Nofo tron den problema di libisma abi na ini a ten disi de na heri grontapu. Na ini son kondre, moro furu sma pôti èn e kisi kwinsi. Na ini tra kondre a gersi leki furu sma abi moro leki san den abi fanowdu. Na soso wan tirimakti di e tiri heri grontapu o man prati den gudu fu grontapu nanga reti.​—Leisi Preikiman 4:1; 8:9.

Furu sma feni taki wán tiriman no musu tiri heri grontapu, fu di nowan man noso uma o man tiri na wan bun fasi. Nowan libisma de di ala sma ben o lobi. Boiti dati, libisma abi a gwenti fu du kruka sani te den e kisi moro makti, a no so? Te sma e prakseri wawan taki wán sma nomo o tiri ala libisma, dan den e frede.​—Leisi Odo 29:2; Yeremia 10:23.

Yehovah Gado bosroiti fu meki en Manpikin, Yesus, tiri libisma fu têgo (Lukas 1:32, 33). Yesus sabi heri bun fa a libi de na grontapu. Di a ben de na grontapu, a ben dresi den siki sma, a ben gi leri na den safri-ati sma, èn a ben meki ten gi pikin-nengre (Markus 1:40-42; 6:34; 10:13-16). Sobun, Yesus na a moro bun Tiriman.​—Leisi Yohanes 1:14.

Gado poti en Manpikin di de na hemel, fu tiri grontapu (Danièl 7:13, 14). Neleki fa wan tiriman no abi fu de na ini ibri foto di a e tiri, na so Yesus no abi fu de na grontapu fu man tiri libisma.​—Leisi Mateyus 8:5-9, 13.

Ala sma sa feni en bun taki Yesus de a Tiriman? Nôno. Na soso den sma di lobi du bun, o wani en leki Tiriman. Yehovah o pori ala sma di no wani a lobi-ati èn bun Tiriman di a poti.​—Leisi Mateyus 25:31-33, 46.

Neleki fa wan skapuman e tyari den skapu fu en kon na wán, na so Yesus e tyari den safri-ati sma fu ala kondre kon na wán èn a e leri den fa den musu sori lobi neleki Gado (Yohanes 10:16; 13:34). Den sortu sma disi e horibaka fayafaya gi Yesus nanga en Kownukondre (Psalm 72:8; Mateyus 4:19, 20). Na heri grontapu, den sma di e tan saka densrefi na ondro Yesus, e fruteri trawan taki Yesus tron Kownu.​—Leisi Mateyus 24:14.

Heri esi Yesus o gebroiki en makti fu frulusu libisma fu den kruka tirimakti. Yesus teki wan tu fu den bakaman fu en fu tiri grontapu makandra nanga en leki kownu na ini hemel (Danièl 2:44; 7:27). A Kownukondre fu Yesus sa meki taki heri grontapu furu nanga a sabi fu Yehovah èn a sa meki grontapu tron a paradijs di ben lasi na a bigin.​—Leisi Yesaya 11:3, 9; Mateyus 19:28.