SUMA no lobi te trawan e taigi en grantangi fu di den breiti nanga wan wroko di a du? Noso, suma no breiti te a e kisi wan kado fu wan sma di lobi en? Wi alamala wani abi a firi taki sma, spesrutu den wan di wi lobi, e warderi a muiti di wi e du. A no de fu taki dati wi lobi wi Gado, Yehovah, moro leki ala tra sma. A e warderi a muiti di wi e du fu dini en? Meki wi go luku san a ben du gi Ebed-meilèk, wan man di ben kibri a libi fu wan profeiti fu Gado, aladi sma ben kan kiri en fu a san dati.​—Leisi Yeremia 38:7-13 nanga 39:16-18.

Suma ben de Ebed-meilèk? Soleki fa a sori, dan a man disi ben de wan ofsiri na ini na oso fu Kownu Sedekia fu Yuda. Ebed-meilèk ben libi na a ten fu Yeremia, a man di Gado ben seni fu warskow Yuda taki den ben o kisi pori fu di den ben drai baka gi en. Ebed-meilèk ben de na mindri wan lo granman di no ben e anbegi Gado, toku a ben e frede Gado èn a ben abi bigi lespeki gi Yeremia. Ma ogri-ati granman lei gi Yeremia taki a ben opo ensrefi teige Kownu. Den trowe Yeremia go na ini wan tokotoko peti èn den libi en meki a dede (Yeremia 38:4-6). San Ebed-meilèk ben o du now? A ben o tan sori den moi fasi fu en?

Ebed-meilèk sori deki-ati èn a opo du wan sani wantewante. A no ben frede taki den granman ben o du en ogri. A waka go miti Sedekia èn leti na fesi tra sma a taigi en taki a sani di sma ben du nanga Yeremia no ben bun. Kande a ben sori go na den man disi di a taki: ’Den man disi du wan bigi ogri nanga Yeremia’ (Yeremia 38:9). Sedekia arki Ebed-meilèk èn a taigi en fu teki 30 man fu go frulusu Yeremia.

Now Ebed-meilèk e sori ete wan moi fasi. Dati na switifasi. A teki „pisipisi krosi nanga brokokrosi, a tai den na wan titei, dan a saka den go gi Yeremia”. Fu san ede a du dati? A ben wani taki Yeremia poti den krosi disi na en ondro-anu, so taki en ondro-anu no ben o piri te den ben o hari en komoto na ini a tokotoko peti.​—Yeremia 38:11-13.

Yehovah ben si san Ebed-meilèk du. Fa a ben feni a sani dati? Gado meki Yeremia taigi Ebed-meilèk taki heri esi Yuda ben o kisi pori. Ne Gado pramisi Ebed-meilèk feifi leisi taki a ben o frulusu en. Yehovah ben taki: „Mi o frulusu yu . . . Den man di yu e frede no o kisi yu. Fu tru, mi o frulusu yu . . . Nowan sma o kiri yu nanga feti-owru. Yu o tan na libi.” Fu san ede Yehovah pramisi fu kibri a libi fu Ebed-meilèk? Yehovah ben taigi en: „Fu di yu e frutrow na mi tapu” (Yeremia 39:16-18). Yehovah ben sabi taki Ebed-meilèk no ben du a sani dati nomo fu di a ben e broko en ede nanga Yeremia, ma a ben du en tu fu di a ben abi frutrow nanga bribi na ini Gado.

Wi e leri wan moi sani fu a tori disi: Yehovah e warderi a muiti di wi e du fu dini en. Bijbel e gi wi a dyaranti taki a e memre srefi a moro pikin sani di wi e du fu plisi en, fu di wi e bribi na ini en nanga wi heri ati (Markus 12:41-44). Yu no ben o wani kon moro krosibei na a Gado disi di e warderi ala san yu e du gi en? Efu dati de so, dan yu kan de seiker taki a o du san en eigi Wortu, Bijbel e taki: „A e pai den wan di e suku en fayafaya.”​—Hebrewsma 11:6.

A bun fu leisi a pisi disi fu Bijbel na ini mei:

▪ Yeremia 32-50