• A GEBORE NA INI 1974

• KONDRE: CHILI

• FOSI: A BEN DE WAN SOPIMAN

A LIBI FU MI FOSI:

Mi gebore na ini a foto Angol na ini a moi kontren, zuidsei fu Chili. Noiti mi si mi papa. Di mi ben abi dri yari, mi mama teki mi nanga mi pikin brada, dan wi froisi go na a foto Santiago. Drape wi go libi na ini wan pikin kamra na wan sortu kampu gi sma di no abi oso. Wi ben gebroiki wan weisei pe ala sma fu a kampu ben e go tu èn wi ben kisi watra na wan brandweer peti.

Baka wan tu yari lanti gi wi wan pikin oso. Ma na ini a nyun birti pe wi go tan sma ben gebroiki drugs, den ben e dringi furu sopi, den ben du wan lo ogri èn den ben abi seks fu kisi moni.

Wan dei mi mama miti wan man èn baka wan pisi ten den trow. Mi kwekipapa ben de wan sopiman. A ben abi a gwenti fu fon mi nanga mi mama. Te mi ben de mi wawan, dan mi ben krei furu èn mi ben winsi taki mi ben abi wan papa fu yepi mi.

Aladi mi mama ben wroko tranga fu sorgu wi, toku wi ben pôti srefisrefi. Son leisi te angri ben e kiri wi, wi ben abi soso puirimerki nanga sukru fu nyan. Te mi nanga mi brada ben wani pikinso prisiri, dan kibrikibri wi ben go tanapu na a fensre fu mi birfrow fu luku telefisi. Ma wan dei a kisi wi èn sensi a ten dati wi no ben man luku moro.

Son leisi te mi kwekipapa no ben drungu, dan a ben bai wan sani gi mi nanga mi brada fu nyan. Wan dei a bai wan pikin telefisi gi wi. Mi e memre taki a leisi dati mi ben e firi koloku èn dati no ben e pasa furu.

Di mi ben abi 12 yari, dan mi leri leisi. Wan yari baka dati, mi gowe libi skoro èn mi bigin wroko heri dei. Baka wrokoyuru mi ben gwenti go na fesa, makandra nanga wan tu man fu mi wrokope. Na den fesa disi wi ben kon drungu èn wi ben gebroiki drugs. Fosi yu denki, mi no ben man moro sondro drugs.

Di mi ben abi 20 yari, mi miti Cati èn te fu kaba wi trow. Na a bigin, ala sani go bun. Ma baka wan pisi ten mi go du den srefi ogri sani di mi ben gwenti du fosi. Ma now mi ben tyari misrefi na wan moro ogri fasi. Te fu kaba, mi kon si taki efu mi no ben tapu nanga a libi disi, mi ben o go na strafu-oso noso mi ben o dede. Ma san ben moro ogri, na taki mi ben meki den srefi  sani di miti mi di mi ben pikin, pasa nanga Víctor, a boi fu mi. Mi ben firi sari, mi ati ben bron nanga misrefi èn mi ben firi leki mi no warti noti.

Na ini 2001, tu Kotoigi fu Yehovah kon na mi oso èn den bigin studeri Bijbel nanga Cati. A fruteri mi den sani di a ben leri. Fu di mi ben wani sabi moro, meki mi srefi bigin studeri Bijbel. Na ini 2003, Cati teki dopu leki wan fu den Kotoigi fu Yehovah.

A FASI FA BIJBEL KENKI MI LIBI:

Wan dei mi leisi Rut 2:12 di e taki dati te yu e sori bribi èn yu e si Yehovah leki wan sma pe yu kan feni kibri, dan a e pai yu fu den sani di yu du. Mi kon frustan taki efu mi ben o kenki a fasi fa mi ben libi, dan mi ben kan plisi Gado èn a ben o blesi mi. Mi si taki furu leisi Bijbel e krutu drungufasi. Den wortu fu 2 Korentesma 7:1 naki mi ati. A tekst dati e gi wi deki-ati fu „krin wisrefi fu ibri sani di kan doti wi”. Sobun, mi bigin tapu nanga den takru gwenti fu mi. Ma na a bigin mi ben kisi moro atibron srefi. Toku Cati tan horibaka gi mi.

Fu di den man na mi wrokope ben smoko èn ben dringi sopi, meki a ben moro muilek gi mi fu tapu nanga den takru gwenti disi. Sobun, te fu kaba mi gowe libi a wroko. Disi meki taki wi no ben abi furu moni fu wan pisi ten. Ma now mi ben abi moro ten fu studeri Bijbel èn na so mi bigin go na fesi. Noiti Cati ben aksi mi moro leki san mi ben man gi en èn aladi wi no ben abi furu sani, toku a no krutu mi. Mi de nanga tangi taki a horibaka gi mi nanga furu lobi.

Mi bigin moksi moro nanga den Kotoigi. Den yepi mi fu frustan taki awinsi mi no kisi furu skoroleri, toku Yehovah e warderi en taki mi wani dini en nanga wan krin ati. Wi ben si taki den sma na ini a Kresten gemeente ben lobi makandra èn taki den ben de wán. A sani disi ben abi furu krakti na tapu wi osofamiri. Na nowan tra presi wi ben si taki sma ben libi so bun nanga makandra. Na ini december 2004 mi teki dopu tu.

DEN WINI DI MI KISI:

Mi si taki den wortu fu Yehovah di skrifi na ini Yesaya 48:17, tru. Drape skrifi: „Mi, Yehovah, na yu Gado. Mi na a sma di e leri yu fu kisi wini.” Mi mama nanga mi brada ben breiti trutru taki mi drai mi libi. Dati meki den e studeri Bijbel now. Srefi den birtisma fu mi breiti fu si taki mi kenki èn taki wi abi wan koloku osofamiri.

Mi abi wan wefi di lobi Gado èn di e si mi leki wan patna nanga mati di a kan frutrow. Aladi mi no ben kisi na okasi fu sabi mi papa, toku Bijbel leri mi fa fu kweki den dri boi fu mi. Den e lespeki mi. Ma a moro prenspari sani na taki den e si Yehovah leki wan trutru sma èn den kon lobi en.

Mi de nanga tangi taki aladi mi no ben de koloku di mi ben pikin, toku Yehovah gi mi na okasi fu kon de wan koloku man.

• A GEBORE NA INI 1974

• KONDRE: BULGARIA

• FOSI: A BEN SERI DRUGS

A LIBI FU MI FOSI:

Mi gebore na ini Sofia na Bulgaria na ini wan osofamiri di no ben pôti. Mi papa gowe libi wi osofamiri di mi ben abi siksi yari. A sani dati seki mi èn mi ben sari srefisrefi. Mi ben abi a firi taki sma no wani mi èn taki mi no ben bun nofo fu sma lobi mi. Dati meki di mi kon moro bigi, mi no ben wani arki nowan sma. Mi kon de nanga atibron èn mi ben gaw fu feti.

Di mi ben abi 14 yari, dan mi lowe fu oso fu a fosi leisi. Mi ben abi a gwenti fu fufuru a moni fu mi mama, mi owpa nanga mi owma. Mi ben kisi furu problema na skoro fu di mi ben lobi feti. Dati meki den seni mi go na feifi difrenti skoro na ini wan tu yari nomo. Dri yari fosi mi kisi mi diploma, mi gowe libi skoro. Mi ben libi wan huru libi. Mi kon kisi a takru gwenti fu smoko sikaret nanga marwana. Mi ben dringi furu sopi, ala yuru mi ben go na fesa èn mi bigin seri drugs tu. Mi no ben man frustan fu san ede wi ben libi na ini wan grontapu pe sma no abi howpu, pe den e pina èn e dede. Dati meki ala dei mi ben prakseri soso prisiri.

Na ini 1998 di mi ben abi 24 yari, skowtu fu na opolani presi fu São Paulo, Brasyonkondre, kisi mi fu di mi ben abi drugs na ini mi kofru. Mi kisi fo yari strafu.

A FASI FA BIJBEL KENKI MI LIBI:

Na ini a yari 2000, Yehovah Kotoigi bigin kon wán leisi wan wiki na a strafu-oso pe mi ben de. Marines, wan fu den Kotoigi, ben sori switifasi gi mi. Na uma disi meki taki mi bigin angri fu kon sabi moro fu Bijbel. Noiti mi ben yere ete fu Yehovah Kotoigi èn dati meki mi aksi den tra strafuman san den ben sabi fu den. Mi ben fruwondru di furu fu den sma di mi aksi, ben taki takru sani fu den Kotoigi. Wan fu den strafuman taigi mi fu go na ala kerki, boiti Yehovah Kotoigi. Dati meki mi ben wani sabi moro fu den Kotoigi. Mi ben wani sabi fu san ede sma ben teige den. Mi kon si taki sma no lobi den fu di den abi a tru bribi. Fu taki en leti, Bijbel srefi e sori taki sma o frufolgu ala den wan di e meki muiti fu de wan bakaman fu Yesus.​—2 Timoteyus 3:12.

Na a ten dati, den taigi mi fu go wroko na a kantoro fu a strafu-oso. Wan dei mi feni wan tu dosu nanga owru Waktitoren nanga Ontwaakt! * na ini wan maksin. Mi tyari den tijdschrift go na a cel fu mi èn mi bigin leisi den. O moro mi ben leisi, o moro mi ben firi leki wan sma di de na ini wan drei sabana èn di feni wan peti nanga kowru watra. Mi ben abi furu ten èn dati meki mi ben studeri Bijbel ibri dei omeni yuru langa.

Wan dei den kari mi kon na kantoro. Mi ben fruwakti taki den ben o lusu mi. Dati meki mi teki den sani fu mi, mi taigi den tra strafuman adyosi èn mi lon go na kantoro. Ma di mi doro drape mi yere taki mi ben musu go na fesi krutu  baka, fu di mi ben abi falsi papira. Dati meki mi kisi ete tu yari strafu.

Di mi yere dati, mi ben firi brokosaka. Ma wan tu dei baka dati, mi kon si taki a ben bun taki sani waka so. Aladi mi ben leri furu sani fu Bijbel, toku dipi na ini mi ati mi ben sabi taki te mi ben o komoto na strafu-oso, mi o go doro nanga a fasi fa mi ben libi fosi den sroto mi. Mi ben abi moro ten fanowdu fu kenki.

Son leisi mi ben abi a firi taki noiti Gado ben o teki mi leki wan anbegiman fu en. Ma mi prakseri dipi fu den Bijbeltekst soleki 1 Korentesma 6:9-11. Den tekst disi e sori taki na ini a fosi yarihondro son Kresten ben de fufuruman, sopiman nanga bedrigiman fosi den ben dini Yehovah. Ma toku Yehovah yepi den fu kenki. Na eksempre fu den gi mi furu deki-ati.

A no ben makriki fu tapu nanga den takru gwenti fu mi. Fu eksempre, mi no ben feni en wan muilek sani fu tapu nanga drugs, ma a ben de wan problema fu tapu nanga smoko. Moro leki wan yari, mi du tranga muiti fu tapu nanga a gwenti disi. Wan sani di yepi mi na di mi leisi sortu takru bakapisi a abi gi wan sma en gosontu te a e smoko. Ma a moro bun sani di yepi mi, na taki mi begi Yehovah fayafaya.

Soleki fa mi ben taki kaba, dan di mi papa gowe libi wi, mi ben abi a firi taki nowan sma ben wani mi. Ma di mi tron wan moro bun mati fu Yehovah, a firi disi gowe safrisafri. Den wortu fu Psalm 27:10 naki mi ati srefisrefi. A tekst dati e taki: „Awinsi mi eigi papa, noso mi eigi mama ben o gowe libi mi, toku Yehovah srefi ben o sorgu gi mi.” Mi ben kon frustan taki mi ben feni a moro bun Papa, wan di noiti no ben o gowe libi mi! Now mi ben sabi san mi ben musu du nanga mi libi. Na ini april 2004, siksi mun baka di den lusu mi fu strafu-oso, mi teki dopu leki wan Kotoigi fu Yehovah.

DEN WINI DI MI KISI:

Mi e firi koloku. Fu di mi no abi takru gwenti moro, meki mi de moro gosontu èn mi man dwengi den firi fu mi moro bun leki di mi ben yongu. Mi abi wan koloku trowlibi èn mi abi wan bun matifasi nanga mi hemel Tata Yehovah. Na mindri den anbegiman fu en, mi feni furu papa, mama, brada, nanga sisa (Markus 10:29, 30). Mi breiti taki srefi fosi misrefi ben man si dati, den ben si mi leki wan sma di ben o man tron wan anbegiman fu Gado.

Son leisi mi e kisi konsensi fonfon te mi e prakseri a fasi fa mi ben libi fosi. Ma a e trowstu mi te mi e prakseri taki na ini a nyun grontapu di Gado pramisi wi, sma „no o memre den [ogri] sani moro” (Yesaya 65:17). Ma solanga dati no de so, den sani di miti mi kan yepi mi frustan den firi fu sma di abi densrefi sortu problema di mi ben abi. Te yu e luku en so, dan a libi di mi ben abi fosi, e yepi mi furu. Fu eksempre, te mi e du a preikiwroko, dan a makriki gi mi fu taki nanga sopiman, ogriman, noso sma di e gebroiki drugs èn mi no e denki takru fu den. Mi de seiker taki efu mi ben man kenki mi libi fu plisi Yehovah, dan iniwan sma man du dati tu.