DI A boi noso meisje fu yu ben yongu ete, dan yu ben sorgu taki a no kisi mankeri na ini na oso? Kande yu ben sorgu taki stroom no naki en, kande yu ben kibri srapu sani soleki nefi, èn kande yu ben poti wan sani na fesi a trapu so taki a pikin no go kren na a trapu. Yu du ala den sani disi fu kibri yu pikin so taki a no kisi mankeri.

Ma a no makriki fu kibri a tini fu yu! Now yu abi moro bigi broko-ede, soleki: ’Mi boi e luku porno?’ ’Mi meisje e meki fowtow fu ensrefi di no fiti srefisrefi, èn a e seni dati gi trawan tapu den cel?’ Èn a moro bigi broko-ede di yu abi kande na: ’A tini pikin fu mi abi seks?’

Son papa nanga mama e luku ala pikinpikin sani di den pikin e du. Bakaten, furu fu den e kon si taki te den e plèi skowtu gi den pikin, dan dati e meki taki den pikin go du sani kibrikibri. Iya, den sani di den papa nanga mama no ben wani den pikin du, na dati den pikin go du.

A de krin fu si taki a sani disi no e yepi. Yehovah Gado srefi no e handri so fu meki taki sma gi yesi na en, èn papa nanga mama no musu du dati tu (Deuteronomium 30:19). Sobun, fa yu kan yepi den tini fu yu fu teki koni bosroiti èn fu tyari densrefi na wan fasi di fiti?—Odo 27:11.

Wan prenspari sani di yu kan du na fu tan taki nanga yu pikin èn bigin du dati te den yongu ete (Odo 22:6). * Te den tron tini, dan tan taki nanga den. Yu leki papa noso mama musu de a moro prenspari sma pe yu pikin kan kisi bun rai. Alicia, wan meisje na ini Ingrisikondre, e taki: „Furu sma e denki taki wi feni en moro bun fu taki nanga wi mati fu seks, ma a sani disi no tru. Wi e warderi en te wi papa nanga mama e taki  nanga wi fu den tori disi. Wi e frutrow den sani di den e taki.”

Te den pikin e kon bigi, dan den musu sabi moro fu seks leki fu sabi nomo fa wan pikin e gebore. Boiti dati, den musu „leri fa fu gebroiki den frustan fu man si sani krin, so taki den kan sabi san bun èn san no bun” (Hebrewsma 5:14). Sobun, den musu abi wan tranga overtoigi fu sani di fiti te a abi fu du nanga seks, èn den musu hori densrefi na dati. Fa yu kan leri den tini pikin fu yu bun markitiki?

Bigin luku na sortu markitiki yu e hori yusrefi. Fu eksempre, kande yu abi a tranga overtoigi taki te sma e du hurudu, dati wani taki te sma di no trow abi seks nanga makandra, dan dati na wan fowtu sani (1 Tesalonikasma 4:3). A no de fu taki dati den pikin fu yu sabi fa yu e denki fu a tori. Kande den kan kari Bijbeltekst srefi di e kruderi nanga a fasi fa yu e denki fu a tori. Te yu ben o aksi den, dan kande den e piki wantewante taki a de wan fowtu sani te sma abi seks bifo den trow.

Ma moro leki dati de fanowdu. Wan buku e taki dati son yonguwan e taki nomo dati den e agri nanga a fasi fa den papa nanga mama e denki fu seks. A buku e taki: „Den pikin no de seiker fu densrefi, èn dati e meki taki den no sabi fa den musu denki fu a tori. Te den e kon de na ini wan situwâsi di den no ben fruwakti èn te den musu bosroiti wantewante san bun èn san no bun, dan den e bruya èn den e kon na ini bigi problema” (Sex Smart). Na fu a sani disi ede meki a de tumusi prenspari taki den pikin e leri bun markitiki. Fa yu kan yepi a tini fu yu fu hori ensrefi na bun markitiki?

Sori krin na sortu markitiki yu e hori yusrefi.

Yu feni taki seks na soso gi tu sma di trow nanga makandra? We, taigi a tini pikin fu yu dati krin èn du dati difrenti leisi. Wan buku e sori taki „na ini osofamiri pe papa nanga mama e sori den tini pikin fu den krin taki den no feni en bun taki den tini pikin abi seks, dan nofo tron den tini disi e wakti fosi den bigin nanga seks” (Beyond the Big Talk).

Soleki fa wi ben taki kaba, dan te yu e taki nomo na sortu markitiki yu e hori yusrefi, dan dati no wani taki dati yu manpikin noso yu umapikin o bosroiti fu du a srefi. Ma te yu e taki krin na sortu markitiki yu wani yu osofamiri hori densrefi, dan dati na wan prenspari sani di o yepi yu pikin fu hori densrefi na den srefi markitiki dati. Sma di ondrosuku sani, kon si taki te fu kaba furu yonguwan e teki den markitiki fu den papa nanga mama abra, aladi a ben gersi leki den no ben wani du dati di den ben de tini.

Leri yu pikin fu abi wan yoisti denki fu seks.

A de fanowdu fu warskow den pikin (1 Korentesma 6:18; Yakobus 1:14, 15). Ma te Bijbel e taki fu seks, dan moro furu a e sori taki dati na wan presenti fu Gado, na presi fu wan trapu fu Satan (Odo 5:18, 19; Singi fu Salomo 1:2). Te yu taigi den pikin fu yu nomo fu den ogri di kan miti den te a abi fu du nanga seks, dan a sani dati kan meki den kon abi wan fowtu denki fu seks di no e kruderi nanga Bijbel. Corrina, wan yongu uma fu Fransikondre, e taki: „Mi papa nanga mama ben taki moro furu fu hurudu èn a sani disi meki mi e si seks leki fowtu sani.”

Sorgu taki yu e fruteri den pikin fu yu san den musu sabi fu seks. Nadia, wan mama na ini Meksikow e taki: „A sani di mi ben e pruberi fu leri den pikin fu mi ala ten, na taki seks na wan moi sani di Yehovah Gado gi libisma fu abi prisiri. Ma seks na soso gi tu sma di trow nanga makandra. A fasi fa wi e handri te a abi fu du nanga seks kan meki taki wi de koloku, noso taki wi kisi problema.”

Yepi a tini fu yu fu denki fu den bakapisi.

Efu wan tini wani teki bun bosroiti na ini iniwan sani na ini en libi, dan a musu sabi san na den difrenti sani di a kan du. Baka dati, a musu go denki san na den bun bakapisi èn den takru bakapisi fu ibriwan fu den sani di a kan du. No denki taki a nofo te a sabi san bun èn san no bun. Wan Kresten uma na ini Australia di nen Emma e taki: „Te mi e prakseri den fowtu di mi meki di mi ben yongu, dan mi kan taki dati te yu sabi den markitiki fu Gado nomo, dan a no wani taki dati yu e agri nanga den. A de tumusi prenspari fu frustan san na den wini fu den markitiki dati, èn san na den bakapisi te yu no hori yusrefi na den.”

Bijbel kan de wan yepi fu di furu fu den komando na ini e sori san na den bakapisi te wan sma e du san no bun. Fu eksempre, Odo 5:8, 9 e gi yonkuman a rai fu wai pasi gi hurudu ’so taki trawan no kan meki den du sani di o meki den lasi lespeki gi densrefi’. Soleki fa den tekst disi e sori, dan te wan sma abi seks fosi a trow, dati o meki taki a no e hori ensrefi na bun markitiki moro, a e tapu en fu du ala san a man na ini a diniwroko fu Gado, èn a o lasi lespeki gi ensrefi. A sani dati kan meki taki wan sma di ben sa wani trow nanga en èn di hori ensrefi na den markitiki fu Gado, o tweifri fu du dati. Te a tini fu yu denki sortu problema kan miti en, sortu sari situwâsi a kan kon de na ini èn fa a kan pori a matifasi di a abi nanga Gado te a no e hori ensrefi na den wet fu En, dan dati kan gi en a deki-ati fu tan gi yesi na den wet fu Gado. *

Takao, wan yonkuman fu 18 yari di e libi na ini Yapan, e taki: „Mi sabi taki mi musu du san reti, ma doronomo mi e feti teige den lostu fu a skin.” Yonguwan di e firi a srefi fasi kan kisi trowstu te den sabi taki trawan e firi so tu. Srefi na apostel Paulus, wan Kresten di ben tai hori na Gado, ben taki: „Te mi wani du bun, dan ogri de na ini mi.”​—Romesma 7:21.

A ben o bun te tini ben o frustan taki a no de wan fowtu sani ala ten fu feti teige den firi dati. A kan meki taki den go denki sortu sma den wani de. A kan yepi den fu aksi densrefi den sani disi: ’Mi wani tyari frantwortu na ini mi libi èn mi wani taki trawan sabi mi leki wan sma di e hori ensrefi na bun markitiki èn di e gi yesi na Gado? Noso mi wani de wan sma di e du nomo san trawan e du?’ Te a tini fu yu e hori ensrefi na bun markitiki, dan dati o yepi en fu piki den aksi dati na wan koni fasi.