu Yesus. A manpikin fu a sisa disi, kibri a libi fu Paulus! Wi no sabi a nen fu a yonkuman disi, èn wi no sabi a nen fu en mama tu, ma wi sabi san a ben du. Yu wani sabi dati tu?—

Didyonsro Paulus drai kon baka fu a di fu dri zendelingwaka fu en èn a de na ini Yerusalem. Soleki fa a sori, dati ben de na ini a yari 56. Sma grabu Paulus èn a musu go na fesi krutu. Ma den feanti fu Paulus no wani taki a musu go na fesi krutu. Den wani kiri en! Sobun, den seti sani so taki 40 man go wakti Paulus na pasi fu kiri en te a e pasa.

Na a wan noso tra fasi, Paulus en sisa pikin kon yere a tori. Yu sabi san a e du?— A e go na Paulus èn a e taigi en san sma wani du. Wantewante Paulus go taigi wan legre ofsiri: „Tyari a yonkuman disi go na a komandanti fu a legre, bika a abi wan sani fu taigi a komandanti.” Na ofsiri e tyari a yonkuman go na a komandanti Klaudius Lisias, èn a e taigi en taki a yonkuman abi wan prenspari sani fu taigi en. Klaudius e tyari a yonkuman go na wan sei, èn a yonkuman e taigi en ala sani.

Klaudius e warskow Paulus en sisa pikin: „No fruteri nowan sma taki yu taigi mi a tori disi.” Ne a seni kari tu fu den legre ofsiri èn a taigi den fu sreka 200 srudati, 70 srudati na tapu asi, èn 200 srudati di e feti nanga lansri, èn den musu waka go na Sesarea. Neigi yuru a neti dati, den 470 man e gowe èn den e tyari Paulus go na a Rome tiriman Feliks, na ini Sesarea, sondro taki wan sani pasa nanga en. Klaudius skrifi wan brifi gi Feliks pe a fruteri en fu den sani di sma seti fu kiri Paulus.

Sobun, den Dyu musu go miti Paulus na wan krutubangi na ini Sesarea, fu taki sortu kragi den abi teige en. Ma a no de fu taki dati den no abi buweisi taki Paulus du wan ogri. Toku, den e hori Paulus tu yari na ini strafu-oso,  aladi a no du nowan ogri. Fu dati ede, Paulus e aksi fu go na fesi krutu na ini Rome, èn den e seni en go drape.​—Tori fu den Apostel 23:16–24:27; 25:8-12.

San wi kan leri fu a tori disi fu a sisa pikin fu Paulus?— Wi e leri taki wi musu abi deki-ati fu opo taki gi san reti, èn wi kan kibri a libi fu sma te wi e du dati. Srefi di Yesus ben sabi taki feanti „ben e suku fu kiri en”, a ben e tan fruteri sma fu Gado Kownukondre. Yesus taigi wi fu du a srefi. Wi sa du dati? Wi o du dati, efu wi abi deki-ati neleki a sisa pikin fu Paulus.​—Yohanes 7:1; 15:13; Mateyus 24:14; 28:18-20.

Paulus ben gi en yongu mati Timoteyus a deki-ati: „Tan poti prakseri na yusrefi èn na a fasi fa yu e gi leri. Hori yusrefi na den sani disi, bika te yu du disi, dan yu sa frulusu yusrefi èn sosrefi den sma di e arki yu” (1 Timoteyus 4:16). Wi kan de seiker taki a sisa pikin fu Paulus ben fiti a rai disi fu en omu. Yu sa du dati tu?