Den Dyu ben e beri den dedewan fu den esi-esi, èn nofo tron den ben e du dati na a srefi dei di a sma dede. Tu reide ben de fu san ede den ben e du dati. A fosi reide, na taki dede skin ben e pori esi-esi fu di a weer na ini a kontren fu a Mindri Owstusei faya. Wan tra reide, na taki den sma fu a ten dati ben e bribi taki efu den ben e wakti wan tu dei fosi den beri wan dedesma, dan den no ben e sori lespeki gi a sma èn gi a famiri fu en.

Den Evangelietori fu Bijbel èn a buku Tori fu den apostel e taki fu fo sma di ben beri na a srefi dei di den dede (Mateyus 27:57-60; Tori fu den apostel 5:5-10; 7:60–8:2). Wan tu hondro yari na fesi, Yakob en lobi wefi Rakel dede di Yakob nanga en famiri ben e teki waka go na wan tra kondre. Na presi taki Yakob drai go baka fu beri Rakel na a beripe fu a famiri fu en, a beri en na ini wan grebi „di den ben de na pasi fu go na . . . Betlehem”.—Genesis 35:19, 20, 27-29.

Bijbel e sori taki den Dyu ben e sreka dedeskin bun fosi den beri den. Famiriman nanga mati ben e wasi a dede sma, den ben e lobi switismeri sani nanga bun oli gi en, èn den ben e domru en na ini krosi (Yohanes 19:39, 40; Tori fu den apostel 9:36-41). Birtisma nanga tra sma ben e kon fu sari nanga a famiri èn fu trowstu den.—Markus 5:38, 39.

Furu Dyu famiri ben e beri den dedewan fu den na ini bergi-olo nanga grebi di den ben diki na difrenti presi na ini Israel, pe a gron no ben tranga so. Na so den famiri-edeman fu den ben du tu. Abraham, Sara, Isak, Yakob, nanga trawan ben beri na ini a grebi-olo na Makpela, krosibei fu Hebron.—Genesis 23:19; 25:8, 9; 49:29-31; 50:13.

Yesus ben beri na ini wan grebi di den ben diki na ini wan stonbergi (Markus 15:46). Nofo tron a mofo fu den sortu grebi dati ben smara. Na inisei fu den grebi dati, sma ben e diki faki pe den ben e poti den dedeskin fu den famiriman fu den. Baka te a dedeskin ben pori gowe, dan sma ben e poti den drei bonyo na ini wan ston kisi, soleki fa a gwenti ben de na ini a ten fu Yesus. Na so a famiri ben e meki presi gi tra dedewan.

A Wèt fu Moses ben e taki dati den Dyu ben musu rostu na Sabadei, sobun na a dei dati den no ben mag seti sani fu beri sma. Fu di Yesus dede sowan dri yuru fosi a Sabadei bigin, meki Yosef fu Arimateya nanga tra sma beri en sondro taki den ben kaba sreka a skin fu en (Lukas 23:50-56). Dati meki sonwan fu den mati fu Yesus go na a grebi baka a Sabadei, fu di den ben wani sreka en skin go doro.—Markus 16:1; Lukas 24:1.