San a tori fu Eden abi fu du nanga yu

A DE fu fruwondru taki wan fu den moro prenspari reide fu san ede sabiman e taki dati a tori fu Eden no tru, na taki tra pisi fu Bijbel no e taki fu dati. Fu eksempre, Paul Morris, wan professor fu kerkitori, e skrifi: „Tra pisi fu Bijbel no e taki fu a tori fu Eden.” Aladi tra sabiman agri nanga en, toku a sani di a taki no kan tru.

Fu taki en leti, Bijbel e taki difrenti leisi fu a dyari fu Eden, Adam, Eva, nanga a sneki. * Ma a fowtu di wan tu sabiman e meki, no de so seryusu te yu ben o teki en gersi nanga wan moro bigi fowtu di sma e meki. Fu di kerki fesiman nanga sma di e krutu Bijbel, e taki dati a tori na ini Genesis no tru, meki den e pruberi fu meki sma bribi taki Bijbel no tru. Fa so?

Efu wi wani frustan den tra pisi fu Bijbel, dan a prenspari fu frustan san ben pasa na ini Eden. Fu eksempre, Gado Wortu skrifi na so wan fasi taki a e yepi wi fu feni piki tapu den moro prenspari aksi di libisma abi. Ibri tron baka den piki di Bijbel e gi tapu den aksi dati abi fu du nanga den sani di ben pasa na ini a dyari fu Eden. Luku wan tu eksempre.

● Fu san ede wi e kon owru èn wi e dede? Adam nanga Eva ben o libi fu têgo efu den ben tan saka densrefi na ondro Yehovah. Soso te den ben o opo densrefi teige Gado, den ben o dede. Na a dei di den opo densrefi teige Gado, den bigin dede (Genesis 2:16, 17; 3:19). Den kon abi sondu èn na sondu wawan den ben kan gi den bakapikin fu den. Bijbel e taki: „Neleki fa wán man meki sondu kon na grontapu èn sondu fu en sei tyari dede kon, èn na so fasi ala sma e dede, bika den alamala sondu.”​—Romesma 5:12.

● Fu san ede Gado e gi pasi taki ogridu de? Na ini a dyari fu Eden, Satan kari Gado wan leiman di e hori bun sani na baka gi den sma di a meki (Genesis 3:3-5). Na so fasi a ben wani sori taki Yehovah no e tiri na wan reti fasi. Adam nanga Eva ben bosroiti fu gi yesi na Satan, èn na so fasi den weigri fu teki a tiri fu Yehovah. Fu taki en leti, den ben sori taki libisma kan bosroiti gi densrefi san bun èn san ogri. Yehovah di e du san reti èn di bun dorodoro, sabi taki wán fasi nomo de fu sori san tru. A ben gi libisma na okasi fu tiri  densrefi soleki fa den wani. Leki bakapisi fu dati ogridu lai, èn wan fu den reide fu san ede dati de so, na fu di Satan tan abi krakti tapu sma. Safrisafri disi tyari wan prenspari tru tori kon na krin, èn dati na taki libisma no man tiri densrefi sondro Gado.​—Yeremia 10:23.

● San Gado abi na prakseri gi grontapu? Na ini a dyari fu Eden, Yehovah ben sori taki grontapu ben musu de wan moi presi. A gi Adam nanga Eva a komando fu meki pikin èn fu furu grontapu. Boiti dati den musu „basi” ala sani so taki heri grontapu ben kan moi tu èn ala sani ben kan waka bun (Genesis 1:28). Sobun, Gado ben wani taki grontapu tron wan paradijs pe libisma sondro fowtu ben o libi leki wán famiri, di de bakapikin fu Adam nanga Eva. Furu sani di skrifi na ini Bijbel abi fu du nanga a kontru fu a sani di Gado abi na prakseri gi grontapu sensi a bigin.

● Fu san ede Yesus Krestes kon na grontapu? Fu di Adam nanga Eva ben opo densrefi teige Gado na ini a dyari fu Eden, meki den nanga ala den bakapikin fu den kisi dedestrafu. Ma na wan lobi-ati fasi Gado gi wi howpu. A seni a Manpikin fu en kon na grontapu fu sorgu gi a sani di Bijbel e kari wan lusu-paiman (Mateyus 20:28). San dati wani taki? We, Yesus ben de „a lasti Adam”, a ben man du san Adam no ben du. Yesus ben tan libi leki wan libisma sondro sondu, fu di a tan gi yesi na Yehovah. Baka dati, a ben de klariklari fu gi en libi leki wan ofrandi, noso lusu-paiman. Na so fasi a ben sorgu taki ala libisma di e gi yesi na Gado kisi pardon fu den sondu, èn te fu kaba den o kisi a libi di Adam nanga Eva ben abi na ini a dyari fu Eden, fosi den ben sondu (1 Korentesma 15:22, 45; Yohanes 3:16). Sobun Yesus gi a dyaranti taki a prakseri di Yehovah abi fu meki a grontapu disi tron wan paradijs leki Eden, o kon tru. *

Den sani di Gado abi na prakseri a no sani di sma no man frustan, èn a no abi fu du nanga den denki fu kerki leriman. Disi na wan trutru tori. Neleki fa a dyari fu Eden ben de wan trutru presi na a grontapu disi, pe trutru meti nanga trutru sma ben de, na so a pramisi fu Gado o kon tru seiker na ini a ten di e kon. Yu o de drape tu? A de na yu. Gado wani taki so furu sma leki a kan o de drape, srefi den sma di no libi soleki fa Gado wani.​—1 Timoteyus 2:3, 4.

Di Yesus ben de fu dede, dan a taki nanga wan man di no ben libi soleki fa Gado wani. A man ben de wan ogriman, a ben sabi taki a frudini en fu kisi dedestrafu. Ma a suku trowstu nanga howpu na Yesus. San Yesus taigi en? A taigi en: „Yu o de nanga mi na ini Paradijs” (Lukas 23:43). Yesus ben wani si a man dati drape, leki wan sma di kisi wan opobaka èn di kisi na okasi fu libi fu têgo na ini wan paradijs neleki fa Eden ben de. Efu Yesus ben wani dati gi wan man di ben de wan ogriman fosi, dan a no wani dati gi yu tu? Iya, a wani dati trutru! En Tata wani dati tu! Efu yu wani libi na ini a ten dati, dan du ala san yu man fu leri fu a Gado di ben meki a dyari fu Eden.

[Futuwortu]

 [Faki/​Prenki na tapu bladzijde 10]

WAN PROFEITITORI DI E KRUDERI NANGA BIJBEL

„Mi o meki yu nanga na uma tron feanti, èn yu pikin nanga en pikin o de feanti. A pikin fu na uma o masi yu ede, èn yu o gi a pikin fu na uma mankeri na en bakafutu.”​—Genesis 3:15.

Dati na a fosi profeititori na ini Bijbel di Gado ben taki na ini Eden. Suma na a uma, den pikin fu en, a sneki, èn den pikin fu a sneki? Na sortu fasi den ben o de „feanti” fu makandra?

A SNEKI

Satan Didibri.​—Openbaring 12:9.

NA UMA

Yehovah en organisâsi fu yeye libisani na hemel (Galasiasma 4:26, 27). Yesaya ben taki fu „na uma”, èn na uma disi ben o meki wan pipel di ben o de fu Gado.​—Yesaya 54:1; 66:8.

DEN PIKIN FU A SNEKI

Den wan di bosroiti fu du a wani fu Satan.​—Yohanes 8:44.

DEN PIKIN FU NA UMA

Yesus Krestes, di komoto fu a pisi fu Yehovah en organisâsi na hemel, na a moro prenspari pikin. Boiti en, den tra „pikin” na den brada fu Krestes di o tiri makandra nanga en na hemel. Den salfu Kresten dati na wan agersi pipel, noso „na Israel fu Gado”.​—Galasiasma 3:16, 29; 6:16; Genesis 22:18.

A MANKERI DI NA UMA BEN KISI NA EN BAKAFUTU

Satan ben meki taki sma kiri Yesus, a Mesias. Ma a sani dati no tan langa, fu di Yesus kisi wan opobaka.

DEN O MASI NA EDE FU A SNEKI

Yesus o pori Satan fu têgo. Srefi fosi a ten dati, Yesus o tyari wan kaba kon na a ogri di Satan bigin du sensi na ini Eden.​—1 Yohanes 3:8; Openbaring 20:10.

Efu yu wani sabi san na a moro prenspari tori na ini Bijbel, dan luku a brochure San na a boskopu fu Bijbel? Yehovah Kotoigi tyari en kon na doro.

[Prenki na tapu bladzijde 11]

Adam nanga Eva ben kisi fu du nanga den takru bakapisi fu a sondu fu den