Fa den leri fu Krestes abi krakti na tapu a libimakandra?

DEN artikel na fesi ben tyari kon na krin fu san ede tru Kresten no e teki prati na politiek. Ma fa Kresten kan sori taki den wani yepi fu meki sani waka moro bun na ini a libimakandra fu den? Wán fasi, na taki den e du a sani disi di Yesus ben taigi den fu du: „Fu dati ede, go na sma fu ala kondre èn meki den tron disipel. Dopu den na ini a nen fu a Tata, fu a Manpikin, èn fu a santa yeye. Leri den fu du ala san mi taigi unu fu du.”​—Mateyus 28:19, 20.

Soleki fa wi si, dan Yesus taigi wi fu go na sma èn fu „meki den tron disipel”. Ma a taki tu dati wi musu de leki sowtu nanga leti gi a grontapu disi (Mateyus 5:13, 14). San den tu sani disi abi fu du nanga makandra? Sortu krakti a wroko dati kan abi na tapu sma?

A boskopu fu Krestes e kibri sma gi sani èn a e opo den ai

Sma kan gebroiki sowtu fu kibri sani moro langa, fu di sowtu e sorgu taki sani no pori. Na so a boskopu di Yesus ben taigi den bakaman fu en fu fruteri sma fu ala kondre, e kibri sma gi sani di kan pori a frustan fu den. Te sma e poti bribi na ini den leri fu Yesus èn e du san den leri, dan dati e kibri den gi den takru fasi nanga gwenti di furu sma abi na ini a ten disi. Fa so? Den sma disi e leri fa fu wai pasi gi gwenti di kan pori a gosontu fu den, gwenti soleki a smoko di sma e smoko. Den e kon abi fasi soleki lobi, freide, langa pasensi, switifasi, nanga bun-ati (Galasiasma 5:22, 23). Fu di den abi den fasi dati, meki den e du bun gi a libimakandra. Kresten di e prati a moi boskopu disi nanga den birtisma fu den de wan bigi yepi gi a kontren pe den e tan.

 Fu san ede Yesus e taki dati den bakaman fu en de leki leti? Neleki fa a munkenki e skèin a leti di e komoto fu a son, na so den bakaman fu Krestes e skèin a „leti” di e komoto fu Yehovah Gado. Den e skèin a leti di e komoto fu Yehovah, fu di den e teki prati na a preikiwroko èn fu di den e du bun sani.​—1 Petrus 2:12.

Yesus ben sori moro fara na sortu fasi wan disipel de leki leti. A ben taki: „Te sma leti wan lampu, den no e poti en na ondro wan baskita, ma den e poti en na wan hei presi, so taki a e skèin na tapu ala sma na ini na oso. Na so un musu meki un leti skèin gi sma tu.” Te sma poti wan lampu na tapu wan hei sani fu skèin leti, dan ala sma na en lontu man si a leti. Na so a de tu taki den sma di e libi na ini a birti fu tru Kresten, musu man si krin taki den e teki prati na a preikiwroko èn taki den e du bun sani. Fu san ede dati de so? Yesus ben taki dati den sma di e si den bun sani di wi e du o gi glori na Gado, den no o gi glori na wi leki Kresten.​—Mateyus 5:14-16.

Wan frantwortu di ala Kresten abi

Di Yesus taki „Yu na a leti fu grontapu” èn sosrefi „un musu meki un leti skèin”, dan a ben e taki nanga ala den disipel fu en. Sobun, wan tu sma nomo di panya na ini difrenti kerki, no ben o man du a wroko disi di Yesus gi Kresten fu du. Na presi fu dati, ala bribiman musu de „a leti”. Seibi milyun Yehovah Kotoigi di e libi na ini moro leki 235 kondre, e bribi taki den alamala abi a frantwortu fu go fruteri den birtisma fu den a boskopu di Krestes wani taki den bakaman fu en meki bekènti.

San na a boskopu di Yehovah Kotoigi e tyari? Di Yesus ben taigi den bakaman fu en fu du a preikiwroko, dan a no ben taigi den fu preiki taki kenki ben o kon na ini a libimakandra èn na ini a politiek. A no ben taigi den tu fu preiki taki kerki nanga tirimakti ben o wroko makandra, noso fu preiki iniwan tra sani di e komoto fu libisma. Na presi fu dati a ben taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati” (Mateyus 24:14). Sobun, tru Kresten na ini a ten disi e tan taki fu Gado Kownukondre, soleki fa Yesus ben taigi den bakaman fu en fu du. Den e du dati, fu di a Kownukondre na a wan-enkri tirimakti di o man tyari wan kaba kon na a takru sistema fu Satan èn tyari wan nyun grontapu kon pe retidu o de.

Fu taki en leti, te wi e leisi den Evangelietori, dan wi e si tu prenspari sani fu a diniwroko fu Yesus di abi krakti na tapu a wroko di tru Kresten e du na ini a ten disi. Wi o luku den tu sani disi na ini a tra artikel.

[Prenspari pisi na tapu bladzijde 8]

Fa a boskopu fu Krestes de leki sowtu?

[Prenspari pisi na tapu bladzijde 9]

Fa a boskopu fu Krestes de leki wan lampu na ini wan dungru presi?