Wondru e pasa trutru?​—Dri sani di sma gwenti taki

A FOSI SANI: Wondru no man, fu di den no e kruderi nanga den wèt di Gado meki gi grontapu èn gi den tra planeiti. Ala san wi sabi fu den wèt di meki gi grontapu èn gi den tra planeiti, abi fu du nanga san sabiman leri wi. Ma den wèt disi de leki a sistema di sma e gebroiki fu skrifi noso taki wan tongo. Son leisi yu musu skrifi noso taki wan sani tra fasi leki san a sistema disi e sori. Kande wi no sabi ala sani fu den wèt di meki gi grontapu èn gi den tra planeiti (Yob 38:4). Wan sabiman di e meki furu muiti fu ondrosuku sani kan gebroiki en heri libi fu studeri wan fu den wèt disi. Ma te a e kon si wán sani nomo di de tra fasi leki san a ben sabi kaba, dan a musu go ondrosuku a wèt dati baka. Fu eksempre, a kan taki sma ben denki fosi taki ala tigri penipeni. Ma di den si wán blaka tigri nomo, dan dati ben nofo fu meki den kon frustan taki a no ala tigri penipeni.

Sma kan feni taki wan sani no man, aladi den no abi ala buweisi. Kon meki wi go luku wan tori di e gi fu lafu. John Locke, di ben libi fu 1632 te go miti 1704, ben fruteri wan tori fu wan ambasadoro fu Bakrakondre nanga a kownu fu Siam. Di na ambasadoro taigi a kownu taki na ini en kondre wan asaw man waka na tapu watra son leisi, dan a kownu no ben bribi a tori èn a ben denki taki na ambasadoro ben lei. Ma na ambasadoro ben taki fu wan sani di a kownu no ben si noiti ete. A kownu no ben sabi taki te watra e tron ijs, wan asaw man waka na en tapu sondro taki na ijs broko. Iya, fu di a kownu no ben sabi ala sani finifini, meki a ben denki taki a sani disi no kan.

Luku wan tu sani di sma man du now èn di sma fu wan tu tenti yari pasa no ben prakseri taki a ben o man:

● Wan opolani man frei langalanga fu New York go te na Singapore, aladi a e tyari moro  leki 800 sma èn a e frei moro leki 900 kilometer wan yuru.

● Sma di de na difrenti kondre man taki nanga makandra èn si makandra nanga yepi fu wan computer di abi wan kamera.

● Dusundusun poku kan poti na tapu wan sani di pikin moro wan swarfudosu.

● Datra kan du oparâsi fu gi sma wan tra ati noso wan tra pisi fu a skin.

San wi kan taki fu den sani disi? We, efu libisma man du sani di wan tu yari pasa no ben man, dan a no de fu taki dati Gado di meki hemel nanga grontapu man du wondru di wi no e frustan krinkrin ete noso di wi no man du nownowde. *​—Genesis 18:14; Mateyus 19:26.

A DI FU TU SANI: Wondru skrifi na ini Bijbel soso fu meki sma bribi na ini Gado. Bijbel no e taigi wi taki wi musu bribi ala wondru. Ma a e warskow wi fu no de gaw fu bribi ala wondru noso kefalek sani di sma e du. Luku a seryusu warskow disi: „Hem disi sa kom nanga da wroko fu Satan nanga ala krakti [noso wondroe] nanga marki nanga bedriegi wondroewroko, en nanga ala kori-fasi sondro gerechtigheid.”​—2 Tesalonikasma 2:9, 10, Da Bijbel na ini Sranantongo.

Yesus Krestes ben warskow tu taki furu sma di ben o taki dati den na bakaman fu en, no ben o de bakaman fu en trutru. Sonwan fu den ben o taigi en srefi: „Masra, Masra, a no na ini yu nen wi ben taki profeititori? A no na ini yu nen wi ben puru ogri yeye na sma tapu? A no na ini yu nen wi ben du furu bigi wondru?” (Mateyus 7:22) Ma Yesus ben taki  dati a no ben o teki den sma disi leki en bakaman (Mateyus 7:23). A de krin taki Yesus no ben leri taki ala wondru e kon fu Gado.

Gado no e taigi den anbegiman fu en fu bribi soso fu di den si wondru, ma den musu luku tra buweisi tu. Iya, a bribi fu den musu kruderi nanga sani di de tru.​—Hebrewsma 11:1.

Fu eksempre, wan fu den wondru di skrifi na ini Bijbel èn di furu sma sabi, na a opobaka fu Yesus Krestes. Wan tu yari baka di a sani disi pasa, son Kresten na ini Korente bigin tweifri efu Yesus kisi wan opobaka trutru. Fa na apostel Paulus yepi den Kresten dati? Na taki a ben taki nomo: „Yu musu bribi”? Nôno. Luku fa a memre den na sani di ben pasa trutru. A taki dati sma ’beri Yesus èn taki a kisi wan opobaka na a di fu dri dei soleki fa Gado Buku taki. A sori ensrefi na Seifas èn na den twarfu apostel. Baka dati a sori ensrefi na moro leki feifi hondro brada na a srefi ten. Furu fu den brada disi ben e libi ete.’​—1 Korentesma 15:4-8.

A ben de prenspari taki den Kresten bribi na ini a wondru dati? Paulus e taki moro fara: „Efu Krestes no opo baka, dan a no de fu taki dati na fu soso wi e preiki èn na fu soso wi e bribi” (1 Korentesma 15:14). Iya, a ben de prenspari gi Paulus fu bribi wan wondru di pasa trutru. Paulus ben sabi taki Yesus ben kisi wan opobaka trutru, fu di hondrohondro sma, di ben si a wondru dati nanga den eigi ai, ben de na libi ete. Fu taki en leti, den sma disi ben de klariklari fu dede, na presi fu taki dati a wondru dati no tru.​—1 Korentesma 15:17-19.

A DI FU DRI SANI: Gi sma di no kisi skoroleri, sani leki bigi winti noso wan gronseki na wondru. Son sabiman e taki dati den wondru na ini Bijbel na wan srefi sani leki bigi winti noso gronseki èn taki Gado no ben abi noti fu du nanga dati. Sabiman feni taki efu sma taki disi, dan den o bribi den tori na ini Bijbel moro makriki. A tru taki te bigi rampu pasa, soleki gronseki, takru siki di e kiri ipi-ipi sma, noso bigi pisi doti nanga ston di wasi kon fu den bergi, dan sma prakseri son leisi taki a ben de wan wondru. Ma wán sani e misi: Den no e poti prakseri na san Bijbel e taki fu a ten di a wondru pasa.

Fu eksempre, a fosi rampu di miti den Egeptesma na taki a Nijl-liba tron brudu. Son sma feni taki a liba ben kon redi fu di redi doti ben wasi kon na ini a liba, makandra nanga pikinpikin redi libisani di sma e kari flagelaat. Ma a Bijbel tori no e taki dati a liba tron redi tokotoko, ma taki a tron brudu. Te yu e leisi Eksodes 7:14-21 finifini, dan yu o si taki a wondru disi pasa na a momenti di Aron naki a watra fu Nijl-liba nanga en tiki, soleki fa Moses taigi en. Srefi efu wan tra sani ben meki a watra fu Nijl-liba kon kenki, dan toku dati na wan wondru, fu di a pasa soifri na a momenti di Aron naki a watra.

Wan tra eksempre di e sori taki a momenti di wan wondru e pasa de prenspari, na san pasa di den Israelsma ben de fu go na ini a Pramisi Kondre. Den no ben man abra Yordan-liba fu di a watra ben hei. Bijbel e fruteri wi san pasa: „Te fu kaba den priester di ben e tyari a santa kisi, doro na Yordan-liba. . . . Fa den futu fu den priester kisi a watra fu a liba, a watra di ben e komoto na oposei fu a liba tapu fu lon. A watra tan tanapu leki wan bigi dan na a foto Adam” (Yosua 3:15, 16). Na santi nanga ston di wasi kon na ini a liba, meki a watra tapu fu lon? A tori no e taki dati. Ma yu kan taki dati a ben de wan wondru, fu di a pasa na a yoisti momenti. A pasa soifri na a ten di Yehovah ben taki dati a ben o pasa.​—Yosua 3:7, 8, 13.

We dan, wondru e pasa trutru? Iya, a skrifi na ini Bijbel. Soleki fa Bijbel e sori wi, dan wondru a no sani nomo di de fu si na hemel nanga grontapu. Sobun, wi kan taki dati wondru no man pasa noiti, soso fu di den no e pasa ala dei?

[Futuwortu]

[Prenki na tapu bladzijde 5]

Soso wan tu tenti yari pasa, furu sma ben o taki dati opolani no man frei hondrohondro kilometer na ini wán yuru