Sma musu memre Yesus Krestes
„Tan du disi fu memre mi.”—LUKAS 22:19.
Wan reide fu san ede sma e hori Kresneti.
Son sma e taki dati na fu Yesus ede den e hori Kresneti. Den e du dati fu memre a dei di a gebore.
Fu san ede dati no makriki?
Den Kresneti poku nanga den sani di sma gwenti du na a ten dati, no abi noti fu du nanga Yesus Krestes. Milyunmilyun sma di e hori Kresneti no e bribi na ini Yesus. Sonwan fu den no e bribi srefi taki a ben libi na grontapu. Gi bisnisman, Kresneti a no wan ten fu memre Yesus, ma na wan ten fu meki reklame gi den sani di den wani seri.
Sortu leri fu Bijbel kan yepi sma?
’A Manpikin fu libisma kon fu gi en libi leki wan lusu-paiman fu frulusu furu sma’ (Markus 10:45). Fu san ede ’a Manpikin fu libisma kon’? San na a moro bun fasi fa wi kan memre a sani dati? Luku a tori disi: Den wortu di Yesus taki na a bigin fu na artikel disi, na wan sani di a taki a neti fosi a dede. A no ben taki en tapu en friyaridei. A neti dati a sori den bakaman fu en fa den musu memre a dede fu en. Ma fu san ede Yesus ben o wani taki den bakaman fu en memre a dede fu en na presi taki den e memre a dei di a gebore? Fu di a lusu-paiman fu Yesus e gi libisma di e gi yesi na Gado na okasi fu kisi têgo libi. „A pai fu sondu na dede,” na so Bijbel e taki, „ma a kado di Gado e gi sma na têgo libi nanga yepi fu Krestes Yesus wi Masra” (Romesma 6:23). Dati meki ibri yari, na a dei di Yesus Krestes dede, den bakaman fu en no e memre en leki wan nyofi pikin di no man du noti gi ensrefi, ma den e memre en leki „a frulusuman fu grontapu”.—Yohanes 4:42.
„Krestes ben nyan pina gi unu èn a libi wan eksempre gi unu, so taki unu kan waka soifri na en baka” (1 Petrus 2:21). Fu man gi grani na Yesus èn fu man memre en, yu musu ondrosuku a fasi fa a ben libi leki wan koni man di no ben abi sondu. Yesus sori sari-ati nanga pasensi, èn a ben abi deki-ati fu du san reti. Denki dipi fu den sani disi. Suku okasi fu sori den fasi fu en.
„A Kownukondre fu grontapu kon tron a Kownukondre fu wi Masra èn fu a Krestes fu en. A o tiri leki kownu fu têgo, iya, fu ala ten” (Openbaring 11:15). Te yu e memre Yesus Krestes, dan prakseri san a e du nownowde. Yesus e tiri leki Kownu na hemel. Yu denki taki a de so farawe fu grontapu taki a no e broko en ede nanga libisma? Kwetikweti. Gado Wortu ben taki a sani disi fu Yesus: „Na wan reti fasi a o koti krutu gi den mofinawan. Nanga wan krin ati a o piri-ai gi sma, so taki den safri-ati sma na grontapu feni bun” (Yesaya 11:4). A no wan nyunyun beibi abi den moi fasi dati, ma na wan makti Tiriman.
