Teki leri fu Gado Wortu

Fa wi e kisi wini fu den wèt fu Gado?

Na artikel disi e poti prakseri na sani di yu ben kan aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Fu san ede wi musu gi yesi na Gado?

A fiti taki wi e gi yesi na Gado fu di na en meki wi. Srefi Yesus ben e gi yesi na Gado ala ten (Yohanes 6:38; Openbaring 4:11). Den wèt fu Gado e yepi wi fu sori taki wi lobi en.​—Leisi 1 Yohanes 5:3.

Ala den wèt fu Yehovah Gado bun gi wi. Den e leri wi san na a moro bun fasi fu libi now èn fa wi kan kisi têgo blesi na ini a ten di e kon.​—Leisi Psalm 19:7, 11; Yesaya 48:17, 18.

2. Fa den wèt fu Gado e yepi wi fu abi wan bun gosontu?

A wèt fu Gado di e taki dati wi no musu kon drungu, e kibri wi gi takru siki èn a e yepi wi fu no kisi mankeri makriki. Te wan sma e dringi sopi pasa marki, dan a no o man tapu nanga a takru gwenti dati, èn dati kan meki taki a e du don sani (Odo 23:20, 29, 30). Yehovah feni en bun taki wi e dringi sopi, ma wi no musu dringi pasa marki.​—Leisi Psalm 104:15; 1 Korentesma 6:10.

Yehovah e warskow wi tu fu no dyarusu, fu no kisi bigi atibron, èn fu no abi tra fasi di kan tyari takru bakapisi kon gi wi. O moro wi e fiti a rai fu en, o moro wi sa abi wan bun gosontu.​—Leisi Odo 14:30; 22:24, 25.

3. Fa a wèt fu Gado kan kibri wi?

A wèt fu Gado e sori taki wi no mag abi seks nanga wan sma di no de wi trowpatna (Hebrewsma 13:4). Trowpaar di e gi yesi na a wèt disi feni en moro makriki fu frutrow makandra èn den o man kweki den pikin fu den moro bun. Ma te sma abi seks nanga trawan di no de a trowpatna fu den, dan nofo tron den e kisi siki, den e broko trow, den e du ogri nanga trawan, den e kisi bigi broko-ede, èn den o abi fu kweki den pikin sondro wan trowpatna.​—Leisi Odo 5:1-9.

Te wi e wai pasi gi situwâsi di kan tesi wi fu abi seks nanga wan sma di no de wi trowpatna, dan wi o tan de bun mati fu Gado. Wi no sa hati den firi fu trawan tu.​—Leisi 1 Tesalonikasma 4:3-6.

  4. Sortu wini wi e kisi te wi abi lespeki gi a libi?

Sma di e lespeki a libi di Gado gi wi, abi wan bun gosontu te den e tapu nanga a gwenti di den ben abi fu smoko èn nanga tra takru gwenti di kan meki den lasi den libi (2 Korentesma 7:1). Srefi a libi fu wan beibi di e gro na ini en mama bere prenspari gi Gado (Eksodes 21:22, 23). Sobun, wi no musu kiri wan beibi di de na ini en mama bere. Boiti dati, den sma di e frustan fa Gado e si a libi, e du san de fanowdu fu sorgu taki den, noso trawan no e kisi mankeri na wroko, na oso, noso te den e rèi a wagi fu den (Deuteronomium 22:8). Den sma disi no e du sport tu di kan meki den kisi mankeri noso lasi den libi, fu di na Gado gi wi libi.​—Leisi Psalm 36:9.

5. Sortu wini wi e kisi te wi e si brudu leki wan santa sani?

Brudu santa fu di Gado e taki dati a e prenki a libi fu wan libisma, noso fu wan meti (Genesis 9:3, 4). A wèt fu Gado di e taki dati a brudu e prenki a libi, e tyari wini kon gi wi. Fa so? A e meki taki wi kan kisi pardon fu sondu.​—Leisi Lefitikus 17:11-13; Hebrewsma 9:22.

A brudu fu Yesus ben prenspari srefisrefi fu di a no ben abi sondu. Yesus ben gi Gado wan sani di ben e prenki en libi, èn dati na a brudu fu en (Hebrewsma 9:12). A brudu fu en e meki taki wi kan kisi têgo libi.​—Leisi Mateyus 26:28; Yohanes 3:16.

Efu yu wan sabi moro, dan luku kapitel 12 nanga 13 fu a buku disi, San Bijbel e leri wi trutru?, di Yehovah Kotoigi tyari kon na doro.