Trutru bribiman nanga borgu di sabi den frantwortu

SAN na tu prenspari sani di kon na krin na ini a diniwroko fu Yesus? A fosi sani, na taki Yesus no suku fu kenki politiek sistema, ma a suku fu kenki na ati fu sma. Fu eksempre, luku sortu prenspari sani Yesus ben tyari kon na fesi na ini a takimakandra di a ben hori na tapu na Olèifbergi. Fosi a taigi den arkiman fu en taki den musu de leki sowtu èn leki leti, a ben taigi den taki sma kan de koloku trutru te den „sabi taki den abi Gado fanowdu”. A taki tu: „Koloku fu den safri-ati sma, . . . den sma di abi wan krin ati, . . . den sma di e suku fu libi bun nanga trawan” (Mateyus 5:1-11). Yesus ben yepi den bakaman fu en fu si taki a de prenspari fu kenki a fasi fa den e denki èn e firi so taki a kan kruderi nanga den wèt fu Gado di e sori san bun èn san no bun. A ben sori den tu o prenspari a de fu dini Gado nanga den heri ati.

A di fu tu sani na taki Yesus ben abi sari-ati nanga sma di ben e pina èn dati meki a ben e suku fu lekti a nowtu fu den. Ma Yesus no ben pruberi fu puru ala pina na grontapu (Mateyus 20:30-34). A ben e dresi siki sma, ma toku siki ben de ete (Lukas 6:17-19). A ben e lekti a nowtu fu den wan di sma ben e pina, ma toku sma ben e du sani ete fu pina trawan. A ben e gi nyanyan na den wan di ben de nanga angri, ma toku angriten ben de ete na grontapu.​—Markus 6:41-44.

Den e yepi fu kenki sma ati èn fu lekti a nowtu fu den

Fu san ede Yesus du muiti fu kenki sma ati èn fu lekti a nowtu fu den, na presi fu a kenki den grontapu sistema noso fu puru ala broko-ede? Yesus ben sabi taki Gado ben seti sani fu meki a Kownukondre fu En tyari wan kaba kon na ala libisma tirimakti èn fu puru ala sani di e meki taki sma e pina (Lukas 4:43; 8:1). Dati meki di den disipel ben aksi Yesus fu gebroiki moro fu en ten fu dresi siki sma, dan a taigi den: „Kon meki wi go na wan tra presi na den pikin foto di de na ini a birti, so taki mi kan preiki drape tu, bika na fu dati ede mi kon” (Markus 1:32-38). Yesus ben e tyari pikinso frulekti kon gi furu sma di ben e pina, ma a moro prenspari sani gi en ben de fu preiki èn fu gi sma leri fu Gado wortu.

Yehovah Kotoigi e pruberi fu teki na eksempre fu Yesus te den e du a preikiwroko fu den na ini a ten disi. Te sma e pina, dan den e du sani fu lekti a nowtu fu den sma dati. Ma den Kotoigi no e pruberi fu puru kruktudu na grontapu. Den e bribi taki Gado Kownukondre o tyari wan kaba kon na iniwan sani di e meki sma pina (Mateyus 6:10). Neleki Yesus den no e pruberi fu kenki den politiek sistema, ma den e pruberi fu kenki sma ati. A bun taki den e du dati, fu di den problema fu libisma no abi fu du nanga politiek, ma nanga a fasi fa sma e tyari densrefi.

Borgu di sabi den frantwortu

Yehovah Kotoigi sabi tu taki leki Kresten, den musu de bun borgu. Dati meki den e gi grani na den tiriman fu a kondre èn den e lespeki den tu. Nanga den buku di den e prati èn nanga a preikiwroko di den e du, den e gi sma deki-ati fu hori densrefi na den wèt fu a kondre. Ma te lanti e aksi den Kotoigi fu du sani di no e kruderi nanga den komando fu Gado, dan den e ’gi yesi na Gado moro leki na libisma’.​—Tori fu den apostel 5:29; Romesma 13:1-7.

 Yehovah Kotoigi e go na ala sma na ini a birti fu aksi den efu den wani studeri Bijbel, sondro taki den abi fu pai. A leri di den e gi trawan, kenki na ati fu milyunmilyun sma. Ibri yari den e yepi dusundusun sma fu tapu nanga takru gwenti. Na so sma tapu nanga smoko, den tapu fu dringi sopi te fu drungu, den tapu nanga dòbel, èn nanga a yayolibi fu den. Fu di den sma disi e du san Bijbel e leri den, meki den tron borgu di sabi den frantwortu èn di e tyari densrefi na wan fasi di fiti.​—Luku na artikel „Bijbel e kenki sma libi”, na tapu bladzijde 18 fu a tijdschrift disi.

Den leri fu Bijbel e yepi osofamiri tu fu kon abi moro lespeki gi makandra. A e yepi masra nanga wefi fu taki moro bun nanga makandra, èn a e yepi papa, mama, nanga pikin fu du dati tu. Den sani disi e meki a lobi na ini na osofamiri kon moro tranga. O moro den sma na ini osofamiri lobi makandra, o moro sani sa waka bun na ini a libimakandra.

Now di wi luku ala den tori na ini den artikel disi, dan san yu kon si? Yu feni taki Bijbel e sori taki sma kan moksi kerki nanga politiek? We, a de krin taki a sani dati no kan. Ma a de so taki tru Kresten no abi nowan frantwortu na ini a libimakandra? Nôno, dati no de so. Dan fa den kan sori taki den sabi den frantwortu? Na te den de leki sowtu èn leki leti na ini grontapu, soleki fa Yesus ben taigi den.

Te sma e du muiti fu fiti den bun rai disi fu Krestes, dan den nanga den osofamiri o kisi wini fu dati. Srefi a birti pe den e tan o kisi wini. Yehovah Kotoigi na ini a birti fu yu, o breiti fu fruteri yu moro fu a wroko di den e du na ini a libimakandra fu gi sma leri fu Bijbel. *

[Futuwortu]

[Prenspari pisi na tapu bladzijde 10]

Yesus no suku fu kenki politiek sistema, ma a suku fu kenki na ati fu sma

[Prenspari pisi na tapu bladzijde 11]

Yehovah Kotoigi sabi taki den musu de bun borgu