Teki leri fu Gado Wortu

San o pasa nanga den kerki?

Na artikel disi e poti prakseri na sani di yu ben wani kon sabi kande èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Ala kerki bun?

Furu kerki abi reti-ati sma di wani plisi Gado. Gado e si den sma dati èn a e broko en ede nanga den. Ma a de wan sari sani taki son sma gebroiki kerki fu du ogri-ati sani. Na ini a ten di pasa, kerki fesiman pina den gensman fu den srefisrefi (2 Korentesma 4:3, 4; 11:13-15). Na ini a ten disi, nyunsu e taki dati son kerki fesiman gi sma deki-ati fu gens tirimakti na wan ogri-ati fasi, noso taki den horibaka gi orloku, noso taki den du ogri nanga pikin-nengre.​—Leisi Mateyus 24:3-5, 11, 12.

Bijbel e leri taki tu sortu bribi de, èn dati na tru bribi nanga falsi bribi. Falsi bribi no e leri sma tru tori fu Gado. Ma Yehovah Gado wani taki sma musu sabi den tru tori fu en.​—Leisi 1 Timoteyus 2:3-5.

2. San o pasa nanga den kerki?

Gado no wani taki kerki e kori sma fu di den e taki dati den lobi En, aladi den e no e leri sma tru tori fu en. Fu taki en leti, den sma fu den kerki dati lobi fu de mati nanga a grontapu di Satan Didibri, e tiri (Yakobus 4:4; 1 Yohanes 5:19). Gado Wortu e taki dati den kerki di e horibaka gi libisma tirimakti na presi fu horibaka gi Gado, de neleki wan huru-uma. Bijbel e kari a huru-uma disi „Babilon a Bigiwan”. A nen disi komoto fu na owruten foto pe falsi bribi bigin, baka a Frudu fu a ten fu Noa. Heri esi, Gado o tyari wan kaba kon wantronso na kerki di e kori èn e kwinsi libisma.​—Leisi Openbaring 17:1, 2, 5, 17; 18:8, 23, 24.

  3. Fa Gado o meki prisiri de na ala sei fu grontapu?

A moi srefisrefi fu sabi taki Gado o krutu falsi kerki. Disi o meki sma na heri grontapu kon fri fu a kwinsi di trawan e kwinsi den. Noiti moro falsi kerki o kori sma noso tyari prati kon na den mindri. Ala sma di o libi na a ten dati o anbegi a wan-enkri tru Gado na ini wánfasi.​—Leisi Yesaya 11:9; Openbaring 18:20, 21; 21:3, 4.

4. San reti-ati sma musu du?

Yehovah no frigiti den reti-ati sma di panya na ini den falsi kerki na heri grontapu. Nownowde a e leri den sma dati den tru tori fu Bijbel, so taki den kan anbegi en na ini wánfasi.​—Leisi Mika 4:2, 5.

Yehovah e gi den sma di wani dini en wan switikon na ini a famiri fu en. Awansi mati nanga famiriman fu wi e mandi te wi e bigin dini Yehovah, toku wi e kisi furu wini. Wi e tron mati fu Gado, wi e kisi wan nyun „famiri” di lobi wi, èn wi e kisi a howpu fu libi fu têgo.​—Leisi Markus 10:29, 30; 2 Korentesma 6:17, 18.

Efu yu wani sabi moro, dan luku kapitel 15 nanga 16 fu a buku disi, San Bijbel e leri wi trutru?, di Yehovah Kotoigi tyari kon na doro.

[Sma di abi a reti fu a prenki na tapu bladzijde 16]

The Complete Encyclopedia of Illustration/J. G. Heck