Seibi sani di yu kan du fu kisi wini te yu e leisi Bijbel

„Bijbel na a wan-enkri buku di seri so furu na grontapu, èn ibri yari baka moro nanga moro Bijbel e seri.”—TIME MAGAZINE.

„Son tron mi e leisi Bijbel, ma mi feni taki a soi srefisrefi.” —KEITH, WAN POPI POKUMAN FU INGRISIKONDRE.

FURU sma abi wan Bijbel, ma toku a gersi leki den no e kisi furu wini te den e leisi en. Trawan baka, e warderi den sani srefisrefi di den e leisi na ini Bijbel. Fu eksempre, wan uma di nen Nancy e taki: „Sensi di mi bigin leisi Bijbel fruku mamanten, èn mi e denki dipi fu den sani di mi leisi, mi feni taki mi de srekasreka gi iniwan problema di kan opo kon a dei dati. A leisi di mi e leisi Bijbel, yepi mi moro leki iniwan tra sani di mi pruberi fu du na ini den pisi ten di mi ben firi brokosaka, na ini den 35 yari di pasa.”

Srefi efu noiti yu no leisi Bijbel, yu e feni en moi fu si taki trawan kisi yepi fu di den leisi Bijbel? Efu yu e leisi Bijbel kaba, dan yu ben sa wani kisi moro wini te yu leisi en? Efu dati de so, dan yu kan pruberi fu du den seibi sani di kari na ini na artikel disi.

1 Leisi Bijbel nanga a yoisti marki

▪ Yu ben kan leisi Bijbel fu di yu e si en leki wan moi buku nomo, noso fu di yu feni taki yu musu leisi en. Boiti dati, yu kan leisi Bijbel fu di yu e prakseri taki a kan tiri yu na ini a grontapu disi di lai problema. Ma yu sa kisi moro wini te yu e leisi Bijbel fu di yu wani leri den tru tori di abi fu du nanga Gado. Boiti dati, yu sa kisi furu blesi te yu e leisi Bijbel fu di yu wani si fa a boskopu na ini kan abi krakti tapu yu libi.

A Wortu fu Gado e sori o prenspari a de fu leisi en nanga a yoisti marki, fu di a e agersi Bijbel nanga wan spikri. A e taki: „Bika efu wan sma e yere a wortu, ma a no e du san a wortu e taki, dan a de leki wan sma di e luku en fesi na ini wan spikri. A  e luku ensrefi, dan a e gowe, èn wantewante a e frigiti sortu sma a de. Ma te wan sma e luku finifini san skrifi na ini a volmaakti wet di e meki sma kon fri, èn te a e tan du dati, dan a sma disi o de koloku, bika a no de wan sma di e frigiti san a yere, ma a de wan sma di e du san a wortu e taki.”—Yakobus 1:23-25.

A man na ini na eksempre disi e luku en fesi na ini a spikri, ma a no e kenki a fasi fa a de. Kande a e luku ensrefi gawgaw nomo na ini a spikri, noso kande a no wani tyari kenki kon. Na so a de tu, taki wi no sa kisi furu wini te wi e leisi Bijbel gawgaw, noso te wi no e fiti den rai na ini wi libi. Tra fasi leki dati, wi kan de trutru koloku te wi e leisi Bijbel finifini nanga a marki fu tron sma di e „du san a wortu e taki”. Na so wi o meki a denki fu Gado abi krakti tapu wi denki èn tapu den sani di wi e du.

2 Gebroiki wan bun vertaling

▪ A kan de so taki yu abi furu Bijbelvertaling na ini yu tongo. Aladi a de so taki iniwan vertaling fu Gado Wortu kan meki yu kisi wini, toku son sma e gebroiki bun owru vertaling noso wan vertaling nanga ala sortu kefalek wortu di muilek fu frustan (Tori fu den Apostel 4:13). Son vertaling e kenki a soifri boskopu fu Bijbel srefi, fu di den e taki fu sani di abi fu du nanga den gwenti fu sma. Fu eksempre, na presi fu Gado nen, Yehovah, son vertaling e gebroiki wortu soleki „Gado” noso „Masra”. Sobun, te yu o luku sortu vertaling yu o gebroiki, dan suku wan soifri Bijbelvertaling di makriki fu frustan èn di e gi yu deki-ati fu leisi go doro.

Milyunmilyun sma na heri grontapu, feni taki a Nieuwe-Wereldvertaling (Nyun Grontapu-vertaling), na wan soifri vertaling di makriki fu frustan èn di e gi sma deki-ati fu leisi go doro. * Luku na eksempre fu wan owru man na ini Bulgaria. A ben go na wan konmakandra fu Yehovah Kotoigi èn den ben gi en wan Nieuwe-Wereldvertaling. Baka a konmakandra, a ben taki: „Mi leisi Bijbel furu yari langa, ma noiti mi leisi so wan vertaling di makriki fu frustan èn di naki mi ati so.”

3 Begi

▪ Yu kan frustan Bijbel moro bun te yu e aksi a Skrifiman fu Bijbel fu yepi yu, soleki fa a psalm skrifiman ben du dati. A ben taki: „Opo mi ai, so taki mi kan luku den moi sani di skrifi na ini a wet fu yu” (Psalm 119:18). Begi Gado ibri tron te yu e leisi Bijbel, èn aksi en fu yepi yu frustan en Wortu. Yu kan taki en tangi tu taki a gi wi Bijbel, fu di sondro Bijbel wi no ben o man kon sabi En.—Psalm 119:62.

Gado e arki te sma e begi fu kisi yepi na so wan fasi? Luku san ben pasa nanga tu tini meisje di de sisa fu makandra èn di e libi na ini Urugwei. Den no ben frustan san Bijbel e taki na ini Danièl 2:44 èn den begi taki Gado seni wan sma fu yepi den frustan a tekst disi. Aladi a Bijbel fu den meisje disi ben opo ete, tu Kotoigi fu Yehovah kon na den doro, èn den leisi a srefi tekst dati di den meisje ben begi fu frustan. Den Kotoigi sori den taki Gado Kownukondre o tiri na presi fu libisma tirimakti. * Den meisje disi ben kisi na overtoigi taki Gado ben piki a begi fu den.

4 Leisi Bijbel ibri dei

▪ Wan organisâsi di e tyari buku kon na doro ben taki dati „wantronso sma bigin bai moro furu Bijbel” baka di sma ben du ogri-ati sani fu gens a tirimakti na ini Amerkankondre, tapu 11 september 2001. Furu sma e leisi Gado Wortu te den de na nowtu. Ma Bijbel e gi wi a deki-ati fu leisi en ibri dei. Bijbel e taki: „Yu musu tan taki fu a wet di skrifi na ini a buku disi. Dei nanga neti yu musu  leisi en nanga wan safri sten, so taki yu kan du ala den sani di skrifi na ini. Te yu du dati, dan sani o waka bun nanga yu èn yu o handri nanga koni.”—Yosua 1:8.

A de prenspari trutru fu leisi Bijbel doronomo. Wi kan agersi dati nanga wan man di siki na en ati èn di e bosroiti fu nyan moro gosontu nyanyan. Efu a ben o du a sani disi soso na a momenti te a firi wan hebi pen na en ati, dan dati ben o yepi en? Nôno. A musu hori ensrefi na a bosroiti di a teki fu tan nyan gosontu nyanyan so taki a kan kisi wini. Na a so a de tu, taki te yu e leisi Bijbel ibri dei, dan dati o meki taki „sani o waka bun nanga yu”.

5 Leisi Bijbel na difrenti fasi

▪ A kan bun fu leisi Bijbel fu Genesis te go miti Openbaring, ma kande yu o feni en moro moi fu leisi Bijbel na tra fasi. Luku wan tu fasi fa yu kan du dati.

Leisi fu wan spesrutu sma na ini Bijbel. Leisi ala den kapitel noso den Bijbel buku di e taki fu wan spesrutu anbegiman fu Gado, soleki:

• Yosef: Genesis 37-50.

• Rut: Rut 1–3.

• Yesus: Mateyus 1-28; Markus 1-16; Lukas 1-24; Yohanes 1-21. *

Leisi fu wan spesrutu tori. Leisi den Bijbeltekst di abi fu du nanga wan spesrutu tori. Fu eksempre, luku den tori di abi fu du nanga begi. Baka dati, leisi sortu rai Bijbel e gi te a abi fu du nanga begi, èn leisi den difrenti begi fu sma di skrifi na ini Bijbel. *

Leisi nanga wan tranga sten. Yu kan kisi furu wini te yu e leisi Bijbel nanga wan tranga sten (Openbaring 1:3). Yu kan leisi srefi nanga yu heri osofamiri. Ibri memre fu yu osofamiri kan leisi wan tra paragraaf noso den kan leisi den difrenti pisi pe sma e taki na ini a tori. Son sma lobi fu arki Bijbel tapu CD. Wan uma ben taki: „A ben muilek gi mi fu bigin leisi Bijbel. Fu dati ede, mi bigin arki Bijbel tapu CD. Now mi kon si taki Bijbel moi moro wan span buku.”

6 Denki dipi fu san yu leisi

▪ Wi abi furu fu du na ini a ten disi èn furu sani de di kan puru wi prakseri. Fu dati ede a no makriki fu denki dipi fu sani. Fu eksempre, baka te wi nyan, dan a nyanyan musu sidon pikinso na ini wi bere, so taki wi skin kan kisi wini fu en. Na so wi musu denki dipi fu san wi e leisi na ini Bijbel, so taki wi man kisi wini fu den sani dati. Te wi e denki dipi, dan wi e prakseri den sani di wi leisi èn wi kan aksi wisrefi sani soleki: ’San mi leri fu Yehovah Gado? Fa a pisi disi e fiti na mi? Fa mi kan gebroiki den sani di mi leisi fu yepi trawan?’

Te wi e denki dipi na so wan fasi, dan wi e meki a boskopu fu Bijbel naki wi ati èn wi o abi moro prisiri te wi e leisi Gado Wortu. Psalm 119:97 e taki: „Mi lobi a wet fu yu srefisrefi. Heri dei mi e poti prakseri na en.” Fu di a psalm skrifiman ben e denki dipi fu sani, meki a ben man poti prakseri na Gado Wortu heri dei. Disi ben yepi en trutru fu lobi den sani di a leri.

7 Kisi yepi fu frustan Bijbel

▪ Gado no e fruwakti taki wisrefi o man frustan en Wortu dorodoro. A skrifi srefi na ini Bijbel taki „wan tu sani . . . muilek fu frustan” (2 Petrus 3:16). A Bijbel buku Tori fu den Apostel e taki fu wan heiman fu Etiopia, di no ben man frustan wan pisi di a ben e leisi na ini Bijbel. Gado ben seni wan fu den futuboi fu en fu yepi a man disi fu Etiopia, èn baka dati a man „teki pasi go moro fara nanga prisiri”.—Tori fu den Apostel 8:26-39.

Sosrefi yu kan kisi moro wini te yu e leisi Bijbel, te yu e meki wan sma yepi yu fu frustan san yu e leisi. Pruberi fu miti Yehovah Kotoigi na ini yu birti, noso skrifi go na a adres na tapu bladzijde 4 fu a tijdschrift disi so taki yu kan studeri Bijbel na yu oso sondro fu pai gi dati.

[Futuwortu]